ရေဝ်၊ အံက်တဝ်ဗာ(၂၀)
ပ္ဍဲဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ကြဴနူသ္ကိုပ်က္ဍိုက်က္ဍိုပ် ကမၠောန်ကၚုဲ ဒးဒုၚ်ပန်ဂစိုတ်လဝ်တုဲ ဒပ်ကံၚ်ဇြဳပၞာန် ကၠောန်ကၠုၚ်ပရေၚ်ကၟာတ်ဒၞာစၟဳစၟတ် အဆက်ဆက်ရဂှ် ဂွံတီကေတ် နူညးဒေသတအ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၁၈) တုဲကၠုၚ်တေံ အခိၚ်နူဂယးဂှ် ပ္ဍဲကဵုဆေၚ်ဍာ်လက်ဖက် “ဖူ” မၞုံအရာပ်ယာန်ဂျဳအောန် ဍုၚ်ရေဝ် ဟိုတ်နူသ္ကိုပ်က္ဍိုက်က္ဍိုပ်ကမၠောန်ကၚုဲ ပွိုၚ်ဍုၚ်ရေဝ် ဥူဇြဝ်နိုၚ်လေန် ဒးဒုၚ်ပန်တုဲ ဒးချိုတ်အာလဝ်ရ။
ကြဴနူပရေၚ်ပန်ပှော်ဏံဒှ်လဝ်တုဲ သ္ပတံနူဂိတုအံက်တဝ်ဗာ စၟတ်တ္ၚဲ (၁၉) ဂှ် ဒပ်ကံၚ်ဇြဳပၞာန် ပါဲနူကၟာတ်ဒၞာဂၠိုက်ဂၠာဲစၟဳစၟတ် ပ္ဍဲကဵုဒၞာဲလုပ်တိတ်ဍုၚ်ရေဝ် ကေုာံ ဒၞာဲဂၠံၚ်သွာၚ်တအ်တုဲ မၞိဟ်တြုံၜါတၠဍိုက်အာကွဳလိုန်ဓာတ်မွဲစွံတအ်လေဝ် ရပ်ကေတ်ဒၟံၚ်ရ။
အတိုၚ်ညးဒေသတအ် ဟီုလဝ်မ္ဂး ပြဟ်ဟ်ဏံ ဟိုတ်နူမၞိဟ်တြုံ (၂) တၠ ဍိုက်အာကွဳလိုန်ဓာတ်မွဲစွံတုဲ ညးဒေသ ဂၠိုၚ်စှ်ော ဒးဒုၚ်ရပ်လဝ်တုဲ ကွဳလိုန်ဓာတ်မွဲဖ္ဍိုက်မ္ဂး ဒးဒုၚ်အာတ်မိက်ကေတ်ဒၟံၚ် သြန်ဗၞတ်ၜါကိုတ်ဒ္ကေဝ်ရဂှ် ဟီုလဝ်ရ။
ဟိုတ်နူကောန်ဒပ်ကံၚ်ဇြဳပၞာန်တအ် ကၟာတ်လဒဵုစၟဳစၟတ်တုဲ ညးဍုၚ်ကွာန်တအ်ဂှ် သွက်ဂွံအာကၠုၚ်အကြာဂၠံၚ် ဒှ်ဒၟံၚ်အခက်ခုဲတုဲ ဟိုတ်နူဒးဒုၚ်ပန်ပှော် နွံမာန်ဒၟံၚ်ဂှ်ရ ပရေၚ်ဒှ်ဓဝိၚ်ဂွိၚ်ဂွာဲ ဂၠိုၚ်တိုန်ဒၟံၚ်ရဂှ် ညးဒေသတအ်ဟီုလဝ်ရ။
ပ္ဍဲပွိုၚ်ဍုၚ်ရေဝ် ပတေၚ်ဂြတ်လဝ်ပရေၚ်ဂီုကၠီုဂှ် ပ္ဍဲကဵုဂိတုသေပ်တေမ်ဗာ တုဲကၠုၚ်တေံကဵု ဂိတုအံက်တဝ်ဗာလၟုဟ်ဏံ ပါလုပ်သီုဗိုလ်ဇၞော် ဒပ်ကံၚ်ဇြဳပၞာန်မွဲတၠ၊ ဂအုပ်ဗၠာဲသၟိၚ် မွဲတၠ၊ သ္ကိုပ်က္ဍိုက်က္ဍိုပ် မွဲတၠ၊ သ္ကိုပ်အုပ်ဓုပ် မွဲတၠ ဟွံအောန်နူ (၆) တၠ ဒးဒုၚ်ပန်ဂလစိုလဝ်ရ။
ပ္ဍဲပွိုၚ်ဍုၚ်ရေဝ် ဇြဟတ်ချဳဒရာၚ် ဂကောံဇြဟတ်ပၠန်ဂတးတအ် ခိုဟ်ဒၟံၚ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ ၂ တေံဂှ် ကံၚ်ဇြဳပၞာန် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်တုဲ လလောၚ်ပ္တိတ်လဝ် အသံအမိၚ်ဒေသန္တရ စေဝ်ပၞောန်တေၚ်တေၚ်ဂြတ်တ်ရ။
ပရိုၚ် – သြၚ်လောန်တိုၚ်မ်
ဗီု – Social Media
sanlontai