ပ္ဍဲမတ်မလီု၊ ထ္ၜးဟိုတ်ပရေၚ်ဂီုကၠီု လုပ်စၟဳတ်စရၚ်ကၟုဲတုဲ ဘပဠ အာတ်မိက်ဒၟံၚ်သြန်

မတ်မလီု၊ အံက်တဝ်ဗာ (၂၀)

ပ္ဍဲတွဵုရးဍုၚ်မန်၊ ဍုၚ်မတ်မလီုဂှ် သ္ပပ္တံနူ သတ္တာဟပထမဏံတုဲ ဂကောံဒပ်ဗၠာဲသၟိၚ်ကံၚ်ဇြဳပၞာန်တံကဵု ဂကောံပရေၚ်အုပ်ဓုပ်တံဂှ် ကြဴနူထ္ၜးဟိုတ်ပရေၚ်ဂီုကၠီုလုပ်စၟဳတ်စရၚ်ကၟုဲတုဲဂှ် ကၠောန်သ္ပမံၚ် ပွဘပဠအာတ်မိက်ဒၟံၚ်သြန်ရဂှ် ကောန်ဍုၚ်မတ်မလီုတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ဂကောံပံၚ်ကောံကံၚ်ဇြဳပၞာန်တံဂှ် ပ္ဍဲအရာပ်မၞုံလ္တူဍုၚ်မတ်မလီုတံဂှ် နကဵုတၚ်ထ္ၜးဟိုတ်ပရေၚ်ဂီုကၠီု ဂကောံဇြဟတ်ပၠန်ဂတး PDF တံ လုပ်စိုပ်အောပ်မာမာန်မံၚ်သ္ဂးတုဲ ကၠောန်သ္ပကၠုၚ် ပွစၟဳတ်စရၚ်ကၟုဲတံ အဆက်က်ရ။

အခိၚ်စၟဳတ်စရၚ်ကၟုဲဂှ် လၟိဟ်မၞိဟ်မၞုံပ္ဍဲသ္ၚိတံဂှ် ဗ္ကိတ်စၟဳတ်ကုစရၚ်ဂကောံသ္ၚိကၟိန်ကီု၊ ဟွံတေၚ်စရၚ်ကၟုဲမွဲသာ် မံၚ်ဒၟံၚ်ပ္ဍဲသ္ၚိတံဂှ် ယဝ်ရစၟဳတ်ဆဵုဒးမ္ဂး ရပ်ဒက်တုဲ ကၠောန်သ္ပမံၚ် ပွအာတ်မိက်သြန်ဂၠိုၚ်သၞောတ်ဗ္ၜတ်ရ။

“စရၚ်ကၟုဲဂှ်တှ်ေ သ္ၚိဍေံတံဟွံစှ်ေစိုတ်ဂှ် လုပ်စၟဳတ်ရ။ စၟဳတ် ဇၟာပ်သ္ၚိဟွံသေၚ်ပုဟ်။ ဥပမာ- သ္ၚိဟွံပြေပြံၚ်ကု က္ဍိုပ်သ္ၚိကၠံတံ၊ သ္ၚိဒှ်သံသယညိညတံ၊ ပ္ဍဲသ္ၚိ ဂကောံသ္ၚိကၟိန်မၞိဟ်ဍောတ်တ်နွံဂၠိုၚ်ဂှ် လုပ်စၟဳတ်ဒၟံၚ်ရ။ တုဲပၠန် သ္ၚိပြံၚ်ကၠုၚ်နူဒေသတၞဟ်ဟ်တံဂှ်တှ်ေ ဗွဲမဂၠိုၚ် ခြာဟွံလအ်ဟွံလအ် လုပ်စၟဳတ်ဂၠိုၚ်ရ။ ယၟုဟွံပါ ပ္ဍဲစရၚ်ဂကောံသ္ၚိကၟိန်၊ ဟွံတေၚ်စရၚ်ကၟုဲသ္ဂးတုဲ ဟွံစောဲကုၝောံပိုဒ် စရၚ်ကၟုဲဂှ်မွဲသာ် စောဲကဵု (၁၈၈)တုဲတှ်ေ (၁၈၈)တှ်ေ ဖျေံအမိၚ်မွဲအလန်ဓဝ် ဂွံမံၚ်ရ။ ဟွံကဵုသြန်မ္ဂး ပိုဲကၠောန်ရသ္ဂးတုဲ ကၠောန်ကၠုၚ်နကဵုဗီုပြၚ်ဘပဠတှ်ေ မၞိဟ်တံ ဖေက်ကၠုၚ်တုဲ တေၚ်ကၠုၚ်စရၚ်ကၟုဲရ။ ဒးကဵုလှုဲရ။ ရပ်ဂွံမ္ဂးလေဝ် ဒးပညဳပြဟ်ဟ်တုဲ ၜိုတ်အာတ်ဂှ် ဒးကဵုဒၟံၚ်ရ” သာ်ဝွံ သ္ဂးရ။

ဟွံတေၚ်စရၚ်ကၟုဲမွဲသာ် မံၚ်ဒၟံၚ်ဂှ် ယဝ်ရစၟဳတ်ဆဵုဒးမ္ဂး ဂကောံပံၚ်ကောံကံၚ်ဇြဳပၞာန်တံဂှ် မွဲတၠမ္ဂး အာတ်နူမွဲကိုဋ် စဵုကဵု ပန်ကိုဋ်တုဲ ညးကဵုဟွံမာန်တံဂှ် မ္ၚးနူဥပဒေစရၚ်ကၟုဲဂှ် ကေတ်အရေဝ် ရေၚ်တၠုၚ်မံၚ် သီုကဵုအမှုဖံက်ပလီုအမိၚ်တိတ်ဗ္တံဟွံဂွံဂှ်ရ။

ဒၞါဲစၟဳတ်စရၚ်ကၟုဲတံဂှ်လေဝ် စွံအဓိကစၟဳတ်မံၚ် ပ္ဍဲအရာပ်မၞိဟ်မံၚ်ဂၠိုၚ်တံတုဲ ပ္ဍဲသ္ၚိ၊ ဗ္ဒမ်၊ အခန်ဇမၠိၚ်၊ ကောန်ကမၠောန်ဆုဲပြံၚ် လိၚ်မံၚ်စမံၚ်တံဂှ် စၟဳတ်မံၚ် ကြပ်အရိုဟ်ဒဒှ်တ္ၚဲရ။

သ္အာၚ်နူဂှ်ပၠန် နူကဵု CCTV ဗ္ဂပ်စုတ်လဝ် ပ္ဍဲဂၠံၚ်တံမွဲကဆံၚ် ကံၚ်ဇြဳပၞာန်တံ မၚ်ရံၚ်ကျောဝ်ဒၟံၚ် သ္ၚိဒၟံၚ်မၞိဟ်လုပ်တိတ်ဂၠိုၚ်တံတုဲ လုပ်စိုပ်စၟဳတ်စရၚ်ကၟုဲတုဲ ကၠောန်သ္ပမံၚ် ပွရပ်ဒက် သၟတ်ဟွံစှ်ေစိုတ်တံရဂှ် ကောန်ဍုၚ်တံ ဟီုသ္ဂးမံၚ်အိုတ်ရ။

ဥပဒေစရၚ်ကၟုဲ အလဵုအသဳပၞာန်ကၠာတေံ သုၚ်စောဲကၠုၚ်အဆက်က်တံဂှ် ဟိုတ်နူဟွံကိတ်ညဳကဵု အခေါၚ်အရာမၞိဟ် မစၞောန်ပျးလဝ်တံတုဲ ပ္ဍဲသၞာံ (၂၀၁၆)ဂှ် အလဵုသဳ (NLD) ရုပ်သီလဝ်ရ။

ဆ္ဂး ကြဴနူဒပ်ပၞာန်သီအဝဵု သၞာံ ၂၀၂၁တုဲဂှ် ကံၚ်ဇြဳပၞာန် ကလေၚ်ပၠုပ်လဝ်လမျီုကုဥပဒေစရၚ်ကၟုဲဂှ်တုဲ ဟွံတေၚ်စရၚ်ကၟုဲမ္ဂး ဒဏ်ထံၚ် (၇)တ္ၚဲကဵုဒှ်၊ ဒဏ်သြန် (၁၀၀၀၀)ဒ္ကေဝ်ကဵုဒှ် ဒုဟ်ဒဏ်သီုၜါဂကူ ဖျေံစၟတ်မာန်မံၚ်ရဂှ် လလောၚ်ပ္တိတ်လဝ်ရ။

ပရိုၚ်-သြၚ်လောန်တိုၚ်မ်

ဗီု-IPRD