သွက် အဝ်သတြေလျ ဂွံပါလုပ် ပ္ဍဲပရေၚ်ပ္ကတ်ပ္ကေၚ်ပၞာန် ဂျပါန် ကော်ဘိက်

တိုဝ်ကျိုဝ်၊ အံက်တဝ်ဗာ(၂၁)

ကၟိန်ဍုၚ်ဂျပါန်ဂှ် ပ္ဍဲကဵုပရေၚ်ပ္ကတ်ပ္ကေၚ်ပၞာန် ညးတအ်ကဵု အမေရိကာန် ၜါတန်ဂှ် နဒဒှ်အလန်ပထမကိုပ်ကၠာ ကော်ဘိက်လတ် အဝ်သတြေလျရဂှ် အလဵုအသဳဂျပါန် ဟီုလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၉) ဂှ်ရ။

ဝန်ဇၞော်ပရေၚ်စဵုဒၞာဂျပါန် မဳနိုဝ်ရူကဳဟာရာဂှ် ပ္ဍဲကဵုပေါဲသဳကၠဳ ကၠောန်ဗဒှ်လဝ် ပ္ဍဲတိုဝ်ကျိုဝ် ညးမသဳကၠဳကရောံညး ဝန်ဇၞော်ပရေၚ်စဵုဒၞာ အဝ်သတြေလျ ရေစ်ချေတ်မာလေစ်ဂှ် ဒဒှ်ရသဳကၠဳလဝ် ပရေၚ်အဝ်သတြေလျဂွံပါလုပ်ဂှ် ဟီုဂးလဝ်ရ။

နဒဒှ်ပရေၚ်ပ္ကတ်ပ္ကေၚ်ပၞာန်ပထမကိုပ်ကၠာ ဂိတုနဝ်ဝေမ်ဗာဂှ် ကေန်မ်အေအ်ချ် မဒှ်ပရေၚ်ပ္ကတ်ပ္ကေၚ်ပၞာန် ဒုတိယ ဒပ်စဵုဒၞာဂျပါန်အပိုၚ် (SDF)၊ ဒပ်ပၞာန်အမေရိကာန်ဂှ်မ္ဂး စဳဇန်လဝ် သွက်ဂွံကၠောန်ဗဒှ် ပ္ဍဲဂိတုဖေဖဝ်ဝါရဳတုဲ SDF ကဵုကောန်ဒပ်မရုၚ်အမေရိကာန်တအ် ပါလုပ်ရောၚ် ဂွံတီကေတ်ရ။

“ပိုဲဂှ် ပ္ဍဲသွာၚ်နာနာသီုဖအိုတ် သၠဲပ္တိတ်ဒၟံၚ် ပရေၚ်ပံၚ်တောဲရေၚ်တၠုၚ် ပရေၚ်စဵုဒၞာ မွဲစွံကဵုအဝ်သတြေလျရ။ တၚ်ရန်တၟံပိုဲဂှ် ပ္ဍဲကဵုအကာဲအရာကာမံက်တိုန် သွက်ဂွံပံၚ်တောဲရေၚ်တၠုၚ်အာ ညောန်န်ကြပ်ပ်မာန်ဟေၚ်ရ” ဂှ် ဝန်ဇၞော်ပရေၚ်စဵုဒၞာဂျပါန် ဟီုလဝ်ကဵု သၟာပရိုၚ်တအ် အခိၚ်ကောံဓရီုတုဲဒှ်ဂှ်ရ။

ပ္ဍဲကဵုပရေၚ်ဖောအ်ဗြေဝ်တဴတက်ကပေါတ်ကြိယာဗာပၞာန် ၜါကၟိန်ဍုၚ်ဂှ်လေဝ် သွက်ဂွံပံၚ်တောဲရေၚ်တၠုၚ်အာဂှ် တုပ်လဝ်စိုတ်ညးသ္ကအ်ရ။

ပ္ဍဲတၚ်အဝ်သတြေလျ လလောၚ်တြးလဝ်ဂှ်လေဝ် ဒဒှ်ရဒုၚ်တၠုၚ် ပရေၚ်ဆက်ဆောံဆေၚ်ကဵု ပရေၚ်ဂီုကၠီု ဂျပါန်ကဵု အဝ်သတြေလျဂှ် ဓမံက်ထ္ၜးလဝ်ရ။

“ကၟိန်ဍုၚ်ဒက်လဝ်မဟာမိတ် စှ်ေကိုန်ဗျူဟာ ၜိုတ်ဂျပါန် လ္တူဂၠးကဝ်ဏံ ကၟိန်ဍုၚ်လဵုဟၟဲဏီ။ ပိုဲတအ် သီုညးၜါဂှ် ဒှ်မဟာမိတ်ကၟိန်ဍုၚ်အမေရိကာန်ရ၊ ကဵုကၟိန်ဍုၚ်ကြုက် ပရေၚ်ကူသာန်ဗၞိက်ယှုက်ထုဲ ပရေၚ်ဆက်ဆောံနွံဒၟံၚ်တုဲ အကြာပိုဲကဵုပိုဲဂှ်လေဝ် ပရေၚ်ဆက်ဆောံ ဇြိုဟ်နက် နွံဒၟံၚ်ရ” ဂှ် မာဿတာ မာလေစ် ဟီုဂးလဝ်ရ။

ဂျပါန်ကဵုအဝ်သတြေလျ သီုၜါကၟိန်ဍုၚ်ဂှ် စပ်ကဵုပရေၚ်ဇြဟတ်ဒပ်ပၞာန်ကြုက် ဇၞော်ဂေါဝ်ကၠုၚ် ပ္ဍဲဒေသကဵု သွက်ဂွံထိၚ်ဒဝ်ထိုၚ်ဝါန် ပေကျေန်သုၚ်စောဲကၠုၚ်ဇြဟတ်မာန်ဂှ်တုဲ ဒှ်ဒၟံၚ်ဓဝိၚ်ညးသ္ကအ် သီုၜါဍုၚ်ရ။

Ref: The Straitstimes