ပ္ဍဲမဂွေ ကၠောန်ဗဒှ်လဝ်ပေါဲစှ်ေဘာ တန်ဗ္တောန်ဗ္ဂပ်လွဟ် လၟေၚ် (၇)

မဂွေ – အံက်တဝ်ဗာ (၂၄)

ရုၚ်ကောပ်ကာဲရးမဂွေ ဒေသပၞာန် စၟတ် (၁) ဒပ်ပၞာန်စဵုဒၞာညးဍုၚ်ကွာန်၊ ဌာနဝန်ဇၞော်ပရေၚ်စဵုဒၞာ၊ အလဵုအသဳညဳသၟဟ်ကောန်ဂကူဂှ် က္ဍိုက်က္ဍိုပ်ကၠောန်ဗဒှ်လဝ် ပေါဲစှ်ေဘာတန်ဗ္တောန်ပ္ကတ်ပ္ကေၚ် ပံၚ်ကောံ ဗ္ဂပ်လွဟ် လၟေၚ် (၇)ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၁၉) တုဲကၠုၚ်တေံ ကၠောန်ဗဒှ်လဝ် ပ္ဍဲတိဍာ်ထိၚ်ဒဝ်အလဵုအသဳ NUG မွဲဒၞာဲရဂှ် ဌာနဝန်ဇၞော်ပရေၚ်စဵုဒၞာ ဓမံက်ထ္ၜးလဝ်ရ။

အခန်ကၞာဂှ် ညးတာလျိုၚ်ဒပ်ပၞာန်စဵုဒၞာညးဍုၚ်ကွာန် (PDF) ရးမဂွေ၊ ညးတာလျိုၚ်ထံက်ပလံၚ်ခရိုၚ်တအ်၊ သ္ကိုပ်တံဒပ်/ဒုသ္ကိုပ်တံဒပ်တအ် တိုန်စိုပ်လဝ်ညးသ္ကအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

တန်ဗ္တောန်ပံၚ်ကောံ ပ္ကတ်ပ္ကေၚ်ဗ္ဂပ်လွဟ် လၟေၚ်(၇)ဂှ် သ္ဂံၚ် PDF နူကဵုတံဒပ်ဇဳတအ်ကီု သီုဂကောံစဵုဒၞာညးဍုၚ်ကွာန် (ပ.က.ဖ)တအ် တိုန်စိုပ်လဝ်တုဲ ကၠောန်သ္ပလဝ် ပရေၚ်ဗ္ဂပ်ကဵုလဝ်လွဟ်ရဂှ် ဂွံတီကေတ်ရ။

အခိၚ်လၟုဟ်ဏံမ္ဂး ပ္ဍဲရးမဂွေဂှ် တံဒပ် PDF (၂၉) တံဒပ်ဂှ် အလဵုအသဳ NUG ဗ္ဂပ်ကဵုလဝ်လွဟ်တုဲဒှ်ရဂှ် ကဵုလဝ်သမ္တီရ။

နကဵုဌာနဝန်ဇၞော်ပရေၚ်စဵုဒၞာ၊ အလဵုအသဳညဳသၟဟ်ကောန်ဂကူဂှ် သွက်တန်ဗ္တောန်ကွတ်ပၞာန် ကေုာံ သွက်ဂွံဗဂပ်ကဵုလွဟ်ဂှ် သုၚ်စောဲဒၟံၚ် သြန်ဂအုံဗာတ်ဂျေတ်ကၟိန်ဍုၚ်၊ သြန်ညးဍုၚ်ကွာန်တအ်ပါလုပ်ထံက်ပၚ်လဝ် သွက်ပရောဂျေတ် ဗ္ဂပ်လွဟ်လက်နက်ရဂှ် ဟီုလဝ်ရ။

ပရိုၚ် – သြၚ်​လောန်တိုၚ်မ်

ဗီု – MOD