ဗိက်၊ အံက်တဝ်ဗာ (၂၂)
ရးဒေသဇၞော်တၞၚ်သြဳ၊ ပွိုၚ်ဍုၚ်ဗိက်၊ ၜိုန်ရလုပ်စိုပ်ဗတိုက်လဝ် ဗဒိုက်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲကွာန်တုမ်ဗျဝ်ဂျဳဂှ်ကီုလေဝ် အခိၚ်ကြပ်သီဂွံဗဒိုပ်ဂှ် ဟိုတ်နူမကမ်ဟွံရုပ်မ်ဂပ်တုဲ ဒးကလေၚ်ဆုတ်တိတ်လဝ်ရဂှ် ဂွံတီကေတ် နူဒပ်စဵုဒၞာဒေသတအ်ရ။
ဗဒိုပ်တုမ်ဗျဝ်ဂျဳ ဖျေံလဝ်ဗဒိုပ်ဇြဟတ် ၂၀ ပြၚ်ဂှ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၂၀) အခိၚ်နူဂယး ၜိုတ် (၅) နာဍဳ ပါလုပ်သီု ဒပ်ပၞာန်ဗၠးၜးကောန်ဂကူကရေၚ် KNU ဂကောံဇြဟတ်ပၠန်ဂတးပံၚ်ကောံတအ် က္ဍိုက်ဗတိုက်လဝ်ရ။
ဟိုတ်နူပရေၚ်ဗတိုက်ပန်ဏံတုဲ ပေါဲဗတိုက်ၜါလ္ပာ် ဒှ်လဝ် (၂) နာဍဳပြၚ်တုဲ လ္ပာ်ကံၚ်ဇြဳပၞာန် ဟွံအောန်နူ (၁၀) တၠ ၜိုန်ဒးချိုတ်လဝ်ကီုလေဝ် ဟိုတ်နူမကမ်ဟွံရုမ်တုဲ သီုသီကေတ်ဗဒိုပ်ဟွံမာန်မွဲသာ် ဒးကလေၚ်ဆုတ်တိတ်လဝ်ရဂှ် ဂွံတီကေတ် အတိုၚ်သ္ဂံၚ်ပါလုပ် ပ္ဍဲဗလးမုက်တိတအ် ဟီုလဝ်ရ။
ကြဴဴနူပရေၚ်ဒဒှ်ဏံ ဒှ်တုဲ ရေၚ်ယာဉ်ကွဳစက် ဇြဟတ်ဒပ် (၅၀) ပြၚ် ကၠုၚ်ကဵုပၞာန်ရီုဂှ် ဒးထပ်ဒုၚ်ဗတိုက်လဝ် ဗ္ဒာဲကွာန်မဇြဝ်တုဲ ဃောဆက်လ္ၚတ်ဂၠိုက်ဂၠာဲဒၟံၚ် အကာဲအရာပရေၚ်ဇီုကပိုက်ဒးလဝ်ရဂှ် ဟီုလဝ်ရ။
ကရောၚ်ပၞာန်ရီုဂှ် ကြဴနူစိုပ်အာဗဒိုပ်တုမ်ဗျဝ်ဂျဳ အခိၚ်ဇိုၚ်သဝ်တ္ၚဲတုဲဂှ် ပန်ပှ်ောဒၟံၚ်လွဟ်ဇၞော်အဆက်က်ရဂှ် ညးဒေသတအ် ဟီုလဝ်ရ။
ဗဒိုပ်တုမ်ဗျဝ်ဂျဳဂှ် ပ္ဍဲမွဲကာလဒပ်ပၞာန်သီအဝဵုဏံ ဒးဒုၚ်ဗတိုက်လဝ် ဟွံအောန်နူ (၄) ဝါတုဲ ပ္ဍဲပရေၚ်ဗတိုက်ပန်ဏံ လ္ပာ်ကံၚ်ဇြဳပၞာန် ဒးဂိဒၟံၚ်ရ။
ပရိုၚ် – သြၚ်လောန်တိုၚ်မ်
ဗီု – ဒပ်စဵုဒၞာဒေသ
sanlontai