တၚ်ရုယှာပ္တိုန်လဝ်ဂလာန် စပ်ကဵုပရေၚ်ဂါဇြာမူအပြောံဂှ် ကံၚ်ဇြဳဂီုကၠီုကုလပါဲတးလဝ်

နယူယံက်၊ အံက်တဝ်ဗာ(၁၈)

တၚ်သ္ဂုတ်သွာတ်မူအပြောံ ရုယှာပ္တိုန်လဝ်ဂလာန် ပရေၚ်ထံက်ရံၚ်ဗ္စာရဏာပရေၚ်မၞိဟ် သွက်ဒေသသြၚ်ဂၚ်ဇမၠိၚ်ဂါဇြာ ကေုာံ ပရေၚ်ဒေါံပန်ပှော်ဂှ် ကံၚ်ဇြဳဂီုကၠီုကုလသမဂ္ဂ ပါဲတးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၇)ဂှ်ရ။

တၚ်ဂလာန်မဝ်သဂိုဝ် မုက်လိက်ကၟိန်ဍုၚ်အာရာပ်တအ် ပါလုပ်သီုပါလေတ်သတိုၚ်၊ အဳဂျေတ်၊ ယူအေအဳ ကေုာံသဝ်ဒဳအာရေဗဳယျတအ် ပါလုပ်မွဲမုက်လိက်ဂှ် ပၞောဝ်ကဵုကံၚ်ဇြဳလုပ်ဂကောံမာဲထံက်ဂလာန်အောန်အိုတ် (၁၅) တၠ ဟိုတ်နူဟွံက္လိဂွံမာဲထံက်ဂလာန် (၉) တၠတုဲ ဒးဒုၚ်ပါဲတးလဝ်ရ။

တၚ်သ္ဂုတ်သွာတ်မူအပြောံဂှ် မာဲထံက်ဂလာန် (၅) မာဲ၊ မာဲမံၚ်အကြာ (၆) မာဲ ကေုာံမာဲဒစဵုဒစးအမေရိကာန်၊ ဗျိတိၚ်၊ ဂျပါန် ကေုာံပြၚ်သေတ်တအ် ကဵုလဝ်မာဲ (၄) မာဲရ။

တၚ်ဂလာန်ပ္တိုန်ရုယှာဂှ် သွက်ဂွံပျုတ်ဗ္ဒေက်ဂကောံဟာမေတ် စက္လိလောန်လဝ်ပရေၚ်ပ္ကီုပရာပ် သီုပရေၚ်ဂၠာဲသၞကၠာဂှ် ဟိုတ်နူလုတ်ဒကုတ်လဝ်တုဲ ဂကောံကၟိန်ဍုၚ်ပလိုတ် ပါလုပ်သီုအမေရိကာန်တအ် ပါဲတးလဝ်ရ။

ကြဴနူပါ်မာဲတုဲဒှ်ဂှ် အမာတ်ကလုတ်ကုလ ဆေၚ်ကဵုကၟိန်ဍုၚ်ရုယှာဂှ်မ္ဂး “ဟိုတ်နူဂွံထပ်ဆဵုညာတ်ကေတ် တၚ်ဒတူလာၚ် ဂကောံကၟိန်ဍုၚ်ပလိုတ်တအ် အတ္တဇၞော်ဒၟံၚ် စိုတ်ဟွံမိပ်ရ”ဂှ် ဟီုလဝ်ရ။

အမာတ်ကလုတ်အမေရိကာန် ဆေၚ်ကဵုကုလသမဂ္ဂ ဒါလေန်ဂှ်မ္ဂး “ကံၚ်ဇြဳ ထေက်ကဵုဒးကေတ်အာအရေဝ် အရာဏံဏောၚ်။ ဆ္ဂးညံၚ်ဂွံဒှ်ဓဝ်ဍာံ ဒးကၠောန်တုဲ သွက်ဂွံအရာဏံ ပံၚ်တောဲရေၚ်တၠုၚ်အာကဵု ညးလုပ်ဂကောံ မၞုံပ္ဍဲကံၚ်ဇြဳတအ် သီုဖအိုတ်ဏောၚ်”ဂှ် ဟီုလဝ်ရ။

ဆ္ဂးသွက်တၚ်သ္ဂုတ်သွာတ်ပျုတ်ဗ္ဒေက်ဟာမာတ်သ်မွဲတၚ်ဂှ် အတိုၚ်လိက်စံၚ်ပဋိညာဏ်ကုလသမဂ္ဂမ္ဂး အခေါၚ်အေဿရေဂွံစဵုဒၞာဇကုဇကု ပါဗက်ကၠုနူဂဝ်ဂှ်လေဝ် သွက်ဂွံထပ်သ္ပကဵုဒ္တန်ဂှ် ညးအာတ်မိက်လဝ်ရ။

လ္ပာ်ကလုတ်ကုလ ယူအေအဳ လာန်နာနာဇြဳဂှ် ကောန်ဂကောံကံၚ်ဇြဳသီုဖအိုတ် ဒဒှ်ဒးပျုတ်ဗ္ဒေက်အာ ပရေၚ်ပြိုက်ဂစိုတ်လဝ် ဟွံပါ်ပါဲကောန်အရာပ်အေဿရေဂှ် ဗွဲမဍာံစၟတ်ရောၚ် ဟီုလဝ်ရ။

သွက်ဂွံကဵုအရီုဗၚ်ဂှ် ကၠာနူဟွံဂွံအာတ်မိက်လဝ် သွက်ဂွံကၠောန်ရေၚ်တၠုၚ်အာဗွဲမထိၚ်ဒဝ်ဏီဂှ် ကံၚ်ဇြဳဂီုကၠီု စၟတ်သမ္တီကေတ်လဝ် ဂကောံဟာမာတ်သ် နဒဒှ်ဂကောံပ္ကီုပရာပ်ကၠာတုဲ ဒးထံက်အာဂလာန် အခေါၚ်ဒုၚ်ဒဝ်စဵုဒၞာအေဿရေရောၚ်ဂှ် အမာတ်ကလုတ်ကုလ ဿေရေဟီုလဝ်ရ။

မွဲအခိၚ်ဓဝ်ဂှ် ဝန်ဇၞော်ပရေၚ်ဍုၚ်သ္အာၚ်အမေရိကာန် အာန်တိုဝ်နဳဘလေန်ကာန် ကေုာံ သ္ကိုပ်ဝန်ဇၞော်အေဿရေ ဗေန်ဂျမေန် နေတာန်ယာဟုတအ် သွက်ဂွံကၠောန်ရေၚ်တၠုၚ်အာ ညံၚ်အရီုဗၚ်၊ ကၟိန်ဍုၚ်တၠဒါန် ကေုာံ နူဂကောံသွာၚ်နာနာတအ် သ္ဂောံက္လိဂွံအရီုဗၚ် ဇရေၚ်သြၚ်ဂၚ်ဇမၠိၚ်ဂါဇြာ မဒးဒုၚ်ကၟာတ်လဝ်ဂှ်လေဝ် တုပ်လဝ်စိုတ်ညးသ္ကအ်ရ။

Ref: The National News