ဒပ်ပၞာန်ရပ်ဒက် သ္ကိုပ်အုပ်ဓုပ်တြေံကျာ်ထဝ်မွဲတၠ

ကျာ်ထဝ်၊ အံက်တဝ်ဗာ(၁၉)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ သ္ကိုပ်အုပ်ဓုပ် ကွာန်ခယျဲတြေံ ဥူတာန်လွေန်ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၈) အခိၚ်နူဂယး ၜိုတ် (၅)နာဍဳဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ်ရဂှ် ဂွံတီကေတ် နူညးတာလျိုၚ် PDF ခရိုၚ်သဓီုရ။

အခိၚ်ဥူတာန်လွေန် အာယုက် (၅၀)သၞာံ နွံဒၟံၚ်ပ္ဍဲသ္ၚိဒၟံၚ်ဂှ် ကောန်ဂကောံဒပ်ကံၚ်ဇြဳပၞာန် ကၠုၚ်နကဵုကယျိုၚ်အရာပ်တံဂှ် သွက်ဂွံစၟဳတ်သၟာန်သၟုက်နွံမံၚ်ဂးတုဲ ရပ်ဒက်ဏာလဝ်ရ။

နကဵုတၚ်စောတ်စောဲ ဥူတာန်လွေန်ဂှ် ကၠောန်သ္ပရေၚ်တၠုၚ်မံၚ် ပွကဵုပရိုၚ်၊ ထံက်ပၚ်မံၚ် ကုဒပ်စဵုဒၞါညးဍုၚ်ကွာန် PDF တံဂှ်သ္ဂးတုဲ ဒပ်ကံၚ်ဇြဳပၞာန်တံ ရပ်ဒက်ဏာလဝ်ရ။

ပ္ဍဲထလဳဂရာမ်ချာန်နယ် လဝ်ဗဳဒပ်ပၞာန်တံဂှ် ရပ်ဒက်ဏာလဝ် သ္ကိုပ်အုပ်ဓုပ်တြေံ ဥူတာန်လွေန်ရဂှ် PDF တံ ချူထ္မံက်ထ္ၜးလဝ် နွံမံၚ်ရ။

ညးတာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ်တှ်ေ ဥူတာန်လွေန်ဂှ် ဒဒှ်ရလ္ပာ်ညးတံ ရပ်ဒက်လဝ်ဟွံသေၚ်ဂှ်ကဵု ဆက်ဂၠိုက်ဂၠါဲမံၚ် လၟေၚ်ဒဒှ်သောဲသောဲဗြောဲဗြောဲဖိုဟ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

သ္ကိုပ်အုပ်ဓုပ်တြေံ ဥူတာန်လွေန်ဂှ် ဒပ်အမၠံက်ကံၚ်ဇြဳပၞာန် စၟတ် (၃၁၀) ကၠုၚ်စိုပ်ရပ်ဒက်ဏာလဝ်ရဂှ် ၜိုန်ဂၠိုက်ဂၠါဲဂွံဆဵုလဝ်ကီုလေဝ် ရပ်ဒက်ထိၚ်ဒဝ်လဝ် ဒၞါဲလဵုရောဟီုဂှ် ဟွံဂွံတီကေတ်လဝ်ဏီရ။

ပ္ဍဲကျာ်ထဝ်ဂှ် ပ္ဍဲမွဲကာလသီအဝဵုဏံ နကဵုတၚ်စောတ်စောဲ ဆက်စပ်မံၚ်ကဵု PDF တံသ္ဂးတုဲ ညးဒေသ ဗ္ဒာဲ(၁၀၀) ပါလုပ်သီုတၠကမၠောန်တအ် ဒးဒုၚ်ရပ်ဒက်လဝ်တုဲ ဗွဲမဂၠိုၚ်ဂှ် ဒးဒုၚ်ဖျေံလဝ် ဒုဟ်ဒဏ် ဒဏ်ထံၚ် ညးသ္ကအ်အိုတ်ရ။

အတိုၚ်တၚ်လလောၚ်တြး ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP မ္ဂး ပ္ဍဲကာလသီအဝဵုဏံ ပ္ဍဲတွဵုရးဍုၚ်မန်ဂှ် ညးဍုၚ်ကွာန်ကောန်အရာပ် ဗ္ဒါဲ(၈၃၀) ဒးဒုၚ်ရပ်ဒက်လဝ်ရဂှ် လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ(၁၇)ဂှ်ရ။

ပရိုၚ်-သြၚ်လောန်တိုၚ်မ်

ဗီု-Social Media