KIA ပလံၚ်ဗစိုပ်လိက်ပ္တိုန်ဂုဏ်စရာဲ ကုဒပ်ပၞာန် PDF သီုကဵုမဟာမိတ်ဂမၠိုၚ်တုဲ ဖ္တိုက်ဖ္အောဝ် သွက်ဂွံလုပ်ပေါဲဗ္တိုက်မွဲကရောံမွဲစွံတုဲ ဖအိုတ်ကၠေံ သၞောတ်တၠအဝဵုပၞာန်

နေဗျဳဒဝ်၊ အံက်တဝ်ဗာ (၂၆)

ပ္ဍဲကဵုပေါဲဗ္တိုက် ဖအိုတ်ကၠေံသၞောတ်တၠအဝဵုပၞာန်ဂှ် ပံၚ်တောဲအာ မွဲကရောံမွဲစွံတုဲ သွက်ဂွံဆက်လုပ်အာပေါဲဗ္တိုက်အိုတ်ဂှ် ဂအုပ်သ္ကိုပ်က္ဍိုက်ပ်ပၞာန် ဒပ်ပၞာန်ဗၠးၜးကချေၚ် (KIA ) ဖ္တိုက်ဖ္အောဝ်လဝ် ဒပ်ပၞာန်စဵုဒၞါညးဍုၚ်ကွာန်ကောန်ဂကူ PDF တံကဵု မဟာမိတ်တံရ။

ဂအုပ်သ္ကိုပ်က္ဍိုက်ပ်ပၞာန် KIA ဂှ် ထ္မံက်ထ္ၜးလဝ် ပ္ဍဲကဵုလိက်ပ္တိုန်ဂုဏ်စရာဲ မပလံၚ်ဗစိုပ်လဝ် ဇရေၚ်ဒပ်ပၞာန်ရခေၚ် (AA) ၊ ဒပ်ပၞာန်စဵုဒၞါညးဍုၚ်ကွာန် PDF၊ ဒပ်ပၠတရဴဒဳမဝ်ကရေတ်တေတ်ကွးဘာအလုံဍုၚ် (သ္ကုတ်သၟဝ်ကျာ) (ABSDF-NB) ၊ ဒပ်ပၞာန်ကောန်ဂကူချေၚ် CAN ကေုာံ ဒပ်ပၞာန်ကောန်ဂကူကူကဳ (ဍုၚ်ဗၟာ) (KNA-Burma) တံဂှ်ရ။

နကဵုဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဂှ် စပ်ကဵုကိစ္စဒပ်ပၞာန်စဵုဒၞါညးဍုၚ်ကွာန် (PDF) ကဵု မဟာမိတ်တံ ကလိဂွံလိက်ပ္တိုန်ဂုဏ်စရာဲ ဇရေၚ်ဂအုပ်သ္ကိုပ်က္ဍိုက်ပ်ပၞာန် ဒပ်ပၞာန်ဗၠးၜးကချေၚ် (KIA) ဂှ်တုဲ ပ္ဍဲဂိတုအံက်တဝ်ဗာ (၂၄) ဂှ် လလောၚ်ပ္တိတ်လဝ်ရ။

ပ္ဍဲကဵုလိက်ပ္တိုန်ဂုဏ်စရာဲဂှ် ပံၚ်တောဲကဵု ကရောံဒပ်မဟာ၊ တမ်ဒပ်၊ ကောန်သ္ဂံၚ် KIA၊ K-PDF တံဂှ်တုဲ ဟွံသ္ပဂရုကဵု လမျီုဇကုမွဲသာ် ကုသ္ကိုပ်တမ်ဒပ်တာလျိုၚ်နွံသီုဖအိုတ် ကေုာံ ကောန်သ္ဂံၚ်မဟာမိတ်ဂမၠိုၚ် သၠးကၠေံလမျီု မလုပ်လဝ်ပေါဲဗ္တိုက်တံဂှ် ဒဒှ်ရတၚ်ဂုဏ်ဗွဲတၟေၚ် သ္ပစၟတ်သမ္တီ ပ္တိုန်ဂုဏ်စရာဲဂှ် ပါလုပ်ရ။

ညးဒုၚ်တာလျိုၚ် လလောၚ်ပရိုၚ် ဂကောံဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူဂှ် နူကဵုသ္ကိုပ်က္ဍိုက်ပ်ပၞာန် KIA ပလံၚ်ဗစိုပ်လိက်ပ္တိုန်ဂုဏ်စရာဲ ကုမဟာမိတ်ပရေၚ်ပၞာန်တံ သာ်ဏံဂှ်ဝွံ ဂွံမိၚ်ကေတ် အလန်ကိုပ်ကၠာအိုတ်တုဲ ရန်ကဵုပရေၚ်ဍုၚ်ကွာန်တၞဟ်ဟ်တုဲ ပလံၚ်ဗစိုပ်လဝ်ဏောၚ်ဂှ် ဟွံထေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“နဒဒှ်တၚ်ဂုဏ် ကုသ္ကိုပ်က္ဍိုက်ပ်ဒေသပၞာန် မဆက်ဗ္တိုက်ဒၟံၚ်ပေါဲဗ္တိုက် ပြဟ်ဟ်ဏံဂှ်တုဲ ပလံၚ်လဝ်လိက် ဒှ်ဂွံဏောၚ်။ ဆက်စပ်ကဵု ပရေၚ်ဍုၚ်ကွာန်တၞဟ်သ္အာၚ်ဏောၚ်ဂှ်ဟွံထေၚ်ပုဟ်။ ကၠာတေံလေဝ် ညံၚ်ကဵု ကဵုဒၟံၚ်လိက်ပ္တိုန်ဂုဏ်စရာဲညးသ္ကအ်ရဏောၚ်။ အလန်ဏံ ဒှ်ကၠာအိုတ်ဟာဟီုဂှ် အဲဟွံတီပုဟ်။ ဆ္ဂး ဂွံမိၚ်ကေတ်ဂှ်တှ်ေ အလန်ကိုပ်ကၠာအိုတ်ရဏောၚ်” သာ်ဝွံ ညးသ္ဂးရ။

တုဲကၠုၚ် ပ္ဍဲသတ္တာဟတုဲကၠုၚ်တေံဂှ် ဂကောံပံၚ်ကောံဂမၠိုၚ်ကဵု KIA တံ ဗ္တိုက်သီဂိုၚ်ဂွံလဝ် ဗ္ဒိုပ်နကောတ် ခြာနူကဵုဒိုဟ်ဗာယပ် ဍုၚ်မုၚ်ကိုဝ် မၞုံသ္ကုတ်သၟဝ်ကျာတွဵုရးသေံ ၁၀ မိုၚ်ဂှ်ရ။

သ္အာၚ်နူဂှ်ပၠန် ဗ္ဒိုပ်အံၚ်ဂျာ မၞုံဗ္ဒါဲကွာန်နသာန်ယာန်၊ ဍုၚ်ဝိုၚ်မဝ်၊ တွဵုရးကချေၚ် ဒပ်ပၞာန်ကော် ဗ္ဒိုပ်လေဝ်လုၚ်ဂှ်လေဝ် KIA ကေုာံ ဂကောံပံၚ်ကောံတံ သီဂွံလဝ်ရ။

ဝန်ဇၞော်ကာစဵုဒၞါ NUG ဥူယဳမန်ဂှ် ပ္ဍဲကုပေါဲသီဗ္ဒိုပ်အံၚ်ဂျာဂှ် ဖ္တိုက်ဖလှေက်ဂွံလဝ် ဇြဟတ်သၞ ၁၀၀ ပြၚ်တုဲ ဒှ်ပေါဲအံၚ်ဇၞး မကလိဂွံလဝ် နကဵုဇြဟတ် မဟာမိတ် KIA သ္ကိုပ်သ္ကဂှ်ကီု သီုကဵုဒပ်ပၞာန် PDF တံဂှ်တုဲ ဒှ်လ္ဂါံဇိုၚ် ပၞာန်ထ္ပက်မဟာဗျူဟာ မကၠောန်သ္ပလဝ် နကဵုဇြဟတ်ပၠန်ဂတး ကၠာအိုတ်ဂှ်လေဝ် ထ္မံက်ထ္ၜးလဝ် နူကဵုမုက်လိက် Facebook ညးရ။

လ္ပာ်ကံၚ်ဇြဳပၞာန်ဂှ် လလောၚ်ပ္တိတ်လဝ် ရေၚ်တၠုၚ်ဒၟံၚ် သွက်ဂွံကလိဂွံဗ္ဒိုပ်တံဂှ်တုဲ ဟိုတ်နူကလေၚ်ဗ္တိုက်လဝ် ကုဒပ်မဟာ ၆ KIA နကဵုအရီုဗၚ်တရဴကျာ အရီုဗၚ်အမၠံက်တံဂှ်တုဲ ကောန်ဒပ် KIA ဟွံအောန်နူကဵု ၄ တၠ ချိုတ်အာလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာလှကျဝ်ဇြဝ်ဂှ် လိက်ပ္တိုန်ဂုဏ်စရာဲ သ္ကိုပ်က္ဍိုက်ပ် KIA ဂှ်ဝွံ ဒှ်သဘဴပ္တိုန်ဂုဏ်စရာဲ ကုမဟာမိတ်ဂမၠိုၚ် မပါလုပ်ဒၟံၚ် ပ္ဍဲကဵုဗျူဟာပၞာန်တံသီုဖအိုတ်ဂှ်တုဲ ယဝ်ရဆက်အာ အတိုၚ်ဏံမ္ဂး သၞောတ်တၠအဝဵုပၞာန် ပိုတ်သ္ကုတ်မာန်ဏောၚ်ဂှ် သ္ၚဳဂၠိပ်လဝ်ရ။

“လိက်ပ္တိုန်ဂုဏ်စရာဲညးဂှ်တှ်ေ ဗျူဟာစပ်ကဵုအလုံမွဲတံ ပါဒၟံၚ်ဏောၚ်။ ဒှ်သဘဴ ညးဟီုလဝ် ကုသီုညးဖအိုတ်တုဲ ပေါဲဗ္တိုက် သၟဝ်ကျာတွဵုရးသေံကဵု နသာန်ယာန်ဂှ်တှ်ေ ပါလုပ်ဒၟံၚ် အဏံကီုရ။ ဒးဒှ်ဗီုဏံ ဂၠိုၚ်ၚ်ဏောၚ်။ ရန်တၟံသာ်ဏံတုဲ ဟီုလဝ်ဏောၚ် ဒှ်မာန်ရ။ ဗွဲကြဴဏံ ၜိုတ်ပိုယ်သၟဟ်အစောံ မၞိဟ်ဟွံမွဲပၟိက်ကဵု သၞောတ်တၠအဝဵုပၞာန်တံသီုဖအိုတ် ပံၚ်ကောံတုဲ ယဝ်ရဆက်အာ ညဳညဳသာသာ အတိုၚ်ဏံမ္ဂး ပေါဲအလန်ဏံတှ်ေ ညံၚ်ဂွံပိုတ်သ္ကုတ် ကၠောန်မာန်ဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။

ဌာနဝန်ဇၞော်ကာစဵုဒၞါ NUG ဂှ်လေဝ် နကဵုဒပ်ပၞာန်စဵုဒၞါညးဍုၚ်ကွာန် (PDF) ဇကုတံ ပံၚ်တောဲကဵု ဂကောံပၠန်ဂတးမဟာမိတ်ဂမၠိုၚ် ပါလုပ်သီုကဵု KIO/KIA တံဂှ်တုဲ ပ္တိတ်အာဇြဟတ် သွက်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ ဂွံမံက်ဂတဝ်၊ ညံၚ်သၞောတ်တၠအဝဵုပၞာန် ဂွံပြဟ်လလုဲအာတံဏောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KIA Media