ရုၚ်အုပ်ဓုပ်ကဵု ဗဒိုပ်ဗၠာဲသၟိၚ်ကအ်ကြိက် ဒးဒုၚ်ဗတိုက်လဝ်ကဵုက္ၜၚ်ကျာမသက္ကုမၞိဟ်ဒဳအဇာဍောတ်

ကအ်ကြိက် – အံက်တဝ်ဗာ(၁၉)

တွဵုရးကရေၚ်၊ ရုၚ်သ္ကိုပ်ပရေၚ်အုပ်ဓုပ်ကံၚ်ဇြဳပၞာန် ကေုာံဗဒိုပ်ဗၠာဲသၟိၚ် နွံလ္တူဍုၚ်ကအ်ကြိက်တအ်ဂှ် ဂြာတ်ထောံဖျေံလဝ်ဗုမ် ကဵုက္ၜၚ်ကျာမသက္ကုမၞိဟ်ဒဳအဇာဍောတ် ဗတိုက်ပန်လဝ်ရဂှ် ဌာနဝန်ဇၞော်ပရေၚ်စဵုဒၞာ လလောၚ်တြးလဝ်ပရိုၚ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၁၇) အခိၚ်နူဂယးဂှ် အာစိုပ်ဗတိုက်လဝ် နကဵုက္ၜၚ်ကျာမသက္ကုမၞိဟ်ဒဳအဇာဍောတ်တုဲ ဗတိုက်လဝ်ရဂှ် ဟီုလဝ်ရ။

ပရေၚ်ဗတိုက်ပန်ဏံ ဂကောံ Kloud Drone ကေုာံ ဒပ် Angry Bird Drone Ranger၊ Power of Ababil (POA) ပံၚ်တောဲရေၚ်တၠုၚ်ဒၟံၚ် ကမၠောန်ဆေၚ်ကဵုသွာၚ်ပညာဒရုမ် ကရောံဌာနဝန်ဇၞော်ပရေၚ်စဵုဒၞာတအ် ပံၚ်တောဲဗတိုက်လဝ်ရ။

ဒၞာဲဌာန်ပ္တဝ်ဂှ် ထောံဖျေံလဝ်ဗုမ်တဝ်တဝ်ဗတိုက်လဝ်မာန်တုဲ ပရေၚ်ဒပ်ကံၚ်ဇြဳပၞာန် ဇီုကပိုက်ဒးချိုတ်လဝ်ဂှ် ဃောလ္ၚတ်ဂၠိုက်ဂၠာဲဒၟံၚ်ဖိုဟ်တုဲ ကောန်ဒပ်ဒရုမ်တအ် ပရေၚ်ဇီုကပိုက်ဒးဟၟဲမွဲသာ် ဆုတ်တိတ်မာန်လဝ်ရဂှ် MOD ဟီုသ္ဂးလဝ်ရ။

ပရိုၚ် – သြၚ်လောန်တိုၚ်(မ်)

ဗီု – MOD