ဟိုတ်နူပၞာန်ထ္ပက်အေဿရေတုဲ ဒေသဂါဇြာ အဆက်ပိုတ်ဒၟံၚ်ကဵုလ္ပာ်မ္ၚး

ဂါဇြာ၊ အံက်တဝ်ဗာ(၂၉)

ဟိုတ်နူပၞာန်ထ္ပက်အေဿရေတုဲ ပ္ဍဲဒေသသြၚ်ဂၚ်ဇမၠိၚ်ဂါဇြာဂှ် လိုၚ်ဖုၚ် ကေုာံအေန်တာနေတ် ပိုတ်သ္ကုတ်အာတုဲ ဟွံဂွံအဆက်စၠောံကဵု လ္ပာ်မ္ၚးဂှ် ကၞိက်ဗ္ဒန်ထောံ ပွဓဇန်ကြာန်မာန်ဒၟံၚ်ရဂှ် ဂကောံဆေၚ်ကဵုအရီုဗၚ်ဗ္စာရဏာပရေၚ်မၞိဟ်တအ်ကီု သီုဂကောံမဳဒဳယာတအ် ကဵုလဝ်သတိရ။

ပ္ဍဲဒေသသြၚ်ဂၚ်ဇမၠိၚ်ဂါဇြာဂှ် သ္ပတံနူမွဲၜါတ္ၚဲ တုဲကၠုၚ်တေံတုဲ မွဲကရောံကဵု ပရေၚ်ထ္ပက်ပၞာန်ဗလးမုက်တိ ဒပ်အေဿရေဂှ် အခိၚ်ဂြာတ်ထောံဖျေံဗုမ်တုဲဂှ် ကောန်ပါလေတ်သတိုၚ် မၞုံပ္ဍဲဂါဇြာတအ် ဟွံဂွံအဆက်ကဵု တိဍာ်လ္ပာ်မ္ၚးရ။

ဂျဝ်ဝေဝ်လ် မဒှ်ညးရေၚ်ဒုၚ်ဒၟံၚ်ကာ တေဝ်လဳကောန် ပါလေတ်သတိုၚ်မွဲတၠဂှ် ဟိုတ်နူအေဿရေ ဂြာတ်ထောံဖျေံဗုမ် ပ္ဍဲဒေသသြၚ်ဂၚ်ဇမၠိၚ်ဂါဇြာတုဲဂှ် သွက်ဂွံက္လိဂွံအဆက်စၠောံကဵု လ္ပာ်မ္ၚး ဂၠံၚ်တရဴကၟိန်ဍုၚ်နာနာသီုဖအိုတ် ဒးလီုလာ်လဝ်ရဂှ် ဟီုဂးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၇) ဂှ်ရ။

ဒေသသြၚ်ဂၚ်ဇမၠိၚ်ဂါဇြာဂှ် ဟိုတ်နူအေန်တာနေတ်ဟၟဲ၊ ဖုၚ်ဟၟဲတုဲ စိုပ်အာ ပ္ဍဲဒမၠုတုဲ အရာဒှ်လီုဒၟံၚ် ကောန်ပါလေတ်သတိုၚ်တအ် ဒးဒုၚ်ကၞိက်ဗ္ဒန် ရပ်ဒက်ဒၟံၚ်ရဂှ် သၟာပရိုၚ်အေဂျေ အဳဗရာဟေန် ပ္တိုန်ထ္ၜးဒၟံၚ်ပရိုၚ် ပ္ဍဲဒၞာဲဂှ် ဟီုဂးလဝ်ရ။

ဂကောံအခေါၚ်ဗၠးၜးကၟိန်ဍုၚ်နာနာ AI ဂှ်လေဝ် ပရေၚ်ဆက်စၠောံအောန်ယအ်ဒၟံၚ်ဂှ် ပ္ဍဲအရာပ္တိုန်စၟတ်သမ္တီ ပရေၚ်ဖံက်ပ္ကဝ်အခေါၚ်အရာမၞိဟ်တအ် သာတုဲ က္တဵုဗဒှ်ကဵုတၚ်ကော်ချဴရဂှ် ကဵုလဝ်သမ္တီရ။

ဒေဝ်လ်ဘိုဝ်ရာ ဗရောၚ် သုတေသဳတန်ဇၞော် နဲကဲကွတ်ပညာကေုာံ အခေါၚ်အရာမၞိဟ် ဂကောံမၚ်ရံၚ်ခါတ်အကာဲ အခေါၚ်အရာမၞိဟ်ဂှ် ပရေၚ်အေန်တာနေတ်ပိုတ်သ္ကုတ်ဗီုဏံ ကၞိက်ဗ္ဒန်ကဵု ပရေၚ်ပြိုက်ဂစိုတ်ဗွဝ်ကဵုဗွဝ် ပွကြမ်ကြဓဇန်ကြာန်တအ်တုဲ ညံၚ်ဂွံကေတ်အရေဝ် ပရေၚ်ဖံက်ပ္ကဝ် အခေါၚ်အရာမၞိဟ်ဟွံဂွံမာန် ဒှ်ဒၟံၚ်အထံက်အရီုရဂှ် ကဵုလဝ်သတိရ။

သ္အာၚ်နူဂှ်ပၠန် ကဝ်မတဳစဵုဒၞာမၚ်မွဲ သၟာပရိုၚ်တအ်လေဝ် ဟိုတ်နူလာၚ်ဖုၚ်အေန်တာနေတ်ပိုတ်သ္ကုတ်အာတုဲ ဖိုလ်အဆက်သ္ကာတ်မြဟ် ပါလုပ်သီုပရိုၚ်ဗၠေတ်မှာတအ် က္တဵုဒှ်ကၠုၚ်မာန်ဒၟံၚ်ရဂှ် ကဵုလဝ်သတိရ။

အေဿရေဂှ် ဟိုတ်နူဂကောံဟာမေဿ်ဗတိုက်လဝ်တုဲ အပံၚ်မၞိဟ် ၁၄၀၀ ပြၚ် ဒးချိုတ်လဝ်တုဲ နဒဒှ်ကလေၚ်ပလန်တဲကဵု ပရေၚ်ဗတိုက်ပန်ဏံ ဟိုတ်နူကၠောန်သ္ပလဝ် ပရေၚ်ဗတိုက်ပန် နူဍာန်ကျာရိုဟ်လၟိဟ်ဟွံမာန်ဂှ်ရ ပ္ဍဲပါလေတ်သတိုၚ် အပံၚ်လၟိဟ်မၞိဟ် ၇၀၀၀ ပြၚ် ဒးချိုတ်လဝ်ရဂှ် ညးတာလျိုၚ်တအ် လလောၚ်တြးလဝ်ရ။

Ref: Aljazeera