ယဝ်ဟွံဇီုကပိုက်ဒး တာလျိုၚ်ပိုဲပိတၚ်တှ်ေ ဆဵုဂဗသဳကၠဳအာဏောၚ် က္ဍိုပ်သ္ကိုပ်ပၞာန်ဟီု

နေပျဳဒဝ်၊ အံက်တဝ်ဗာ(၁၈)

ယဝ်ရဟွံဇီုကပိုက်ဒးတာလျိုၚ်ပိုဲပိတၚ်ကဵု ပရေၚ်ဂါံကွာ်အာသၞောတ်ဒဳမဝ်ကရေဇြဳဗော်ဇဳမ္ဂး ကၠောန်ရေၚ်တၠုၚ်အာ ပရေၚ်ဆဵုဂဗသဳကၠဳဏောၚ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ဟီုသ္ဂးလဝ်ရ။

ဃောဒုၚ်တဲဆဵုဂဗကဵု ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ တိုန်စိုပ်ကၠုၚ်အခန်ကၞာ NCA ပေၚ် ၈ သၞာံ ပ္ဍဲနေပျဳဒဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၆) ဂှ် က္ဍိုပ်သ္ကိုပ်ပၞာန် ဟီုပ္တိတ်လဝ်ရ။

ပ္ဍဲပေါဲဆဵုဂဗဏံ က္ဍိုပ်သ္ကိုပ်ပၞာန်ဂှ် ပါဲနူပ​ရေၚ်ထ္ပက်စၟတ်တဲ လိက်ကသုက် NCA ၊ ပရေၚ်ဒပ်ပၞာန်ဆက်ကွာ်ဂါံအာဒၟံၚ် လ္တူဂၠံၚ်ဍာန် NCA ဂှ် ယဝ်ဟွံဇီုကပိုက်ဒးတာလျိုၚ်ပိုဲပိတၚ် ကေုာံဒဳမဝ်ကရေဇြဳတှ်ေ ဆဵုဂဗသဳကၠဳအာဏောၚ်ဂှ် ဟီုလဝ်ရ။

ဆ္ဂးရန်လဝ်ကဵုဂကောံလဵု ဆဵုဂဗသဳကၠဳအာရောဟီုဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော် မေန်အံၚ်လှာၚ် ဓမံက်ဟီု ပ္တိတ်လဝ် ဟၟဲရ။

တာလျိုၚ်ပိုဲပိတၚ်မ္ဂး ညံၚ်ကၟိန်ဍုၚ်ဟွံဂွံပါ်ဒကးအာ၊ ညံၚ်ပရေၚ်ဆာန်ကၟိန်ကောန်ဍုၚ်အရၚ်ဟွံဂွံပါ်ဒကးအာ၊ ညံၚ်အခေါၚ်အဝဵုဂွံဗိုန်ဗတ်တန်ကြန်အာဟီုဂှ် မူဝါဒလၟေၚ်ဂၠံၚ်တရဴကၟိန်ဍုၚ်လေဝ် ဒှ်ရ။

ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဒစဵုဒစးပၠန်ဂတးဒၟံၚ်ကံၚ်ဇြဳပၞာန် ပဒိုဝ်သဝ်တဝ်နဳဂှ်မ္ဂး လ္ပာ်ကံၚ်ဇြဳပၞာန် ဟွံဒ္ဂေတ်ဗက်တၚ်ရန်တၟံပရေၚ်ဍုၚ်ကွာန် KNU လလောၚ်တြးလဝ်ဂှ်မွဲသာ်တှ်ေ သွက်ဂွံဆဵုဂဗသဳကၠဳ ညိဟွံချပ်လဝ်ပုဟ်ဂှ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

“ဒပ်ပၞာန်ပ္ကီုပရာပ်ဂှ် ညိလေဝ်ဟွံကြိုက်ကဵုယၟု ဒပ်ပၞာန်ပုဟ် မိက်ဂွံဟီုရ။ ကမၠောန်ပြဝဒပ်ပၞာန်ကၠောန်ဒၟံၚ် လၟုဟ်ဂှ် ညိလေဝ် ဟွံထေက်ကြိုက်ကဵုသၞောတ်ဒဳမဝ်ကရေဇြဳဗော်ဇဳတုဲ လ္တူဗက်ကၠောန်သ္ပဒၟံၚ် ပရေၚ်ဒစဵုဒစး ဂၠံၚ်တရဴအာဖေတ်ဒရေဝ်ဂှ်လေဝ် မုသက်ဂွံဒးဟီု ဟၟဲရ။ စပ်ကဵုပရေၚ်ဆဵုဂဗသဳကၠဳတုဲ နကဵုအလဵုပိုဲလေဝ် ဓမံက်ထ္ၜးလဝ် တၚ်ရန်တၟံ တၚ်ဒတူလာၚ်ဇကု တုဲတုဲဂှ်ရ ဟွံဒ္ဂေတ်ဗက်တၚ်တအ်ဂှ်မွဲသာ်တှ်ေ ညိလေဝ် ပိုဲချပ်ဟွံသေၚ်ပုဟ် မိက်ဂွံဟီုရ” ဂှ် ဟီုလဝ်ရ။

တုဲကၠုၚ်မွဲၜါတ္ၚဲတေံ CNF ကေုာံ ABSDF ပါလုပ်သီု KNU ထ္ပက်လဝ်စၟတ်တဲတုဲ ပါလုပ်ဒၟံၚ် ပ္ဍဲပၠန်ဂတးတအ်ဂှ် ပံၚ်တောဲလလောၚ်တြးလဝ် တၚ်ဒတူလာၚ်ပရေၚ်ဍုၚ်ကွာန် လုကဴဒပ်ပၞာန်ဟွံစ္ဍးတိတ်အာ နူပရေၚ်ဍုၚ်ကွာန်မ္ဂး သွက်ဂွံသဳကၠဳဟၟဲဂှ်ရ။

ဟိုတ်နူကမၠောန်ပြဝကံၚ်ဇြဳပၞာန် ကၠောန်သ္ပဒၟံၚ် ပရေၚ်ဗတိုက်ပန် ပ္တဝ်လဝ်ကဵုကောန်အရာပ်ညးဍုၚ်ကွာန်တအ်တုဲ သ္ပကဵုဒၟံၚ် ပရေၚ်လိက်ကသုက် NCA လီုလာ် သာခိုၚ်ကၠိုက်ဒၟံၚ်တုဲ ဒပ်ပၞာန်ဂှ် သ္ပပြာကတ်ဒၟံၚ် ဒဒှ်ရသၠးထောံလဝ် နဲကဲဂၠံၚ်ဍာန် ပ္ညဳပ္ညပ်ဂၠာဲသွဟ်ဗွဲမၜိုဟ်သြိုဟ်ရဂှ် ဓမံက်ထ္ၜးလဝ် ပ္ဍဲတၚ်ပံၚ်တောဲလလောၚ်တြးဂှ်ရ။

က္ဍိုပ်သ္ကိုပ်ပၞာန်ဂှ်မ္ဂး ညံၚ်ကၟိန်ဍုၚ်ဂွံခိုဟ်စ ဒးကၠောန်ရေၚ်တၠုၚ်အာ အတိုၚ်ပၟိက်ဆန္ဒညးဆေၚ်စပ်သီုဖအိုတ် တအ် တုပ်သၟဟ်တုဲ ညံၚ်ကၟိန်ဍုၚ်ဂွံညိၚ်ဝတ်ကဵု သီုပရေၚ်ၜိုဟ်လလံ ဗက်ကဵုဒေသဂှ် သွက်ဂွံဘိုၚ်ရေၚ်တၠုၚ်အာညးသ္ကအ်ဂှ် ဟီုလဝ်ရ။

သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ်မ္ဂး နကဵုကံၚ်ဇြဳပၞာန် ဇီုကပိုက်ဒးတာလျိုၚ်ပိုဲပိတၚ်ကဵုဒှ် ဟွံဇီုကပိုက်ဒးကဵုဒှ် တာလျိုၚ်ဒးသဳကၠဳ နွံဒၟံၚ်တုဲ ပရေၚ်ဟီုဂးလဝ်လၟုဟ်ဏံ ဒှ်ဟီုဂးဒၟံၚ် ဟွံသဳကၠဳရဂှ် သ္ၚဳဂၠိပ်ညာတ်ကေတ်လဝ်ရ။

“ဇီုကပိုက်ဒးတာလျိုၚ်ပိုဲပိတၚ်ကဵုဒှ်၊ ဟွံဇီုကပိုက်ဒးကဵုဒှ် ဣဏံဂှ် နကဵုဍေံ(ကံၚ်ဇြဳပၞာန်) တာလျိုၚ်ဒးသဳကၠဳ နွံဒၟံၚ်ဏောၚ်။ ညံၚ်ဟွံဂွံဇီုကပိုက်ဒးဂှ် သဳကၠဳရ။ ဣဏံဂှ် ကၠောန်ဟွံဂွံပုဟ်လေဝ်။ သွက်ဂွံဟီု ဗီုဏံရနွံ။ ပရဟ်ဒုၚ်ဒၞာလဝ်တုဲ ယဝ်ဇီုကပိုက်ဒးတအ်ဏံတှ်ေ သဳကၠဳဟွံမာန်ပုဟ်ဟီုဂှ် ကိစ္စဏံလေဝ် တၚ်ပံက်အဓိပ္ပါယ် ဟၟဲပုဟ်ဟီုတှ်ေ တုပ်ညံၚ်ကဵုဟီုဒၟံၚ် သဳကၠဳဟွံမာန်တုပ်ပ်ရ။ ဒၟာနူဂှ်ရ ကိစ္စဒှ်ဒၟံၚ်လၟုဟ်ဂှ် ဒှ်ကိစ္စဖေတ်ဒရေဝ်ကဵု ဒဳမဝ်ကရေဇြဳ။ သွက်အရာတအ်ဏံ နူကဵုဂကောံလဵုဟီုဟီု ကဵုဂကောံလဵု သဳကၠဳသဳကၠဳ ဣဏံဂှ်လ္ပာ်ဍေံတအ် ဒးကလၚ်တုဲ ဒှ်အကာဲအရာ ဒးဂၠာဲကဵုသွဟ်ဏောၚ်” ဂှ် ဟီုလဝ်ရ။

နကဵုကံၚ်ဇြဳပၞာန် နူအခိၚ်သီကေတ်လဝ်အဝဵုကၟိန်ဍုၚ် ဗွဲအဓမ္မတုဲ စဵုကဵုတ္ၚဲဏံ က္လိဒၟံၚ်ပရေၚ်ဖံက်ပ္ကဝ်အခေါၚ်အရာမၞိဟ် မွဲကရောံကဵု ပရေၚ်ပ္တဝ်လဝ် ကုကောန်အရာပ်ဒစဵုဒစးဒၟံၚ်ကဵုဍေံတအ်တုဲ ဗတိုက်ပန်ဒၟံၚ်ရ။

မွဲလ္ပာ်ပၠန်ဂှ် ပ္ဍဲလ္တူဒပ်စဵုဒၞာညညးဍုၚ်ကွာန် PDF သီုဂကောံရပ်လွဟ်ကောန်ဍုၚ်အရၚ် ပါလုပ်ဒၟံၚ် ပ္ဍဲပရေၚ်ပၠန်ဂတးတအ်ဂှ် ကြပ်ဒှ်သီုအလုံမွဲကၟိန်ဍုၚ် နကဵုဇြဟတ်ပၞာန်ပေၚ်ၚ် ကၠောန်ရေၚ်တၠုၚ် သၠဲပ္တိတ်ဒၟံၚ် ဒၟံၚ်ပရေၚ်ချဳဒရာၚ်ပၞာန်ရ။

ပ္ဍဲအကာဲအရာဏံ ဂအုပ်သ္ကိုပ်ဗိုလ်ဇၞော်မေန်အံၚ်လှာၚ်ဂှ် နကဵုဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲ ပ္ဍဲ NCA ဏီတအ် ဂါံကွာ်ကၠုၚ် ဒဵုစိုပ်ဇရေၚ်ပေါဲဆဵုဂဗသဳကၠဳညိဂှ်လေဝ် ကော်ဘိက်လဝ် ပ္ဍဲအခန်ကၞာ NCA ရ။

ပရိုၚ် -သြၚ်လောန်တိုၚ်(မ်)

ဗီု – MOI