တၞၚ်သြဳ၊ အံက်တဝ်ဗာ (၂၂)
ရးဒေသဇၞော်တၞၚ်သြဳ၊ ပွိုၚ်ဍုၚ်တၞၚ်သြဳ၊ ကောန်ဂကောံရီုဗၚ်ဟံၚ်ပြာ်မၞိဟ် ချာန်မျေအ်ပါရမဳ ဖျေံသ္ဇိုၚ်ကွာန်သာရဘောၚ်မွဲတၠဂှ် ကြဴနူဒပ်ကံၚ်ဇြဳပၞာန် ရပ်ကေတ်ဏာတုဲ ဒးချိုတ်လဝ် ပ္ဍဲဒၞာဲစၟဳစၟတ်ရဂှ် ညးလုက်စုက်ကဵုဂကောံသ္ၚိကၟိန်ညးတအ် ဟီုကဵု ဌာန်ပရိုၚ် သြၚ်လောန်တိုၚ်မ်ရ။
ကိုဝ်အောၚ်ဂျဝ်နိုၚ် အယုက် ၂၈ ပြၚ်ဂှ် ပ္ဍဲကဵုဂိတုသေပ်တေမ်ဗာစၟတ်တ္ၚဲ ၃၀ တုဲကၠုၚ်တေံ အခိၚ်အာပလံၚ်မၞိဟ်ယဲကာတၟၚ် နူကွာန်သာရဘောၚ် ပလံၚ်ဗစိုပ်ရုၚ်ဂဥုဲဗိက်တုဲအခိၚ်စဴဴကၠုၚ်ဂှ် ဒပ်ကံၚ်ဇြဳပၞာန် ရပ်ကေတ်လဝ် ပ္ဍဲတၞုၚ်ဂၠံၚ်ဗိက်-တၞၚ်သြဳဂှ်ရ။
ကြဴနူဒးဒုၚ်ရပ်လဝ်တုဲ ပ္ဍဲဂိတုအံက်တဝ်ဗာ စၟတ်တ္ၚဲ ၁၇ ဂှ် ဒဒှ်ရကိုဝ်အောၚ်ဂျဝ်နိုၚ်ဒးချိုတ်အာဂှ် ဒပ်ကံၚ်ဇြဳပၞာန် ကဵုလဝ်ပရိုၚ် ဇရေၚ်ဂကောံသ္ၚိကၟိန်ညးရ။
ကြဴဴနူဂှ် ဇွကိုဝ်အောၚ်ကျဝ်နိုၚ်ဂှ် ညးမဒှ်မိညးမွဲဟေၚ် ဂွံအခေါၚ်ဗဵုတုဲ ဟွံကလေၚ်ကဵုဇွမွဲသာ် ဒပ်ကံၚ်ဇြဳပၞာန်စံၚ်ဂြးလဝ်ရဂှ် ဂွံတီကေတ်ရ။
အတိုၚ်ညးဒေသတအ်ဟီုလဝ်မ္ဂး ကိုဝ်အောၚ်ဂျဝ်နိုၚ်ဂှ် ဟွံပါလုပ် ပ္ဍဲကိစ္စပရေၚ်ဍုၚ်ကွာန်တုဲ ဟိုတ်နူဒှ်မၞိဟ်စိုတ်ဓာတ်ပရဟိတနွံ မွဲတၠတုဲ ဟွံကၠောန်ပရေၚ်ပိုန်ဒြပ် စွံအဓိကကဵု ကမၠောန်ရီုဗၚ်ဟံၚ်ပြာ်မၞိဟ်တုဲ ကၠောန်ဒၟံၚ်ရဂှ် ဟီုလဝ်ရ။
အတိုၚ်ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ်မ္ဂး ပ္ဍဲရးဒေသတၞၚ်သြဳဂှ် ပ္ဍဲမွဲကာလသီအဝဵုဏံ ဟိုတ်နူဒပ်ကံၚ်ဇြဳပၞာန် ရပ်ဒက်ပြိုက်ဂစိုတ်တုဲ ကောန်အရာပ်ညးဍုၚ်ကွာန် ၁၇၆ တၠပြၚ် ဒးချိုတ်လဝ်ရဂှ် လလောၚ်တြးလဝ် ပ္ဍဲဂိတုအံက်တဝ်ဗာစၟတ်တ္ၚဲ (၂၁) ရ။
ပရိုၚ် -သြၚ်လောန်တိုၚ်မ်
ဗီု -Social Media
sanlontai