ၜဳကလေၚ်၊ အံက်တဝ်ဗာ(၂၂)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ သ္ကုတ်ဂၠံၚ်ဆက်စၠောံလဝ် ကွာန်မွဲကဵုမွဲ မၞုံကွာန်ခေဝ်မောက်၊ ဒေက်ယာကဵု ယှိုဲယောၚ်ပျၜါတၞုၚ်ဂှ် ဒပ်ကံၚ်ဇြဳပၞာန် ကၠုၚ်ပလီုပလာ်ဏာလဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လာန်တိုၚ်မ်ရ။
ဒပ်ကံၚ်ဇြဳပၞာန် ဇြဟတ်ဒပ် နွံဗ္ဒာဲ ၁၀၀ ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၂၀) အခိၚ်ဇိုၚ်သဝ်တ္ၚဲ ၜိုတ် (၇) နာဍဳဂှ် ပ္ဍဲသ္ကုတ်ဂၠံၚ်ဆက်စၠောံလဝ်ကွာန်မွဲကဵုမွဲ ဒေါက်ယာတ်-ခေဝ်မောက် ကဵု ခေဝ်မောက်ယှိုဲယောၚ်ပျ ဂၠံၚ်ၜါတၞုၚ်ဂှ် ထ္ပက်ကဵုဘေတ်ဟိုဝ်တုဲ ကၠုၚ်ပလီုပလာ်ဏာလဝ်ရ။
ဒပ်ကံၚ်ဇြဳပၞာန်ဂှ် သ္ကုတ်ဂၠံၚ်ဆက်စၠောံလဝ် ဒေါက်ယာတ်-ခေဝ်မောက် ဗွိုက် ၄ ပေ၊ ဒမျိုဟ် ၅ ပေပြၚ် ၜံက်ပလီုပလာ်လဝ်တုဲ သ္ကုတ်ဂၠံၚ်ယှိုဲယောၚ်ပျ-ခေဝ်မောက်ဂှ် ဒဒန်မၞုံဒမၠိၚ် ၂၅ ပေမွဲတၞုၚ်ကဵု သ္ကုတ်ဂၠံၚ်မွဲတၞုၚ်ဂှ်လေဝ် ပလီုပလာ်ဏာလဝ်ရ။
ဒပ်ကံၚ်ဇြဳပၞာန်ဂှ် နကဵုတၚ်စောတ်စောဲ သုၚ်စောဲဂၠံၚ်ဍာန်သ္ကုတ်ဏံတုဲ ဂကောံဇြဟတ်ပၠန်ဂတးတအ် ပါလုပ်သီု ဒပ်ပၞာန်ဗၠးၜးကောန်ဂကူကရေၚ် KNLA ကၠုၚ်စိုပ်ဗတိုက်ဒၟံၚ်တံဒပ် ဗဒိုပ်ပၞာန်တအ်တုဲ ပလီုပလာ်ဏာလဝ်ရ။
ဆ္ဂးသ္ကုတ်ဂၠံၚ်ကံၚ်ဇြဳပၞာန် ကုတ်ဗပိုတ်ဏာလဝ်တအ်ဂှ် လ္တူနူဂကောံဇြဟတ်ပၠန်ဂတးတအ် သုၚ်စောဲဒၟံၚ်ဂှ်တုဲ ညးဒေသတအ် သုၚ်စောဲဒၟံၚ် သွက်ပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ပညာ ကေုာံကိစ္စပရေၚ်ထတ်ယိုတ်ဂၠိုၚ်အိုတ်ရ။
ဟိုတ်နူဒပ်ကံၚ်ဇြဳပၞာန် ပလီုပလာ်ဏာလဝ် ဂၠံၚ်ဆက်စၠောံကွာန်မွဲကဵုမွဲ ၜါတၞုၚ်တုဲ ပရေၚ်အာကၠုၚ် ကွာန် ၂၀ ကွာန် ပါလုပ်သီု ကွာန်ခေဝ်မောက်၊ ကျိုဝ်ဝိုၚ်၊ ကဒဳပု၊ တေတ်ချတောၚ်တအ် ဒှ်ကၠုၚ်အခက်ခုဲရဂှ် ညးဒေသတအ်ဟီုလဝ်ရ။
ဒပ်ကံၚ်ဇြဳပၞာန် ကၠုၚ်ပလီုဂၠံၚ်သ္ကုတ်ဆက်စၠောံလဝ် အကြာမွဲကွာန်ကဵုမွဲကွာန်ဂှ် ဟိုတ်နူဂကောံဇြဟတ်ပၠန်ဂတးတအ် ဘပဠပန်ပှော်လဝ်တုဲ ဒပ်ကံၚ်ဇြဳပၞာန်ကလေၚ်ဆုတ်တိတ်လဝ်ရဂှ် ဂွံတီကေတ်ရ။
တွဵုရးဍုၚ်မန်၊ ပ္ဍဲခရိုၚ်သဓီုဂှ် ပ္ဍဲမွဲကာလဒပ်ပၞာန်သီအဝဵုဏံ သ္ကုတ်ဂၠံၚ်ဆက်စၠောံ အကြာကွာန်မွဲကဵုမွဲ ပါလုပ်သီုဂၠံၚ်ဆက်စၠောံ အကြခရိုၚ်မွဲကဵုမွဲ ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ ကေုာံသဓီုတအ်ဂှ် ဒပ်ကံၚ်ဇြဳပၞာန် ပလီုပလာ်ဏာလဝ်ဟွံအောန်နူ (၁၀) တၞုၚ်နွံရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai