ပ္ဍဲတွဵုရးဍုၚ်မန် ပေါဲဗ္တိုက် သ္ကာတ်မြဟ်ကၠုၚ်မာန်ဂှ်ရ စွံသတိဗွဲတၟေၚ်တုဲ မံၚ်စံၚ်အိုတ်ညိဂှ် ဂကောံဇြဟတ်ပၠန်ဂတးတံ ဖ္တိုက်ဖ္အောဝ်

မတ်မလီု၊ အံက်တဝ်ဗာ(၂၁)

ပ္ဍဲတွဵုရးဍုၚ်မန်ဂှ် သ္ပပ္တံနူရာသဳကညၚ် ကၠုၚ်စိုပ်ဂတဏံတုဲ ပေါဲဗ္တိုက်ၜါလ္ပာ် သ္ကာတ်မြဟ်ကၠုၚ်မာန်မံၚ်ဂှ်ရ နကဵုညးဍုၚ်ကွာန်တံဂှ် သွက်ဂွံစွံသတိတုဲ မံၚ်စံၚ်အိုတ်ဂှ် ဂကောံဇြဟတ်ပၠန်ဂတး ဖျေံသ္ဇိုၚ်တွဵုရးတံ ဖ္တိုက်ဖ္အောဝ်လဝ်ရ။

အလဵုသဳညဳသၟဟ်ဂကူ (NUG) ဂှ် သၞာံ ၂၀၂၃ ဏံ စၟတ်လဝ် နဒဒှ်သၞာံ ကဵုသ္ဂုတ်သွာတ်ပရေၚ်ပၠန်ဂတးတုဲ ဂကောံဇြဟတ်ပၠန်ဂတး မပါလုပ် PDF တံလေဝ် ပ္ဍဲရာသဳကညၚ်ကၠုၚ်စိုပ်ဏံ သွက်ဂွံဝေၚ်ပရေၚ်ပြုပြေၚ်ပၞာန်ဂှ် ကၠောန်သ္ပမံၚ် ပရေၚ်ဒစးဒုၚ်ပလေဝ်ပလေတ်တံရ။

မွဲလ္ပာ်ဂှ်တှ်ေ ကံၚ်ဇြဳပၞာန်ဂှ်လေဝ် သွက်ဂွံကလေၚ်ပၠန် ပွဗ္တိုက်ဂကောံဇြဟတ်ပၠန်ဂတးတံဂှ် ပ္ဍဲတမ်ဒပ်၊ ဗ္ဒိုပ်ဒပ်ဆေၚ်စပ်တံဂှ် သၠုၚ်ပ္တိုန်လဝ် ပွဗ္ဂပ်စုတ်လွဟ်ဇၞော်၊ ပွပလေဝ်ပလေတ် ပရေၚ်ပၞာန်တံဂှ်ရ။

ညးတာလျိုၚ်ခရိုၚ်သဓီု ကိုဝ်အေမေန်ထောန်ဂှ်တှ်ေ ပ္ဍဲရာသဳကညၚ်ဏံ သွက်ဂွံသၠုၚ်ပ္တိုန်အသိၚ်ပရေၚ်ပၞာန်မာန်ဂှ် နကဵုညးဍုၚ်ကွာန်တံ မ္ၚးနူဒစးဒုၚ်ပလေဝ်ပလေတ်ဂှ် ညံၚ်ဟွံဂွံမံၚ် ကြပ်ဂကောံဒပ်ကံၚ်ဇြဳပၞာန်တံဂှ် ဖ္တိုက်ဖ္အောဝ်လဝ်ရ။

“ပ္ဍဲရာသဳကညၚ်ဂှ်တှ်ေ ပိုဲတံ နကဵုပရေၚ်ပၞာန်ဂှ်တှ်ေ သွက်ဂွံသ္ကာတ်မြဟ်ကၠုၚ် နွံရ။ ဟိုတ်ဂှ်ရ နကဵုညးဍုၚ်ကွာန်တံဂှ်တှ်ေ ပ္ဍဲသ္ၚိဇကု၊ ကၠအ်ဇကုတံဂှ် သွက်ဂွံၜံက်လဝ် ကတိုၚ်ဥမၚ်၊ သွက်ဂွံကၠောန်လဝ် ပွစဵုဒၞါ ဗၠးဘဲမာန်တံ၊ တုဲပၠန် ညံၚ်ဟွံဂွံမံၚ်ကြပ်ပ်ကဵု ကံၚ်ဇြဳပၞာန်ကဵု ညံၚ်ဟွံဂွံအာကရပ်ကဵု ကွဳစက်ကံၚ်ဇြဳပၞာန်တံရ ဏး။ တံဏံ ပိုဲမိက်ဂွံဗ္ကန်ရ” သာ်ဝွံ သ္ဂးရ။

နကဵုညးဍုၚ်ကွာန်တံ ပ္ဍဲအရာအာကၠုၚ်တရဴတံဂှ်လေဝ် ညံၚ်ဟွံဂွံဒးဒုၚ်ကြေပ်အာ အကြာဂှ် စွံသတိတုဲ သွက်ဂွံအာကၠုၚ်အိုတ်ကီု ဒပ်ကံၚ်ဇြဳပၞာန်တံဂှ် ဟိုတ်နူကၠောန်သ္ပကၠုၚ် ဒေၚ်ဒုၚ်ဒၞါမၞိဟ် ကုညးဍုၚ်ကွာန်တံမာန်မံၚ်ဂှ်ရ ၜိုတ်သ္ပမာန် သွက်ဂွံဝေၚ်ပါဲအိုတ်ညိဂှ် ညးဆက်ဟီုရ။

ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် နာဲနဂါဂှ်လေဝ် ပ္ဍဲရာသဳကညၚ်ဏံ ဟိုတ်နူသ္ကာတ်မြဟ်ကၠုၚ်မာန်ဂှ်ရ ပ္ဍဲပေါဲဗ္တိုက် ဟိုတ်နူဒပ်ကံၚ်ဇြဳပၞာန်တံ ကၠောန်သ္ပကၠုၚ် ပွဗ္တိုက်ဂြာတ်ဗုံ နကဵုက္ၜၚ်ကျာတံ မာန်မံၚ်ဂှ်ရ သွက်ဂွံၜံက်လဝ် ကတိုၚ်ဥမၚ်ဂှ် ဖ္တိုက်ဖ္အောဝ်လဝ်ရ။

“စိုပ်ကၠုၚ်ရာသဳကညၚ်ဏံတှ်ေ ပေါဲဗ္တိုက် ပရေၚ်ပြုပြေၚ်ပၞာန်တံ သာတုဲ အသိၚ်သၠုၚ်တိုန်ကၠုၚ်ရ။ ကံၚ်ဇြဳပၞာန်ပကီုပရာပ်ဂှ်လေဝ် ပ္ဍဲဍုၚ်ဏံဂှ် လ္ဂောံကဵုပရေၚ်ဍုၚ်ကွာန်ဂှ် အခိၚ်ဂကောံဇြဟတ်ဒစဵုဒစးတံ ဟၟဲဂှ် သွက်ဍေံတံ ဂွံဆက်ထိၚ်အာအဝဵုဍေံတံမာန် သွက်ဂွံကၠောန်ဗဒှ်ပေါဲရုဲမာဲဏံ ဍေံတံ ဂစာန်ပလေဝ်ပလေတ်မံၚ် ဗွဲမပြဟ်ရ။ သွက်ဂွံကၠောန်ဗဒှ်ပေါဲရုဲမာဲဏံမာန် ဍေံတံဒးကၠောန် ပရေၚ်ပသောၚ်တိဍာ်ဏောၚ်၊ နကဵုသၞောတ်ဗ္ၜတ်ကၟိန်ဍုၚ်ဂှ် ပရေၚ်ပၞာန်တံဏံဂှ်တှ်ေ သာတုဲဒှ်ကၠုၚ် သ္ကာတ်တ်မြဟ်ဟ်ရောၚ်ဂှ် ပိုဲတံသ္ဇက်ဂွံဒှ်သံသယဗၠေတ်မှာ ဟွံမွဲရပုဟ် မိက်ဂွံဟီုရ။ တုဲပၠန် အတိုၚ်စရိုတ်ယုတ်မာ ကံၚ်ဇြဳပၞာန်ဂှ်ရ၊ ကျကၠုၚ်ပရေၚ်ပၞာန်တှ်ေ ဟွံသ္ပဂရု လမျီုကၠအ်သွဝ်ညးဍုၚ်ကွာန်တံမွဲသာ် ၜိုတ်သ္ပမာန် သွက်ဂွံစဵုဒၞါ နူပွဂြာတ်ဗုံနကဵုက္ၜၚ်ကျာတံဂှ် သွက်ဂွံကၠောန်လဝ် ဥမၚ်တံ၊ မြံၚ်တံ သွက်ဂွံပလေဝ်ပလေတ်လဝ်ညးသ္ကအ် မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။

ပြဟ်ဟ်ဏံလေဝ် သွက်ဂွံဗ္တိုက်ဂကောံဇြဟတ်ပၠန်ဂတးတံဂှ် ကံၚ်ဇြဳပၞာန် ပကောံပကေဝ်မံၚ် ဇြဟတ်လွဟ်ကေုာံ ဇြဟတ်မၞိဟ်တံတုဲ ပ္ဍဲအခိၚ်ခြာဟွံလအ်ဏံ ပေါဲဗ္တိုက်သ္ကာတ်မြဟ်ကၠုၚ်ရောၚ်တုဲ နကဵုညးဍုၚ်ကွာန်တံ သွက်ဂွံဒစးဒုၚ်ပကောံပကေဝ်လဝ် စၞစ၊ ဂဥုဲဇဗဂှ်လေဝ် ညးဆက်ဟီုရ။

သ္အာၚ်နူဂှ်ပၠန် ပ္ဍဲပေါဲဗ္တိုက်တံဂှ် ဒပ်ကံၚ်ဇြဳပၞာန်ကလိလောန်ကၠုၚ် ပွစံၚ်ပလီုပလာ်သ္ၚိဒၟံၚ်၊ ရပ်ဒက်ဂစိုတ်ဂယိုၚ် ညးဍုၚ်ကွာန်ကောန်အရာပ်တံ မာန်မံၚ်ဂှ်ရ ကရောၚ်ပၞာန်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်မ္ဂး သွက်ဂွံဆုဲပြံၚ်မံၚ်တန်တဴ ပ္ဍဲဒၞါဲဗၠးဘဲညးသ္ကအ်ညိဂှ် ဂကောံဇြဟတ်ပၠန်ဂတးတံ ဖ္တိုက်ဖ္အောဝ်လဝ်ရ။

ပ္ဍဲတွဵုရးဍုၚ်မန်ဂှ်တှ်ေ ပ္ဍဲကာလသီအဝဵုဏံ ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ကျာ်မြဟ်၊ ဇြပ်ဗု ကေုာံ ရေဝ်တံဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗ္တိုက်ဇီုမုက်တံ က္တဵုဒှ်မံၚ် မွဲဏှမွဲဏှရ။

ဟိုတ်နူပေါဲဗ္တိုက်တံဏံတုဲ ညးဒေသ ၜါကိုဋ်ပြၚ် ထောံလသာဌာန်ဒၟံၚ် ဒးဂြိပ်ဒဴဒၟံၚ်တုဲ ညးဍုၚ်ကွာန်ကောန်အရာပ် ဟွံအောန်နူ (၁၀၀) တၠ ဇီုကပိုက်ချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသနတံရ။

ပရိုၚ်-သြၚ်လောန်တိုၚ်မ်

ဗီု-Twitter