သွက်ဂွံထိၚ်ဒက်ကဵု ပရေၚ်ဒပ်ပၞာန်ပန်ဖျေံဒၟံၚ်လွဟ်ဇၞော် ပ္ဍဲဒေသမန် ဗော်ဍုၚ်မန်တၟိ အာတ်မိက်

မတ်မလီု၊ အံက်တဝ်ဗာ (၂၂)

ပရေၚ်ဒပ်ပၞာန် ပန်ဖျေံဒၟံၚ်လွဟ်ဇၞော် ပ္ဍဲဒေသမန်ဂှ် လ္ၚတ်တုဲ ညံၚ်ဂွံထိၚ်ဒက်ကဵု ဗော်ဍုၚ်မန်တၟိ အာတ်မိက်လဝ် ဇရေၚ်က္ဍိုပ်သ္ကိုပ်ပၞာန် မေန်အံၚ်လှာၚ်ရဂှ် ဂွံတီကေတ် နူလၟေၚ်ပရိုၚ်ဗော်ဍုၚ်မန်တၟိရ။

ညးတာလျိုၚ်ဗွိုၚ်အပ္ဍဲဍုၚ် နာဲဗညာလဴ တိုန်စိုပ်လဝ်အခန်ကၞာ NCA ပေၚ် ၈ သၞာံ စၞးဗော်ဍုၚ်မန်တၟိဂှ် ဃောဆဵုဂဗကဵုက္ဍိုပ်သ္ကိုပ်ပၞာန် ပ္တိုန်ထ္ၜးလဝ် ကရောံဂကောံ EAO ထ္ပက်စၟတ်တဲဒေါံပန်ပှော် ပ္ဍဲကဵုဂိတုအံက်တဝ်ဗာ စၟတ်တ္ၚဲ ၁၆ ဂှ်ရ။

ပ္ဍဲလ္တူပရေၚ်ပ္တိုန်ထ္ၜးဏံ အခိၚ်ဗ္တံ ပ္ဍဲလၟေၚ်ပရိုၚ်ဗော်ဍုၚ်မန်တၟိ ဗလးပ္တိတ်လဝ်ပရိုၚ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၂၀) အခိၚ်ဇိုၚ်သဝ်တ္ၚဲဂှ် နာဲဗညာလဴ ဟီုသှ်လဝ် ပရောပရောဆဵုဂဗလဝ်ကဵု က္ဍိုပ်သ္ကိုပ်ပၞာန်ဂအုပ်သ္ကိုပ်ဗိုလ်ဇၞော် မေန်အံၚ်လှာၚ် ပါလုပ်သီုပရေၚ်ကၠောန်ဗဒှ်လဝ်အခန်ကၞာ NCA ပေၚ် ၈ သၞာံရ။

နာဲဗညာလဴဂှ် ဂကောံဇြဟတ်ပၠန်ဂတးတအ် စိုပ်ဒၟံၚ်ပ္ဍဲကဵုဒေသမန်တအ်ဂှ် နူကဵုဒပ်ပၞာန် ဟွံအာဗတိုက်မွဲသာ် ဟိုတ်နူပန်ဖျေံဏာဒၟံၚ် လွဟ်ဇၞော်တုဲ ပါဲနူပရေၚ်ညးဍုၚ်ကွာန်ဇီုကပိုက်ဒးလဝ်ဂှ် ပရေၚ်သ္ၚိဒၟံၚ်တအ် လီုလာ်လဝ် ဗွဲမဂၠိုၚ်နွံရဂှ် သ္ဂးရ။

ဟိုတ်ဂှ်ရ ဂတနူဏံ သွက်ဂွံထိၚ်ဒက်ကဵု ပရေၚ်ပန်ဖျေံဏာလွဟ်ဇၞော် နူသ္ၚောဲသ္ၚောဲဂှ် နူကဵုဗော်ဍုၚ်မန်တၟိ အာတ်မိက်လဝ်ဂှ် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် သွက်ဂွံဂၠိုက်ဂၠာဲစၟဳစၟတ်ကဵုဗွဲမပြဟ် ကဵုလဝ်တၚ်စၞောန် ညးတာလျိုၚ်ဌာန်ဂအုပ်ပၞာန် ဒိုဟ်အဂၞဲရဂှ် နာဲဗညာလဴ ဟီုလဝ်ရ။

နဒဒှ်ကြပ်ညောန်အိုတ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၇) ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်ကၞာလဵု၊ ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ်တုဲ ကောန်အရာပ် (၃) တၠ ပါလုပ်သီုကောန်ၚာ်မန်မွဲတၠ ဒးလဝ်ဘဲဝပ်ရ။

အတိုၚ်စရၚ်ၜိုတ်သြၚ်လောန်တိုၚ်မ် ပကောံပကေဝ်ဂွံလဝ်မ္ဂး ပ္ဍဲမွဲကာလဒပ်ပၞာန်သီအဝဵုဏံ ပ္ဍဲကဵုဒေသကောန်ဂကူမန် မံၚ်တန်တဒၟံၚ်တအ်ဂှ် ဟိုတ်နူပန်ဖျေံလဝ်လွဟ်ဇၞော် သီုကဵုဗတိုက်လဝ်ကဵုက္ၜၚ်ကျာတုဲ ကောန်အရာပ် ဟွံအောန်နူ (၁၀) တၠ ဒးချိုတ်လဝ်တုဲ ဒးလဝ်ဘဲဝပ် ဟွံအောန်နူ (၂၀) တၠနွံရ။

ဟိုတ်နူဒပ်ပၞာန်ပန်ဖျေံလဝ်လွဟ်ဇၞော်ဗီုဏံတုဲ လ္တူကောန်အရာပ်တအ် ဒးချိုတ်ဒၟံၚ် ညံၚ်ပရေၚ်ကေတ်လျိုၚ်ပရေၚ်ဒုၚ်လျိုၚ်ဂွံနွံကဵုဂှ် ပ္ဍဲဂိတုဂျောန်တတိယသတ္တာဟတုဲကၠုၚ်တေံလေဝ် ဗော်ဍုၚ်မန်တၟိ အာတ်မိက်လဝ် ဌာန်ဂအုပ်ပၞာန်ရးဒိုဟ်အဂၞဲ ကေုာံအလဵုအသဳတွဵုရးဍုၚ်မန်ဏီရ။

​ဗော်ဍုၚ်မန်တၟိဂှ် ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ နူသၞာံ ၂၀၂၂ ဂိတုအေဗြဴ သ္ကုတ်လကြဴဂှ် ပေါဲသဳကၠဳပရေၚ်ၜိုဟ်လလံ ကံၚ်ဇြဳပၞာန်ကော်ဘိက်လဝ်ဂှ် မွဲကရောံကဵု ဂကောံ EAO ထ္ပက်စၟတ်တဲဒေါံပန်ပှော်တအ်ကီု နကဵုမွဲမွဲကောံကီု တိုန်စိုပ်သဳကၠဳလဝ် ဟွံအောန်နူ ဗၞတ် (၆) ဝါနွံရ။

ဗော်ဍုၚ်မန်တၟိ ထ္ပက်လဝ်စၟတ်တဲလိက်ကသုက် ဒေါံပန်ပှော် NCA ပ္ဍဲလက်ထက်အလဵုအသဳ NLD ဂှ် အခိၚ်လၟုဟ်ဏံ ၜိုန်ရဒေါံလဝ်ပရေၚ်သဳကၠဳ ပရေၚ်ဍုၚ်ကွာန်ကဵု ကံၚ်ဇြဳပၞာန်ကီုလေဝ် ညံၚ်ပရေၚ်ပန်ပှော်ၜါလ္ပာ်ဟွံဂွံဒှ် ဒတူလာၚ်ဒၟံၚ် နကဵုကဆံၚ် Bilateral ရ။

ပရိုၚ် – သြၚ်လောန်တိုၚ်မ်

ဗီု – NMSP