ပေါက်၊ အံက်တဝ်ဗာ(၂၆)
ပ္ဍဲသ္ၚိဒၟံၚ်ကောန်ဒပ်ကံၚ်ဇြဳပၞာန် ကေုာံ ပၞာန်ညးဍုၚ်ကွာန် (ညးဒေသကော်) ဂကောံပျူသဝ်ထဳလ္ၚဵု စိုပ်ကၠုၚ်မံၚ်ဒၟံၚ် ပ္ဍဲအရာပ်အံၚ်ချာန်တာ၊ ပွိုၚ်ဍုၚ်ပေါက်၊ ရးမဂွေလ္ၚဵုဂှ် ဒပ်စဵုဒၞာဒေသတအ် လုပ်က္ဍိုက်ဗတိုက်လဝ်ရဂှ် ဂွံတီကေတ်ရ။
ပ္ဍဲဂိတုအံက်တဝ်ဗာ စၟတ်တ္ၚဲ ၂၃ ဂှ် အတိုၚ်ဂွံလဝ်ပရိုၚ် ဒပ်ပံၚ်တောဲ ကံၚ်ဇြဳပၞာန်ကဵု ပၞာန်ညးဍုၚ်ကွာန်လ္ၚဵုတအ် ကၠုၚ်စိုပ်မံၚ်ဒၟံၚ် ပ္ဍဲအရာပ်အံၚ်ချာန်တာဂှ် ဒပ်စဵုဒၞာဒေသတအ် လုပ်စိုပ်က္ဍိုက်ဗတိုက်လဝ် နဇြဟတ်ပေၚ်ၚ်ရ။
“ဒၟာနူကဵုပရိုၚ်တုဲ လုပ်က္ဍိုက်ဗတိုက်လဝ်ရ၊ ဒှ်လဝ်ပရေၚ်ပန်ပှော်ညးသ္ကအ်တုဲ ဂြိပ်တိတ်အာရ၊ သီဂွံလဝ် လွဟ်လက်နက် သီုကဵုကပေါတ်ဆက်စပ် နူကဵုသ္ၚိက္ဍိုပ်ကၚ်ဒပ်ကံၚ်ဇြဳပၞာန်ရ” ဂှ် ညးတာလျိုၚ်ပကဖမျာၚ်မွဲတၠဂှ် ဟီုရ။
ပ္ဍဲပရေၚ်လုပ်က္ဍိုက်ဗတိုက်လဝ် သ္ၚိပျူသဝ်ထဳတအ်ဂှ် နူကဵုသ္ၚိဥူဗာန်န် က္ဍိုပ်ဂကောံကၚ်ဒပ်ကံၚ်ဇြဳပၞာန်ဂှ် သီဂွံလဝ် လွဟ်ကာဗိုၚ် မွဲဒကိုအ်၊ ဖျေဲကမ် မွဲမ ကေုာံ မကမ် ၂၀ ရဂှ် ဂွံတီကေတ်ရ။
ပရေၚ်က္ဍိုက်ဗတိုက်ဏံ ဂကောံဇြဟတ်ပၠန်ဂတး ဖျေံသ္ဇိုၚ်ပေါက် ဒပ်ဗိုလ်တေတ်ဇြေ ကေုာံ ဒပ်စဵုဒၞာညးဍုၚ်ကွာန် တံဒပ် (၁)တအ် ပံၚ်တောဲဗတိုက်လဝ်ဒှ်တုဲ ပရေၚ်ဇီုကပိုက် ဒးဟၟဲ ဆုတ်ကလေၚ်တိတ်မာန်လဝ်ရ။
ပ္ဍဲပွိုၚ်ဍုၚ်ပေါက် ပရေၚ်ချဳဒရာၚ်ဂကောံပၠန်ဂတး တအ်ဇြဟတ်ခိုဟ်ဒၟံၚ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂) တုဲကၠုၚ်တေံ ကံၚ်ဇြဳပၞာန် လလောၚ်တြးလဝ် ပရေၚ်အုပ်ဓုပ်ပၞာန်ရ။
အတိုၚ်ညးဒေသတအ် ဟီုလဝ်မ္ဂး ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံဘာ်ပြၚ်ဏံ ပ္ဍဲကဵုဒၞာဲ လ္တူဍုၚ်ပေါက်လ္ၚဵုဂှ်ဟေၚ် ကံၚ်ဇြဳပၞာန် ထိၚ်ဒဝ်လဝ်မာန်တုဲ ဒးဗလးလဝ်တဲ ဒေသသှ်ေနူဂှ်ဗွဲမဂၠိုၚ်ရဂှ် ဟီုလဝ်ညးသ္ကအ်အိုတ်ရ။
ပရိုၚ် – သြၚ်လောန်တိုၚ်မ်
ဗီု – PDF
sanlontai