ဍာ်ဗု၊ အံက်တဝ်ဗာ (၁၂)
ရးဒေသဇၞော်တၞၚ်သြဳ၊ ပ္ဍဲပွိုၚ်ဍုၚ်ဍာ်ဗု နူကဵုဒပ်ကံၚ်ဇြဳပၞာန် ဟိုတ်နူထ္ပက်လုပ်ကၠုၚ်ကရောၚ်ပၞာန် နဇြဟတ်ပေၚ်ၚ်တုဲ ညးဒေသတအ် ဂၠိုၚ်ကဵုလ္ၚီ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ်နူညးပါဲဘဲပၞာန်ကီု သီုကဵုဂကောံဇြဟတ်ပၠန်ဂတးတအ်ရ။
သ္ပတံနူဂိတုအံက်တဝ်ဗာ စၟတ်တ္ၚဲ (၁၉) တေံတုဲ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၂၀၀) ပြၚ် ပါလုပ်ဂှ် ပါ်လဝ် (၃) ကရောၚ်ပၞာန်တုဲ ထ္ပက်ပၞာန် လုပ်ကၠုၚ်ပ္ဍဲပွိုၚ်ဍုၚ်ဍာ်ဗုရ။
ဟိုတ်နူထ္ပက်လုပ်ကၠုၚ်ကရောၚ်ပၞာန်တုဲ ညးဒေသ နူကွာန်မပ္တံကဵု ဨကနိ၊ ခမောက်ချောၚ်၊ ဝေတ်ချောၚ်၊ ဝါဇြောန်တဝ်၊ ယလိုၚ်၊ ပုဂေါဇြောန်၊ မူဒူ ပွိုၚ်ဍုၚ်ဍာ်ဗုတအ် ၁၀၀၀ ပြၚ် ဒးထပ်ဂြိပ်ဒဴပါဲဓလေတ်ဒၟံၚ် ဒၞာဲဗၠးဘဲတအ်ရ။
အခိၚ်ကရောၚ်ပၞာန် ကံၚ်ဇြဳပၞာန်လုပ်ကၠုၚ်ဂှ် ပေါဲဗတိုက်ၜါလ္ပာ် ဒှ်လဝ် ဗ္ဒာဲဒဒန်တာဲကၚ်တုဲ ဆက်လ္ၚတ်ဂၠိုက်ဂၠာဲဒၟံၚ် ပရေၚ်ဇီုကပိုက်ချိုတ်ဂျိုၚ်ဖိုဟ်ရဂှ် ညးတာလျိုၚ်ဒပ်စဵုဒၞာပွိုၚ်ဍုၚ်ဍာ်ဗုမွဲတၠဂှ် ဟီုရ။
ကရောၚ်ပၞာန်ကံၚ်ဇြဳပၞာန်ဂှ် တ္ၚဲဏံ ဂိတုအံက်တဝ်ဗာ စၟတ်တ္ၚဲ (၂၀) အခိၚ်နူဂယးဂှ် စိုပ်ကၠုၚ် လ္ပာ်ကွာန်မူဒူတုဲ ပန်ဂစိုတ်ဏာလဝ် မၞိဟ်တြုံတိတ်အာသွံဖျာ (၁) တၠတုဲ ညးဒေသ (၃) တၠဂှ်လေဝ် ရပ်ကေတ်ဏာလဝ်ရဂှ် ၜိုန်ညးဒေသတအ် ဟီုလဝ်ကီုလေဝ် နကဵုသြၚ်လောန်တိုၚ်မ် သ္ပဒ္တန်တၞဟ်ခြာဟွံမာန်ဏီရ။
ညးဒေသဒးဂြိပ်ဒဴပါဲဓလေတ်ဒၟံၚ်တအ်ဂှ် ဒှ်ညးပါဲဘဲပၞာန် ပ္ဍဲကဵုဂိတုအံက်တဝ်ဗာ သတ္တာဟပထမဂှ်ဟေၚ် ဂွံကလေၚ်စဴကၠုၚ်လဝ် ဌာန်ဒၟံၚ်ညညးသ္ကအ်တုဲ ဟိုတ်နူကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ဒးထပ်ဂြိပ်ဒဴတိတ်ဒၟံၚ်ပၠန်ရ။
အတိုၚ်တၚ်လလောၚ်တြး ဂကောံသုတေသန FE5 Tanintharyi မ္ဂး ပ္ဍဲဂိတုသေပ်တေမ်ဗာ တုဲကၠုၚ်တေံ ပေါဲဗတိုက်ၜါလ္ပာ် ဒှ်လဝ်ပ္ဍဲရးတၞၚ်သြဳ ဟွံအောန်နူ (၅၀) ဝါနွံတုဲ ဟိုတ်နူပေါဲဗတိုက်တအ်ဂှ် ညးဒေသ ၄၅,၀၀၀ ပြၚ် ဒးပါဲလဝ်ဘဲပၞာန်ရဂှ် လလောၚ်တြးလဝ် ပ္ဍဲဂိတုအံက်တဝ်ဗာစၟတ်တ္ၚဲ (၁၁)ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai