ညံၚ်လေဝ်ပေန်၊ အံက်တဝ်ဗာ (၂၆)
ပ္ဍဲကဵုခရိုၚ်ညံၚ်လေဝ်ပေန် တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ဒပ်ကံၚ်ဇြဳပၞာန်တုဲ အပ္ဍဲပွိုၚ် ၂ တ္ၚဲ ညးဍုၚ်ကွာန်ဒေသ နူကဵု ၁၀ ကွာန်ပြၚ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
တုဲကၠုၚ် ပ္ဍဲဂိတုအံက်တဝ်ဗာ ၂၂ တေံ တမ်ဒပ်ဖျေံသ္ဇိုၚ် ဒပ်ကံၚ်ဇြဳပၞာန် မ္ၚးနူပန်ပှော်စုတ်လဝ်လွဟ်ဇၞော် အပ္ဍဲကွာန် ဒံၚ်မအ် ကေုာံ ဖိုဝ်တ ပွိုၚ်ဍုၚ်ကျံက်ကျဳ ခရိုၚ်ညံၚ်လေဝ်ပေန် KNU ဂှ် ကၠောန်သ္ပလဝ် သီုကဵုပရေၚ်ဗ္တိုက်တရဴကျာတံရ။
သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ ၂၃ တေံဂှ်လေဝ် တမ်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ကျံက်ကျဳဂှ်ဝွံ ထပ်ကလိလောန်လဝ် ပရေၚ်ဗ္တိုက်ပန်ပှော် လွဟ်ဇၞော်အဆက်က် ကုကွာန်ဖိုဝ်တာတ်၊ တဝ်ကျံၚ်ပံက် ကေုာံ ကွာန်ဂွဵုကုန်၊ ကျံက်တာန်၊ မံၚ်ပျာ ကေုာံ ကွာန်ကွေန်တဠာ ပ္ဍဲပွိုၚ်ဍုၚ်ယှိုဲကျေန်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဟိုတ်နူပြဝပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသဗွဲမဂၠိုၚ် နူကဵုကွာန်နာန်သ၊ တလိုၚ်ခေန်၊ ဖိုဝ်တ၊ ချံက်တေဝ်သု၊ ယဲတာယာ၊ ကုန်ချံၚ်ဝ နူကဵုပွိုၚ်ဍုၚ်ကျံက်ကျဳတံကဵု ကွာန်ဂွဵုကုန်၊ ကျံက်တာန်၊ မံၚ်ပျာ၊ ကွေန်တလာကျဳ နူကဵုပွိုၚ်ဍုၚ်ယှိုဲကျေန်တံဂှ်ကဵု ကွာန်ဗ္ဒါဲဗ္ဒါဲတံဂှ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံဖိုဟ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
အပ္ဍဲလၟေၚ်ဒဒှ် ဒးဒုၚ်ပန်ပှော်လွဟ်ဇၞော်ဂှ် ကောန်အရာပ် နူကဵုကွာန်တဝ်ကျံၚ်ပံက် ၂ တၠကဵု ကောန်ကွာန်သက်သု ၁ တၠ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန် စွံပွန် ကုညးဍုၚ်ကွာန်ကောန်အရာပ်တံတုဲ ဒၟါနူကလိလောန်ဒၟံၚ် ပရေၚ်ဗ္တိုက်ပန်ပှော် ကေုာံ ဝးပ္ကဝ်အခေါၚ်အရာမၞိဟ်တံဂှ်ရ လၟိဟ်ညးပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် အပ္ဍဲတိဍာ် KNU တံ သာဂၠိုၚ်ကၠုၚ်ရောၚ် ညးတာလျိုၚ် ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN ဟီုဂးလဝ်ရ။
ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်၊ ပွမဝးပ္ကဝ်အခေါၚ်အရာမၞိဟ် ကေုာံ ဟိုတ်နူပေါဲဗ္တိုက်ၜါလ္ပာ်တံတုဲ လၟိဟ်ညးပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် အပ္ဍဲတိဍာ် ဒပ်မဟာ ၃ ခရိုၚ်ညံၚ်လေဝ်ပေန်တံဂှ်ဝွံ ၂၄၀၀၀၀ ပြၚ် နွံဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံ ဗွဲမဂၠိုၚ်ဂၠေၚ်ရောၚ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU
sanlontai