မတ်မလီု၊ အံက်တဝ်ဗာ (၂၆)
အလုံကၟိန်ဍုၚ်မွဲ နူဂိတုဂျာန္နဝါရဳသၞာံဏံ စဵုဂိတုအဝ်ဂါတ် ပ္ဍဲကဵုပွိုၚ် ဒ္စာံဂိတုဏံ ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုပၞာန်ကျာတုဲ ကောန်အရာပ် ဗ္ဒာဲ ၃၇၀ ဒးချိုတ်လဝ်ရဂှ် ဂကောံဉာဏ်လေန်တေတ် မဒှ်ဂကောံသုတေသန မွဲဂကောံဂှ် လလောၚ်တြးလဝ်ရ။
ပ္ဍဲပွိုၚ်ဒ္စာံဂိတုဏံ ဒပ်ကံၚ်ဇြဳပၞာန် ဗတိုက်လဝ်ကဵုပၞာန်ကျာ အပံၚ်လၟိဟ် (၄၇၈) ဝါ က္လိလောန်လဝ်တုဲ တော်သရောပ်ထောံမ္ဂး ပ္ဍဲမွဲတ္ၚဲ ကၠောန်သ္ပဗတိုက်လဝ် ကဵုက္ၜၚ်ကျာ ဗ္ဒာဲ (၂) ဝါရ။
ဟိုတ်နူပရေၚ်ကံၚ်ဇြဳပၞာန် ဗတိုက်လဝ်ကဵုပၞာန်ကျာတုဲ ကောန်အရာပ် ဒးချိုတ်လဝ် ၃၆၄ တၠ ဒးလဝ်ဘဲဝပ် ၃၃၁ တၠတုဲ စမြိုၚ်ပရေၚ်ဘာသာ ၅၈ မ၊ ဘာဗ္တောန်လိက် ၃၃ ဘာ၊ ရုၚ်ဂဥုဲ ၁၃ ရုၚ် ဇီုကပိုက် ဒးလီုလာ်လဝ်ရ။
အတိုၚ်လိက်ဒုၚ်စဳရေၚ် ဂကောံဉာဏ်လေန်တေတ် တြးပ္တိတ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ ၂၃ ဂှ်မ္ဂး ပ္ဍဲအပ္ဍဲနူကဵုဂိတုမေ တုဲကၠုၚ်တေံ စဵုကဵုဂိတုအဝ်ဂါတ်ဂှ် ပရေၚ်ဒပ်ကံၚ်ဇြဳပၞာန် က္လိလောန်ဗတိုက် လဝ်ကဵုပၞာန် ပ္ဍဲတွဵုရးကရေၚ်ဍာဲကဵု ရးသေတ်ဂါၚ် လၟိဟ်ဂၠိုၚ်အိုတ်ရဂှ် ဓမံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲကဵုရးမဂွေ၊ တၞၚ်သြဳ၊ ကေုာံ ရးအၚ်ဝ ပါလုပ်သီုတွဵုရးချေၚ်၊ ကရေၚ်၊ ကချေၚ်၊ မန် ကေုာံတွဵုရးသေံတအ်ဂှ်လေဝ် ကၠောန်သ္ပလဝ် ပရေၚ်ဗတိုက်ပန်ပှော်ကဵုပၞာန်ကျာတုဲ နဒဒှ်တၚ်တၟေၚ်ဂှ် ပ္ဍဲကဵုနေပျဳဒဝ် ဒၞာဲရုၚ်ကံၚ်ဇြဳပၞာန်ဂ္ဇံဒၟံၚ်ဂှ် ဗတိုက်လဝ်ကဵုပၞာန်ကျာ ဗၞတ်မွဲအလန်ရ။
အလုံမွဲကၟိန်ဍုၚ် နူကဵုဂိတုဖေဖဝ်ဝါရဳ သၞာံ ၂၀၂၁ ဒပ်ပၞာန်သီအဝဵုတုဲ စဵုကဵုဂိတုအဝ်ဂါတ် ဟိုတ်နူကံၚ်ဇြဳပၞာန် ဗတိုက်လဝ်ကဵုပၞာန်ကျာတုဲ ကောန်အရာပ် ၆၈၀ ဒးချိုတ်လဝ်တုဲ မၞိဟ်ဒးလဝ်ဘဲဝပ် ဗ္ဒာဲ ၄၆၀ နွံရဂှ် ဂွံတီကေတ် အတိုၚ်လိက်ဒုၚ်စဳရေၚ် ဂကောံဉာဏ်လေန်တေတ်ရ။
ပရိုၚ် – သြၚ်လောန်တိုၚ်မ်
ဗီု -Twitter
sanlontai