ယှာန်ဟိုၚ်၊ အံက်တဝ်ဗာ(၂၀)
ပရေၚ်ပဋိပက္ခ စဒှ်ကၠုၚ် နူပေါဲပၞာန်အေဿရေ-ဟာမာဿ သၠဲတိတ်ကၠုၚ် ဂွံညိၚ်ဝတ်အာဂှ် ထေက်ကဵုဒးသုၚ်စောဲ ဩဇာဇကုဏောၚ် ကြဴနူအမေရိကာန်ကဵုလဝ်ကသပ်တုဲဂှ် ပ္ဍဲသတ္တာဟဏံ ကလုတ်တၟေၚ်ကြုက် အာစိုပ် ပ္ဍဲလ္ပာ်ဗၟံက်သ္ကုတ်လ္ဒောဝ်ရောၚ်။
နကဵုအလဵုအသဳဗေဂျေန် ဗွဲတၟေၚ်မ္ဂး ပ္ဍဲကဵုသၞာံဏံ သ္ကုတ်ကၠာတေံဂှ် ကြဴနူလုပ်အကြာပ္ညဳပ္ညပ်ကဵုလဝ် အကြာတဳဟဳရာန်ကဵု ရဳယာဒ် တအ်ညးၜါ ဒှ်ဒၟံၚ်သၞ အခိၚ်လအ်လကာဖာတုဲဂှ် ရီုဗၚ်ကဵု ညံၚ်ပဋိပက္ခဂွံညိၚ်ဝတ်မာန်ရောၚ်ဂှ် အလဵုအသဳဝါယှေန်တာန် စၟဳပတှ်ေကေတ်လဝ်ရ။
အခိၚ်ပလေဝ်ပလေတ်ဒၟံၚ် သွက်ဂွံထ္ပက်ပၞာန် ပ္ဍဲဒေသသြၚ်ဂၚ်ဇမၠိၚ်ဂါဇာဂှ် “ပရေၚ်ပရဟ်ဒုၚ်ကေတ်အရေဝ်” လ္တူအေဿရေ ဒှ်ကၠုၚ်မာန်ဂှ်လေဝ် အဳရာန်ကဵုလဝ်သတိရ။
ပရေၚ်ပြဒ္ဒညာ ဂကောံဟေဿဘိုဝ်လာ ဖျေံသ္ဇိုၚ်လေတ်ဘနွောန် အဳရာန်ထ္ၜလဘာ်ကဵုဒၟံၚ်လကြဴ ကဵုအေဿရေတအ် ထပ်က္တဵုဒှ်ဂှ်လေဝ် ပရေၚ်ဒှ်ဓဝိၚ် မံက်တိုန်ကၠုၚ်ဒၟံၚ်ရ။
“ဂလာန်ပရိုၚ်ပိုဲဂှ် ညံၚ်ပဋိပက္ခဟွံဂွံသၠဲတိုန်ကၠုၚ် သွက်ဂွံတာဒၞာ ပိုဲနွံဒၟံၚ်ပၟိက်ဏောၚ် ပတှ်ေကေတ်လဝ်ရ။ ကြုက်ဂှ် သုၚ်စောဲဩဇာညးတအ်မာန်ဏောၚ်၊ လုပ်အသုၚ်ဏောၚ်ဂှ်လေဝ် ညး(အာန်တိုဝ်နဳ) ညာတ်ကေတ်လဝ်ရ” ဂှ် ညးမၞုံအခေါၚ်ဟီုဂး ဌာနပရေၚ်ဍုၚ်သ္အာၚ်အမေရိကာန် ဟီုလဝ်ရ။
ရန်ကဵုပရေၚ် ဝန်ဇၞော်ဍုၚ်သ္အာၚ်ဝါမ်ရိကဵု ဝန်ဇၞော်ဍုၚ်သ္အာၚ်အမေရိကာန်တအ် တက်လဝ်ကျာကဵုဖုၚ် ပ္ဍဲဂိတုအံက်တဝ်ဗာ စၟတ်တ္ၚဲ (၁၄) ဂှ်တုဲ ညးမၞုံအခေါၚ်ဟီုဂးဌာနပရေၚ်ဍုၚ်သ္အာၚ်အမေရိကာန် ဟီုသှ်ကဵုလဝ် သၟာပရိုၚ်တအ်ရ။
နကဵုကလုက်ကြုက် ဇြိုၚ်ဂျွောန်ဂှ် တၚ်ရန်တၟံ သွက်ဂွံအာစိုပ်ပ္ဍဲသ္ကုတ်လ္ဒောဝ်ဒိုဟ်ဗၟံက်ဂှ်မ္ဂး အရၚ်ဂွံပကောံပကေဝ် တၚ်တုပ်စိုတ်ကၟိန်ဍုၚ်နာနာကီု၊ ညံၚ်ပရေၚ်ဂၠာဲသၞ ဗော်သွးမဆေၚ်စပ်တအ် ဂွံဒေါံဒေၚ်အာကီု၊ ညံၚ်အကာဲအရာဂမၠိုၚ် ဂွံၜိုဟ်သြိုဟ်အာကီု၊ သွက်ဂွံဖန်ဗဒှ်အာ အကာဲအရာဂၠာဲသွဟ် အတိုၚ်ပရေၚ်ဍုၚ်ကွာန်ကီုရဂှ်လေဝ် ညးမၞုံအခေါၚ်ဟီုဂး ဌာနဝန်ဇၞော်ပရေၚ်ဍုၚ်သ္အာၚ်ကြုက် ဟီုလဝ်ရ။
လၟေၚ်တရဴကလုတ်ကြုက်ဇြိုၚ်ဂျွောန် လ္ပာ်ဗၟံက်သ္ကုတ်လ္ဒောဝ်ဂှ် ပ္ဍဲကဵုသတ္တာဟဏံ ၜိုန်ဒှ်မာန်ကီုလေဝ် အကာဲအရာလၟေၚ်တရဴ သောဲသောဲဗြောဲဗြောဲဂှ်မ္ဂး ဟွံဂွံတီကေတ်လဝ်ဏီရ။
Ref,AFP
sanlontai