ပ္ဍဲနာတ်တလေန် ဒပ်ကံၚ်ဇြဳပၞာန်ထ္ပက်ကၠုၚ်ကရောၚ်ပၞာန် သီုဒေၚ်ဒုၚ်ဒၞာမၞိဟ် ဒးဒုၚ်ဗတိုက် ဒးချိုတ်လဝ် (၆)တၠ

နာတ်တလေန် – အံက်တဝ်ဗာ (၂၀)

ရးဗဂေါ၊ ခရိုၚ်သာယာဝတဳ ပ္ဍဲပွိုၚ်ဍုၚ်နာတ်တလေန်ဂှ် ကၠောန်သ္ပလဝ်ဒေၚ်ဒုၚ်ဒုၚ်ဒၞာမၞိဟ်တုဲ ဒပ်ကံၚ်ဇြဳပၞာန် ထ္ပက်လုပ်ကၠုက်ရောၚ်ပၞာန်ဂှ် ဟိုတ်နူဒပ်ပံၚ်ကောံ ဒပ်ပၞာန်စဵုဒၞာညးဍုၚ်ကွာန် (PDF) ခရိုၚ်သာယာဝတဳ ဗတိုက်လဝ်တုဲ ဒးချိုတ်လဝ် (၆)တၠရဂှ် PDF – ဗဂေါ လလောၚ်တြးလဝ် ပရိုၚ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၁၇)တုဲကၠုၚ်တေံ တံဒပ် – PDF ၃၈၀၁၊ ဒပ်လ္ပာ် – ၂ (Phoenix DF) တအ် ဗတိုက်လဝ် (၃)ဝါ ပေၚ်ၚ်ရ။

ဒပ်ကံၚ်ဇြဳပၞာန် ကော်ရပ်နၚ်လဝ် ဂကောံသ္ၚိကၟိန်ဇြေန်ဝိုၚ် သီုစိၚ် (၁၈)ဖ္ဍိုက် နဒဒှ်ဒေၚ်ဒုၚ်ဒၞာမၞိဟ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

အခိၚ် ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် ဗတိုက်လဝ်ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ် ဟိုတ်နူဒးပါဲဓလေတ်ဗတိုက်လဝ် စိၚ် ကေုာံဂကောံသ္ၚိကၟိန်ဇြေန်ဝိုၚ် ဒးဒုၚ်ရပ်ကော်ကေတ်နၚ်လဝ် နဒဒှ်ဒၞန်တအ်ဂှ်ရ ဗတိုက်လဝ်သီုဖအိုတ် ဟွံမာန်တုဲ စိၚ် ကေုာံ ဂကောံသ္ၚိကၟိန်ဇြေန်ဝိုၚ်တအ်လေဝ် ဇီုကပိုက်ဒးလဝ်ဘဲဝပ်ညိည နွံမာန်ရဂှ်ဟီုလဝ်ရ။

ၜိုန်ရကြတ်ဗတိုက်လဝ်ဒပ်ကံၚ်ဇြဳပၞာန်လေဝ် ညံၚ်ပရေၚ်ဇီုကပိုက် ပ္ဍဲကဵုဒပ်စဵုဒၞာညးဍုၚ်ကွာန်တအ် ဟွံဂွံဒှ် ဆုတ်တိတ်လဝ် ဗွဲမအံၚ်ဇၞးမာန်ရဂှ်လေဝ် ကဵုလဝ်သမ္တီရ။

ဟိုတ်နူပေါဲဗတိုက် သ္ကာတ်မြဟ် ဆက်က္တဵုဒှ်ကၠုၚ်မာန်ဒၟံၚ်ဂှ်ရ နကဵုညးဍုၚ်ကွာန်တအ် ပွမမံၚ်ဗ္ဒာဲ ကောန်ဒပ်ကံၚ်ဇြဳပၞာန်၊ ကရောၚ်ပၞာန်တအ်ကီု ပွမအာကၠုၚ် မွဲကရောံဍေံတအ်ကီု ညံၚ်ဟွံဂွံကၠောန်သ္ပဂှ်လေဝ် တံဒပ် PDF (၃၈၀၁)၊ ဒပ်လ္ပာ် – ၂ Phoenix DF ဟီုလဝ်ရ။

ပရိုၚ် – သြၚ်လောန်တိုၚ်မ်

ဗီု – Bago – PDF