တယိတ်ချံၚ်၊ အံက်တဝ်ဗာ (၂၆)
ပ္ဍဲဂိတုအံက်တဝ်ဗာ ၂၅ အခိၚ်ပယျာံဂယးဂှ် လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ၝောံဍုၚ်တယိတ်ချံၚ် မၞုံဍုၚ်တယိတ်ချံၚ်၊ ရးတၞၚ်သဳဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ် (ပကဖ) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဗၠာဲသၟိၚ် ဒၞါဲဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ်တံ မဖျေံဒပ်မံၚ်တန်တဴဒၟံၚ်ဂှ် ပ္ဍဲကဵုတ္ၚဲဂှ် အခိၚ်နူဂယး ၜိုတ် ၅ နာဍဳဂှ် ဂကောံဒပ်ပံၚ်ကောံမဟာမိတ် စဵုဒၞါဒေသတံ လုပ်စိုပ်ဗ္တိုက်လဝ် နကဵုလွဟ်ဇၞော်၊ လွဟ်ဍောတ်တံရ။
ဟိုတ်နူပရေၚ်ဗ္တိုက်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗ္ဒါဲဘာ်နာဍဳတုဲ နူကဵုတမ်ဒပ်ဖျေံသ္ဇိုၚ်ကံၚ်ဇြဳပၞာန်တံ ဘိုၚ်ပန်ပှော်လဝ်လွဟ်ဇၞော်တံ နွံဂှ် ဂွံတီကေတ်ရ။
ပ္ဍဲကဵုပရေၚ်ဗ္တိုက်ဗ္ဒိုပ်ဗၠာဲသၟိၚ်ဂှ် လ္ပာ်ဒပ်ကံၚ်ဇြဳပၞာန် ဟွံအောန်နူကဵု ၄ တၠ ဇီုကပိုက်ချိုတ်မာန်တုဲ မၞိဟ်ကလိဂွံဝပ်တံလေဝ် နွံမာန်ဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တယိတ်ချံၚ် (ပကဖ) သ္ဂးရ။
အပ္ဍဲပရေၚ်ဗ္တိုက်ၜါလ္ပာ်ဂှ် တမ်ဒပ်ကံၚ်ဇြဳပၞာန် ခမရ (၃၀၃) ၊ (၃၀၄) ဖျေံသ္ဇိုၚ်ပွိုၚ်ဍုၚ်တယိတ်ချံၚ်ဂှ်သၟးဟွံက သီုကဵုတမ်ဒပ် (၃၀၅) တံလေဝ် ဘိုၚ်ပန်ပှော်လဝ် လွဟ်ဇၞော်တံကီုရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ဒတုံဗ္တိုဟ်ထ္ကးအာလဝ် ပ္ဍဲကွာန်ကျံက်မျံၚ်ဂှ်ရ ညးဍုၚ်ကွာန်ဒေသ ၄ တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် (၂) မလေဝ် လီုလာ်အာလဝ်ဂှ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုအံက်တဝ်ဗာ (၁၇) တေံဂှ်လေဝ် အကြာကွာန် ကတောဲကဵု ကွာန်ယၚေဝ်၊ ပွိုၚ်ဍုၚ်တယိတ်ချံၚ်ဂှ် ဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံ ဒှ်လဝ်ပေါဲဗ္တိုက်တုဲ လ္ပာ်ကံၚ်ဇြဳပၞာန် ဟွံအောန်နူကဵု ၁၀ တၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai