ဟိုတ်နူပရေၚ်ကၟာတ်လဒဵုၜါလ္ပာ်တံတုဲ ပ္ဍဲဗဝ်လခေဝ် ကပေါတ်ဗၞိက်ပိုတ်အိုတ်ယျ

ဗဝ်လခေဝ်၊ အံက်တဝ်ဗာ(၁၈)

ဟိုတ်နူပွကၟာတ်လဒဵုၜါလ္ပာ်တံတုဲ ပ္ဍဲတွဵုရးကရေၚ်ဍာဲ၊ ပွိုၚ်ဍုၚ်ဗဝ်လခေဝ်ဂှ် သ္ပပ္တံနူဂိတုဏံလ္ပာ်မံက်တုဲ ဗၞိက်စသုၚ်သ္ဇိုၚ်မပါလုပ် ကပေါတ်ဗၞိက်ဗွဲမဂၠိုၚ် ပိုတ်အိုတ်မံၚ်ယျဂှ် ညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ပ္ဍဲပွိုၚ်ဍုၚ်ဗဝ်လခေဝ် ကော်ခဴစဒၟံၚ် ဍုၚ်ဒပ်ပၞာန်ဂှ် သ္ပတံနူပ္ဍဲပွိုၚ်ပိဂိတု တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးကရေၚ်ဍာဲတံ ပေါဲဗ္တိုက်ၜါလ္ပာ်တံ သ္ကာတ်မြဟ်မံၚ်ရ။

ပ္ဍဲပေါဲဗ္တိုက်တံဏံဂှ် ပ္ဍဲသ္ကုတ်ဂၠံၚ် အာဗဝ်လခေဝ်ဂှ်မ္ဂး မ္ၚးနူဂကောံဇြဟတ်ပၠန်ဂတးကရေၚ်ဍာဲတုဲ လ္ပာ်ကံၚ်ဇြဳပၞာန်လေဝ် ကၠောန်သ္ပလဝ် ပွသၞောတ်ဗ္ၜတ်ကၟာတ်လဒဵုတံဂှ်ရ ဒးဂဗကၠုၚ် ကုပွကပေါတ်ဗၞိက်ပိုတ်အိုတ်ရ။

သ္ၚုမပါလုပ် ကပေါတ်ဗၞိက်စသုၚ်သ္ဇိုၚ်ဗွဲမဂၠိုၚ်တံ ပိုတ်ကၠုၚ်ဂှ်ရ ညးဒေသဗဝ်လခေဝ်တံ ဒှ်ကၠုၚ်စဵုကဵုအကာဲအရာ ဒးထၟုက်စမံၚ်သြောံဂန်တံရဂှ် ညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်မွဲတၠဂှ် ဟီုရ။

“နွံပၟိက်မံၚ်သ္ၚုအဓိကရ။ သ္ၚု၊ကၠေၚ်၊ ၜဵုရဏး။ ပေါဲဗ္တိုက်ဂှ်လေဝ် ပရေၚ်ဇီုမုက် ဂၠိုၚ်မံၚ်တှ်ေ ၚုဟ်ဖျာတံတိုန်ကၠုၚ်ရ။ သ္ၚု၊ ကၠေၚ်၊ ၜဵုတံဂှ်တှ်ေ ဒှ်မံၚ်ကာတၟေၚ်ရ ပြဟ်ဟ်ဏံဂှ်တှ်ေလေဝ်။ ပ္ဍဲဒၞါဲလ္ၚဵုဂှ်တှ်ေ စိုပ်ကၠုၚ်အကာဲအရာ စဵုကဵုဒးထၟုက်စမံၚ်သြောံဂန်ဂှ် နွံရ။ တၚ်နွံပၟိက်ဂှ် မွဲတ္ၚဲကဵုမွဲတ္ၚဲ သာတုဲ သၠုၚ်တိုန်ကၠုၚ်မံၚ်ရ” သာ်ဝွံ သ္ဂးရ။

ဟိုတ်နူဇွောံမစၞစပိုတ်အိုတ်ဂှ်ရ ကံၚ်ဇြဳပၞာန်လေဝ် သွက်ဂွံပလံၚ်ဇွောံမ ဇရေၚ်ဂကောံဒပ်ဍေံတံ နကဵုကွဳစက်ပၞာန် (၆၀)ဖ္ဍိုက်ပြၚ်ဂှ် ဂ္စာန်မံၚ်ရ။

လ္တူပွဂ္စာန်ဗီုဏံဂှ် ဂကောံဇြဟတ်ပၠန်ဂတးကရေၚ်ဍာဲတံ ကိုပ်ကၠာဂွိုအ်စိုပ်ဗဝ်လခေဝ်ဂှ် ကြတ်ဗ္တိုက် ပ္ဍဲတိဍာ်ဖရူသဵု၊ ဒဳမအ်သဵုတံတုဲ လ္ဂောံကဵုပရေၚ်ဂီုကၠီု ကၟာတ်လဝ်အခေါၚ်သုၚ်စောဲဂၠံၚ်ယာယဳရ။

ပ္ဍဲပွိုၚ်ဍုၚ်ဗဝ်လခေဝ်ဂှ် လ္ဂောံကဵုစရၚ်လၟိဟ်မၞိဟ် သၞာံ (၂၀၁၄) လၟိဟ်မၞိဟ် (၈၀၀၀)ပြၚ် မံၚ်တန်တဴဒၟံၚ်ဂှ် ဟိုတ်နူပေါဲဗ္တိုက်က္တဵုဒှ်ဒၟံၚ် ကြဴနူသီအဝဵုတုဲ ညးဒေသ (၆၀)တၟံကၠံတံဂှ် ထောံလသာဌာန်ဒၟံၚ်တုဲ ဂြိပ်ဒဴဒၟံၚ်ရဂှ် ဂွံတီကေတ် နူညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။

ဆ္ဂး ညးထံက်ဂလာန်ဒပ်ပၞာန်တံကဵု မဇဒပ်ပၞာန်တံဂှ်တှ်ေ ဟွံထောံလသာဌာန်ဒၟံၚ်မွဲသာ် ဒးမံၚ်စံၚ်ဒၟံၚ် ပ္ဍဲပွိုၚ်ဍုၚ်ဗဝ်လခေဝ်တုဲ ဒးဒုၚ်စသိုၚ်ဒၟံၚ် ဘဲဒဏ်ၚုဟ်ဖျာက္ဍၚ်တိုန် ဇၞော်ကဵုဇြဟတ်ရ။

ပွိုၚ်ဍုၚ်ဗဝ်လခေဝ်ဂှ် နဒဒှ်ဂၠံၚ်ဍာန်ပရေၚ်ဆက်စၠောံဂှ် ဂၠံၚ်ဍာ်၊ ဂၠံၚ်ကျာ ဟၟဲမွဲသာ် ဒးသုၚ်စောဲမံၚ် ဂၠံၚ်ကွဳစက်မွဲဂၠံၚ်ဓဝ်တုဲ ဟိုတ်နူပွကၟာတ်လဒဵုၜါလ္ပာ်တုဲ ဒးဆေၚ်မံၚ်မုက်ကဵု ကပေါတ်ဗၞိက်ပိုတ်အိုတ်တံရ။

ပရိုၚ်-သြၚ်လောန်တိုၚ်မ်

ဗီု -RFA/ Sky News