ပ္ဍဲပေါဲဗ္တိုက်ရေဝ်ဂှ် ကောန်ဒပ်ကံၚ်ဇြဳပၞာန် ဟွံအောန်နူ (၁၅)တၠ ချိုတ်၊ သီဂိုၚ်ဂွံလဝ် သီုလွဟ်လက်နက်မကမ်

ရေဝ်၊ အံက်တဝ်ဗာ(၂၁)

တွဵုရးဍုၚ်မန်၊ ပွိုၚ်ဍုၚ်ရေဝ်၊ ပ္ဍဲပေါဲဗ္တိုက်ၜါလ္ပာ် က္တဵုဒှ်လဝ် ဗ္ဒါဲကွာန်ကြုၚ်လံၚ်တြေံ ကေုာံ ဒဒန်ဇၞော်ဍုၚ်ရေဝ်ဂှ် လ္ပာ်ကံၚ်ဇြဳပၞာန် ဟွံအောန်နူ (၁၅)တၠ ချိုတ်တုဲ သီဂွံလဝ် သီုကဵုလွဟ်လက်နက်မကမ်တံရဂှ် ဂွံတီကေတ် နူဂကောံဒပ် ဂကောံဇြဟတ်ပၠန်ဂတးဍုၚ်ရေဝ်တံရ။

ပ္ဍဲဂိတုအံက်တဝ်ဗာ စၟတ်တ္ၚဲ (၂၀) အခိၚ်နူဂယး ၜိုတ် (၆)နာဍဳဂှ် ဟိုတ်နူဂကောံပၠန်ဂတးတံ ဍိုက်ဗ္တိုက်လဝ် သၞေဟ်ကၚ်စၟဳတ် ဒဒန်ဇၞော်ဍုၚ်ရေဝ်ဂှ်ရ ပေါဲဗ္တိုက်ၜါလ္ပာ် က္တဵုဒှ်လဝ် ဗ္ဒါဲကဝက်နာဍဳရ။

ကြဴနူပေါဲဗ္တိုက်တုဲ အကြာဂကောံဇြဟတ်ပၠန်ဂတးပံၚ်ကောံ ကလေၚ်ဆုတ်ကၠုၚ်ဒပ်တံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက် ထပ်က္တဵုဒှ်လဝ် ဗ္ဒါဲကွာန်ကြုၚ်လံၚ်တြေံဂှ် လလအ်ပွိုၚ်ဗ္ဒါဲၜါနာဍဳရ။

ပ္ဍဲပေါဲဗ္တိုက်ဏံ လ္ပာ်ကံၚ်ဇြဳပၞာန် သၞာဲဒဴၜါတၠမပါလုပ် ဟွံအောန်နူကဵု (၁၅)တၠ ဇီုကပိုက်ချိုတ်လဝ်တုဲ မ္ၚးနူသေနာတ် (၁၂)ဒကိုအ်တုဲ မကမ်ကဵု ကပေါတ်ဆက်စပ်ကဵုပၞာန်တံဂှ်လေဝ် ဂကောံဒပ်ပၠန်ဂတးပံၚ်ကောံတံ သီဂိုၚ်မာန်လဝ်ရ။

ပ္ဍဲပေါဲဗ္တိုက်ၜါလ္ပာ်တံဂှ် လ္ပာ်ဒပ်ပၠန်ဂတးတံပံၚ်ကောံဂှ် ဒးပြဟ်လလုဲလဝ်ဟွံမွဲကီုလေဝ် ညးဇီုကပိုက်ကလိဂွံဝပ်ညိည နွံလဝ် ဗ္ဒါဲ (၁၀)တၠရဂှ် ညးတာလျိုၚ် ဂကောံဇြဟတ်ပၠန်ဂတး ပါလုပ်ပ္ဍဲပရေၚ်ချဳဒရာၚ်ပၞာန်ဂှ် မွဲတၠ ဟီုရ။

ပရေၚ်ချဳဒရာၚ်ပၞာန်ဏံဂှ် ကရောၚ်ပၞာန်ဒဝ်ဏ၊ ဒပ်ပၠန်ဂတးဍုၚ်မန် (MSRF)၊ ဂကောံဒပ်ဒမၠုက်ဍုၚ်ရေဝ် (YGF) ကေုာံ ဒပ်ပၞာန်ကွးဘာ (ABSDF)တံမပါလုပ် ဒပ်ပံၚ်ကောံ မဟာမိတ်ပၠန်ဂတးတံ ပံၚ်တောဲဗ္တိုက်လဝ်ရ။

ပ္ဍဲပေါဲဗ္တိုက်ၜါလ္ပာ်ဂှ် မၞိဟ်တြုံ ညးဒေသ ဒၟံၚ်ကွာန်ကြုက်လံၚ်ကွာန်တၟိမွဲတၠ အခိၚ်နွံဒၟံၚ်ပ္ဍဲသ္ၚိဒၟံၚ်ဂှ် ဟိုတ်နူဒးအာလဝ်မကမ် က္လိဂွံလဝ်ဝပ်ဂှ်ရ ချိုတ်အာလဝ်တုဲ မၞိဟ်တြုံမွဲတၠပၠန်ဂှ်လေဝ် ကလိဂွံလဝ် ဘဲဝပ်မကမ် ပ္ဍဲထာၚ်တဲရဂှ် ဂွံတီကေတ် နူညးဒေသတံရ။

မၞိဟ်တြုံဇီုကပိုက်ချိုတ်ဂျိုၚ် က္လိဂွံလဝ်ဝပ်ၜါတၠတံဂှ် နကဵုအရီုဗၚ်ဂကောံရီုဗၚ်ပရေၚ်မၞိဟ်ဍုၚ်ရေဝ် ပလံၚ်ဗ္စိုပ်ဏာလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ်ရ။

တုဲကၠုၚ်ပ္ဍဲဂိတုအံက်တဝ်ဗာ စၟတ်တ္ၚဲ(၁၇)ဂှ်လေဝ် ပ္ဍဲကွာန်ဇြာန်ပျ၊ ပွိုၚ်ဍုၚ်ရေဝ်ဂှ် ပေါဲဗ္တိုက်က္တဵုဒှ်လဝ်တုဲ ပရေၚ်ဇီုကပိုက်ချိုတ်ဂျိုၚ်ၜါလ္ပာ်တံ နွံလဝ်ရ။

ပရိုၚ်-သြၚ်လောန်တိုၚ်မ်

ဗီု-PDF