ၜဳကလေၚ်၊ နဝ်ဝေမ်ဗာ (၇)
တွဵုရးဍုၚ်မန်၊ သၟာဗ္ၚဂၠေံကေတ်လဝ်သြန် နူတိုက်သြန်မျာန်မ လေဝ်ယျာဖောအ်ဖျိုဝ်ယျေ(မြန်မာ့လယ်ယာဖွံ့ဖြိုးရေးဘဏ်) မၞုံပွိုၚ်ဍုၚ်ၜဳက္လေၚ်တအ်ဂှ် ယဝ်ရဟွံကလေၚ်ဆာပ်သြန်ဂလေံတအ်မ္ဂး ပံက်အာဂဗုတ် ကေတ်အာအရေဝ်ရောၚ်ဂှ် နူကဵုဂကောံအုပ်ဓုပ်စဳမာန်ပွိုၚ်ဍုၚ် ကံၚ်ဇြဳပၞာန် ဘပဠကၠုၚ်လဝ်ရ။
သြန်ဂလေံ သြောံတဵုလွဳကသီု၊ သြန်ဂလေံကိုဝ်ဗေတ်ကီု သီုသြန်ဂလေံသြောံတဵုလွဳမုဟ်ကျာ ပ္ဍဲသၞာံတုဲကၠုၚ်တေံဂှ် ဂိတုနဝ်ဝေမ်ဗာ စၟတ်တ္ၚဲ ၁၅ ဏံ စွံတ္ၚဲလကြဴအိုတ်တုဲ သွက်ဂွံကၠုၚ်ကလေၚ်ဆာပ်လေဲဂှ် ဂကောံစဳမာန်အုပ်ဓုပ် ပွိုၚ်ဍုၚ်ၜဳကလေၚ်ကံၚ်ဇြဳပၞာန် ကဵုသတိပလံၚ်ဗစိုပ်လဝ်လိက် ပ္ဍဲဂိတုအံက်တဝ်ဗာ သတ္တာဟတတိယဂှ်ရ။
နကဵုသၟာဗ္ၚ ဒးဒုၚ်ပလံၚ်ဗစိုပ်လဝ် လိက်ကဵုသတိတအ်ဂှ် ပ္ဍဲအခိၚ်ကာလပိုၚ်ခြာလဝ်ဏံ ယဝ်ဟွံက္လေၚ်ဆာပ်လေဲမ္ဂး ပံက်အာဂဗုတ် ကေတ်အာအရေဝ် နကဵုသၞောဝ်ဥပဒေ မၞုံတန်တဴဒၟံၚ်ရောၚ်ဂှ် သ္ကိုပ်ဗိုလ်နိုၚ်အောၚ်ထောန် မဒှ်ညးလုပ်ဂကောံကံၚ်ဇြဳစဳမာန်အုပ်ဓုပ် ထ္ပက်စၟတ်တဲတုဲ ကဵုကၠုၚ်လဝ်ပရိုၚ်ရ။
သၟာဗ္ၚမွဲတၠဂှ်မ္ဂး လိက်ကဵုပရိုၚ်ကံၚ်ဇြဳပၞာန် ယဝ်ရဟွံကလေၚ်ဆာပ်လေဲ သြန်ဂလေံမ္ဂး ဒးဒုၚ်ရပ်ကေတ်အရေဝ် သီုကဵုမၞိဟ်ရောၚ်ဂှ် ဒှ်ဒၟံၚ်ဗီုပြၚ်ဏံဘပဠရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပရေၚ်ဘပဠကံၚ်ဇြဳပၞာန်တုဲ သၟာဗ္ၚလ္ၚဵုဂှ် ပံၚ် သွံထောံပရေၚ်ပိုၚ်ပြဳ ဝါဗ္ၚတအ်တုဲ သွက်ဂွံက္လေၚ်ဆာပ်လေဲ သြန်ဂှ် ၜိုန်ရပလေဝ်ပလေတ်ဒၟံၚ်ညးသ္ကအ်ကီုလေဝ် သၟာဗ္ၚဗွဲမဂၠိုၚ် ဒးဆဵုဂဗဒၟံၚ်ကဵု အခက်ခုဲသွက်ဂွံဆာပ်လေဲပရေ သြန်ဂတှ် တအ်ဂှ်ရ။
သၟာဗ္ၚၜဳကလေၚ်တအ်ဂှ် ပ္ဍဲကဵုရာသဳကသီုသၞာံဏံ ပ္ဍဲကဵုပွိုၚ်ဍုၚ်ၜဳကလေၚ် ဍာ်ဇၞော်ကၟိုဟ် က္တဵုဒှ်လဝ် (၃) အလန်တုဲ သြောံတဵုလွဳကသီု ဨက ဗ္ဒာဲ ၃၀၀၀၀ ဇီုကပိုက် ဒးလီုလာ်လဝ်ရ၊ ပရေၚ်ကၠောန်ပ္တိတ် ပ္ဍဲလက်ထက်ကံၚ်ဇြဳပၞာန်ဂှ် ဟိုတ်နူစရိတ်ၚုဟ်အိုတ်ဂၠိုၚ်ဂၠၚ်ဒၟံၚ်တုဲ ဒးကျဟောံဗြီုဒၟံၚ်ရ။
ပရိုၚ် – သြၚ်လောန်တိုၚ်မ်
ဗီု -MOI
sanlontai