နေပျဳဒဝ်၊ အံက်တဝ်ဗာ (၂၀)
ရုၚ်စက် ရုၚ်ကမၠောန်ကၟိန်ဍုၚ်ပိုၚ် ဒးဒေါံဇူလဝ်တအ်ဂှ် သွက်ဂွံကလေၚ်ဂေတ်လၟေၚ်ဍာံမာန်ကီု သီုသွက်ဂွံသုၚ်စောဲ တိဍာ်ကေတ်လဝ် ညံၚ်ဂွံဒှ်ဒတုဲဖိုလ်ဂှ် က္ဍိုပ်သ္ကိုပ်ပၞာန်သီအဝဵု ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ဟီုဂးကၠုၚ်ရ။
ပ္ဍဲကောံဓရီုကဝ်မတဳကေၚ်ကာပရေၚ်ပိုန်ဒြပ်ကံၚ်ဇြဳပၞာန် ကၠောန်ဗဒှ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၈)ဂှ် က္ဍိုပ်သ္ကိုပ်ပၞာန် ခါန်ကၞက်လဝ် ဇကုဇကု နဒဒှ်သ္ကိုပ်ဝန်ဇၞော်ကၟိန်ဍုၚ် ဟီုသ္ဂးလဝ်ရ။
က္ဍိုပ်သ္ကိုပ်ပၞာန်ဂှ် ပ္ဍဲလက်ထက်အလဵုအသဳတုဲကၠုၚ်တေံ ကမၠောန်ပရေၚ်ပိုန်ဒြပ် ဌာနဝန်ဇၞော်တအ် ဓမံက်ရုပ်ရဴ ကၠောန်ရေၚ်တၠုၚ်ဒၟံၚ်လ္ၚဵုတအ်ဂှ် ဒးဒေါံဒေၚ်လဝ်တုဲ က္တဵုဗဒှ်ကဵုလျိုၚ်ဝန် သွက်ကၟိန်ဍုၚ်ရဂှ် စောတ်စောဲဟီုဂးလဝ်ရ။
ဆ္ဂးပ္ဍဲကဵုလက်ထက်ညးမ္ဂး ရုၚ်စက် ကေုာံ ကမၠောန် ထေက်ကဵုဒးဗ္ဂေတ်တအ်လ္ၚဵုဂှ် ညံၚ်ဂွံကလေၚ်ဂေတ်အာမာန် ရေၚ်တၠုၚ်လဝ်တုဲ ပ္ဍဲကဵုရုၚ်စက် ရုၚ်ကမၠောန်ဒးဒေါံဇူလဝ်တအ်ဂှ် ညံၚ်ဂကောံရေၚ်တၠုၚ်ကၠောန်ပ္တိတ်ကပေါတ်ဗၞိက်တအ် ဂွံကၠောန်ရေၚ်တၠုၚ်ပ္တိတ်မာန် နွံဒၟံၚ်ပၟိက်ရဂှ် က္ဍိုပ်သ္ကိုပ်ပၞာန်ဟီုလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သိုဝ်နိုၚ်ဂှ်မ္ဂး နကဵုကံၚ်ဇြဳပၞာန် ကမၠောန်ကၟိန်ဍုၚ်ပိုၚ်တအ်ဂှ် ဖန်ဖက်ဗဒှ်ဒၟံၚ် ဗီုပြၚ်ကြုက်တုဲ ပ္ဍဲမွဲလ္ပာ်ပၠန်ဂှ် ဟိုတ်နူပရေၚ်ပိုန်ဒြပ်ကၟိန်ဍုၚ် ဆုတ်စှ်ေဒၟံၚ်တုဲ ထ္ၜးဒၟံၚ်ဗီုပြၚ် လညာတ်သၠုၚ်ပ္တိုန်ဒၟံၚ် ကမၠောန် နွံဒၟံၚ်ပၟိက်တအ်ရဂှ် ပါ်ပါဲသ္ၚဳဂၠိပ်လဝ်ရ။
“ဍေံဂှ်တှ်ေ ဗီုပြၚ်ကြုက်ရလေဝ်။ သၠုၚ်ပ္တိုန်ပရေၚ်ပိုန်ဒြပ်ကၟိန်ဍုၚ်ပိုၚ်တအ် အရာဍေံမိက်ဂွံဒှ်ဂှ်ရ။ အကာဲအရာဇေတ်တ်တေံ ဗီုဂှ်ဟွံသေၚ်ပုဟ်။ ဟိုတ်ဖိုလ်ဂွံဟီုဂးကၠုၚ် ကိစ္စလၟုဟ်ဂှ်တှ်ေ အခိၚ်ပရေၚ်ပိုန်ဒြပ်ကၟိန်ဍုၚ်စှ်ေဒၟံၚ်ဏံ ညံၚ်ပရေၚ်ပိုန်ဒြပ်ကၟိန်ဍုၚ် ဂွံတဴတက်တိုန် ဒးသၠုၚ်ပ္တိုန် ကမၠောန်နွံဒၟံၚ်ပၟိက်တအ်ဂှ်ဏောၚ်။ သွက်ဂွံထ္ၜးဗီုပြၚ် လညာတ်ဓမံက်ဒၟံၚ်ရုပ်ရဴဂှ် ကၠောန်ဒၟံၚ် ကမၠောန်တအ်ဏံရ။ ပ္ဍဲသၟဝ်အကာဲအရာပရေၚ်ပိုန်ဒြပ်ကၟိန်ဍုၚ်ဗၟာ ခရိုဟ်ဆုတ်စှ်ေဒၟံၚ်ဂှ် ဒးကၠောန်ကမၠောန်တအ်ဏံ ညံၚ်ဂွံဂေတ်မာန်ဏောၚ် ဖန်ဖက်ဒၟံၚ်အာဘောဂဍေံတအ်ရ”ဂှ် ညးဟီုလဝ်ရ။
ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ ပ္ဍဲလ္တူတိ အလဵုအသဳပိုၚ်ပြဳကီု၊ သီုပ္ဍဲကမၠောန်ပုဂ္ဂလိကပိုၚ်တအ်ဂှ် ဆုတ်ကလေၚ်စှ်ေဒၟံၚ် ဇၞော်ကဵုဇြဟတ်တုဲ ပ္ဍဲကဵုဒၞာဲပရေၚ်ဓလိုက်တံရိုဟ်ဍုၚ်သ္အာၚ်တအ် စ္ဍးတိတ်ဒၟံၚ် မွဲတုဲမွဲ ဒၞာဲသၠးက္တဵုဒှ်ဒၟံၚ်ရဂှ် ဥူတာန်သိုဝ်နိုၚ် ထံက်ထ္ၜးလဝ်ရ။
ပ္ဍဲမွဲလ္ပာ်ပၠန်ဂှ်လေဝ် ပ္ဍဲဍုၚ်ဇၞော်လဂုၚ် ဍုၚ်ပရေၚ်ပိုန်ဒြပ် လၟိဟ်မၞိဟ်တမ်ဍတ်ဒၟံၚ်ဂှ်လေဝ် ပ္ဍဲအကာဲအရာဒးကဵုဒၟံၚ်ပၟတ် နအပိုၚ်အခြာအခိၚ်ဂှ် လ္တူပရေၚ်ကၠောန်ရေၚ်တၠုၚ် ကမၠောန်အလဵုအသဳ ကေုာံပုဂ္ဂလိကတအ် ဆုတ်စှ်ေဒၟံၚ်ဂှ် သွက်ဂွံဓရိုဟ်ပ္တိုန်မာန် နကဵုအလဵုအသဳပၞာန် ဟွံလောဲသွာပုဟ်ဂှ် ညးဆက်ဟီုလဝ်ရ။
က္ဍိုပ်သ္ကိုပ်ပၞာန်ဂှ်မ္ဂး သွက်ဂွံရေၚ်တၠုၚ် ပရေၚ်ကၠောန်ပ္တိတ်ဗၞိက် နွံဒၟံၚ်ပၟိက် သွက်ပ္ဍဲဍုၚ် ပၟိက်နွံဒၟံၚ်တုဲ အခိၚ်ဒးကၠောန်ရေၚ်တၠုၚ်ဗီုဏံ ညံၚ်ဂွံကၠောန်ရေၚ်တၠုၚ်အာ သွာၚ်အလဵုအသဳ ကေုာံသွာၚ်မပ္တံကဵုပုဂ္ဂလိကဂှ် နွံဒၟံၚ်ပၟိက်ရဂှ် ဟီုလဝ်ရ။
ပ္ဍဲကဵုပရေၚ်ပိုန်ဒြပ်ကၟိန်ဍုၚ်ပိုၚ်တအ်ဂှ် ဒှ်ပရေၚ်ကၠောန်ပ္တိတ်ဓာတ်လလဳ၊ ပရေၚ်ပလံၚ်ဗစိုပ်ဂၠံၚ်ဍာ်အပ္ဍဲဍုၚ်၊ ကွဳပၟတ်ကၟိန်ဍုၚ်ဗၟာ၊ ပရေၚ်ပလံၚ်ဗစိုပ်ဂၠံၚ်ဍာန်ကုန်၊ ပရေၚ်ဆက်စၠောံကၟိန်ဍုၚ်ဗၟာ၊ ကမၠောန်ကွတ်စက်အဇာဇၞော် နူကဵုစၟတ်(၁) စဵုကဵုစၟတ်(၃) ကေုာံ လာၚ်ယာဉ်ကျာကောန်ဂကူကၟိန်ဍုၚ်ဗၟာတအ်ရ။
သ္အာၚ်နူဂှ်ပၠန် ကြဴဴနူဒပ်ပၞာန်သီကေတ်အဝဵုတုဲ သ္ကုတ်လကြဴဏံ ပၞောဝ်ကဵုကမၠောန်ပရေၚ်ပိုန်ဒြပ်ကၟိန်ဍုၚ်ပိုၚ် ဇၟောဝ်သြန်ဍုၚ်သ္အာၚ် ဇွောဝ်လုပ်ဒၟံၚ် ပ္ဍဲကံၚ်ဇြဳပၞာန်လၟိဟ်ဂၠိုၚ်ဂၠေၚ်တအ်ဂှ် ကမၠောန်ပရေၚ်သွံရာန်ကၠေၚ်ဍေန်ဗၟာ ကေုာံ သၟုဟ်ဓာတ်သဘာဝ၊ ကမၠောန်ဗ္ကောဝ် ကေုာံကမၠောန်တၟံရတ်ကၟိန်ဍုၚ်ဗၟာတအ်လေဝ် ပါလုပ်ဒၟံၚ်ရ။
ပ္ဍဲကဵုဂှ် ကမၠောန်ဗ္ကောဝ် စၟတ် (၂) နွံသၟဝ်တဲ ဌာနဝန်ဇၞော်သယံဇာတ ကေုာံပရေၚ်ထိၚ်ဒဝ်ပွဳပွူသဘာဝဂှ်
ဥရောပသမဂ္ဂကေတ်လဝ်အရေဝ် ကၟာတ်လဒဵုလဝ်ရဂှ် လလောၚ်တြးလဝ် ပ္ဍဲဂိတုဂျူလာၚ် ဒုတိယသတ္တာဟ သၞာံ ၂၀၂၃ ဂှ်ရ။
ပရိုၚ် – သြၚ်လောန်တိုၚ်(မ်)
ဗီု – MOI
sanlontai