“ကၟာတ်ဂွံလဝ် ပ္ဍဲသ္ၚိ၊ ပုၚ်လေဝ် ကၠောဝ်၊ ဍာ်လေဝ် ဟွံဂွံဟုမ်၊ လွဟ်ဇၞော်စှ်ေဒၟံၚ် ဗ္ဒာဲဗ္ဒာဲသ္ၚိဇကုရ။ ရမျာၚ်လေဝ် ဗြုညာန်ဒၟံၚ်ဟဂှ်ရ။ ပ္ဍဲကဵုသ္ၚိ မုပသာၚ်ကၞာၚ် ဟွံဂံၚ်တိတ်ပုဟ်။ ဒးအောပ်မံၚ် ပ္ဍဲဒၞာဲဂီုကၠီုဂှ်ရလေဝ်”

ဗဒိုပ်ဗၠာဲသၟိၚ်တိဍာ်ၜါသွာၚ်ကဵု သၞေဟ်ကၚ်ဒဒန် မၞုံကွာန်ၜါသွာၚ်၊ ပွိုၚ်ဍုၚ်ကျာ်မြဟ်တွဵုရးဍုၚ်မန်ဂှ် နူကဵုဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်သီကေတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၀) စဵုကဵုစၟတ်တ္ၚဲ ၁၄ ဂှ် ပေါဲဗတိုက်ၜါလ္ပာ် က္တဵုဒှ်ဒၟံၚ်ရ။

ဟိုတ်နူပေါဲဗတိုက်ဏံ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဓလေတ်ဒၟံၚ်တုဲ ဟိုတ်နူပရေၚ်ဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ကောန်ၚာ်ၜါတၠ ဒးချိုတ်လဝ်တုဲ သ္ၚိဒၟံၚ်ဟွံအောန်နူ (၁၀) မ ဒးတူပၟတ် လီုလာ်လဝ်ရ။ စပ်ကဵုအကာဲအရာ ပေါဲဗတိုက်ၜါသွာၚ်ကီု၊ ပရေၚ်ကောန်အရာပ်တအ် ဒးဒုၚ်ကၟာတ်ဂွံလဝ် ပ္ဍဲပေါဲဗတိုက်ကီု၊ ပရေၚ်ဆဵုဂဗ ဒးဂြိပ်တိတ်ကၠုၚ် အကြာတၚ်ဝါတ်ဂါတ်ကီု၊ အရီုအဗၚ် နွံဒၟံၚ်ပၟိက်တအ်ကီုတုဲ ဆက်စၠောံသၟာန်လဝ်ကဵု ကောန်ဒေသၜါသွာၚ် ညးပါဲဘဲပၞာန်မွဲတၠရ။

သြၚ်လောန်တိုၚ်မ် – ကၠာအိုတ်ဏံ ပေါဲဗတိုက်ၜါသွာၚ်ဂှ် ဗီုလဵု စဒှ်လဝ်ရော။ သ္ပတံ လ္ပာ်ကံၚ်ဇြဳပၞာန် နူအခိၚ်လဵု စသုၚ်စောဲကၠုၚ် ပၞာန်ကျာ ဗတိုက်လဝ်ရော။

ညးဒေသ – နူကဵုအခိၚ်နူဂယး ပန်နာဍဳကဝက်တေံရ ပရေၚ်ပန်ပှော်ဗုမ် ဒှ်ဒၟံၚ် အလုံမွဲတ္ၚဲရ။ စၟတ်တ္ၚဲ (၁၁) ဂှ်တှ်ေ က္ၜၚ်ကျာ ဟွံကၠုၚ်ဏီပုဟ်၊ လွဟ်ဇၞော်၊ လွဟ်ဍောတ်တ်တအ် ပန်ပှ်ောမံၚ်ဂကူစုၚ်ရ။ ကၟာတ်ဂွံလဝ် ပ္ဍဲသ္ၚိ၊ ပုၚ်လေဝ် ကၠောဝ်၊ ဍာ်လေဝ် ဟွံဂွံဟုမ်၊ လွဟ်ဇၞော်စှ်ေဒၟံၚ် ဗ္ဒာဲဗ္ဒာဲကရပ်သ္ၚိဇကုရ။ ရမျာၚ်တအ်ဂှ်တှ်ေ ဗြုညာန်ဒၟံၚ်ဟဂှ်ရ။ ပ္ဍဲကဵုသ္ၚိ မုရမျာၚ် ဟွံဂံၚ်တိတ်ပုဟ်။ ဒးအောပ်မံၚ် ပ္ဍဲကဵုဒၞာဲဂီုကၠီုဂှ်ရလေဝ်။

သြၚ်လောန်တိုၚ်မ် – ကြဴနူပေါဲဗတိုက်ဒှ်တုဲ အကာဲအရာညးဒေသ ကောန်ကွာန်တအ် ဒးဒုၚ်ကၟာတ်ဂွံလဝ် ဗီုလဵုဂွံတိတ်ကၠုၚ် အကြာတၚ်ဝါတ်ဂါတ်ရော။

ညးဒေသ – ပိုဲဒးဒုၚ်ကၟာတ်ဂွံလဝ်ဂှ် စၟတ်တ္ၚဲ (၁၀) ကဵု စၟတ်တ္ၚဲ (၁၁) ရ။ စိုပ်စၟတ်တ္ၚဲ (၁၂) ဂှ်မှ ဂွံတိတ်ဂွံရ။ အခိၚ်တိတ်ကၠုၚ်ဂှ်လေဝ် ရံၚ်အကာဲအရာတုဲ ဒးတိတ်ဂှ်ရတှ်ေ အခိၚ်ဂှ် ပရေၚ်ပန်ပှော်ဟၟဲဟီုတှ်ေ ဗီုဂှ်ရလေဝ် ၜေတ်တိတ်အာ အတိုၚ်ဂှ်ရ။ ပၞော်တိတ်ဂွံဂှ် ယျတ်တိတ်ကၠုၚ် ဂၠိုၚ်ၚ်ကဵုအလန်ဂှ်ရ ခိုဟ်မံၚ် ဟွံဒှ်ပရေၚ်ပန်ပှော် ယဝ်ဒှ်ပရေၚ်ပန်ပှော်တှ်ေ တိတ်ဂွံဟွံသေၚ်ပုဟ်။

သြၚ်လောန်တိုၚ်မ် – ပ္ဍဲကဵုပေါဲဗတိုက်ဏံ စပ်ကဵုအကာဲအရာသ္ၚိဒၟံၚ် ဒးလီုလာ်ကဵု အကာဲအရာကောန်အရာပ်တအ် ဇီုကပိုက်ဒးလဝ်တုဲ ဟီုလဴထ္ၜးကဵုညိ။

ညးဒေသ – ပရေၚ်လီုလာ်ဂှ်တှ်ေ ဂၠိုၚ်မံၚ်။ သ္ၚိလ္ၚဵုဂှ်တှ်ေ ကၟဳ၊ ဗ္ဒၚ်တအ် မုဟၟဲရပုဟ်။ ပ္ဍဲစၟတ်တ္ၚဲ (၁၁) ဂှ်တှ်ေ တူလဝ်ပၟတ် ဟၟဲကွေံကွေံဏီပုဟ်။ လွဟ်ဇၞော်စှ်ေလဝ်ရ။ လီုလာ်လဝ်။ ၜိုတ်ဏံဓဝ်ရ။ ပ္ဍဲကဵုစၟတ်တ္ၚဲ (၁၂) ဂှ် ကောန်ကွာန်တအ်တိတ်တုဲအိုတ်မှ ပရေၚ်ပၟတ်တူ သ္ကာတ်မြဟ်ကၠုၚ်ရ။ ပရေၚ်တူပၟတ်ဂှ် စဒှ်လဝ်နူကဵုဂှ်ရ။

သြၚ်လောန်တိုၚ်မ် – ဟိုတ်နူပေါဲဗတိုက်တုဲ စပ်ကဵုအခက်ခုဲ ညးဍုၚ်ကွာန်တအ်ဒးဆေၚ်ဒၟံၚ်မုက်ဂှ် သောၚ်ထ္ၜးကဵုညိ။

ညးဒေသ – အခက်ခုဲဂှ်တှ်ေ အကာဲအရာပရေံမံၚ်။ မၞိဟ်အာယုက်ဇၞော်ဇၞော်တအ်တှ်ေ ကွာ်ဂၠံၚ်ဟွံမာန်ရပုဟ်။ မၞိဟ်ယဲဝေဒနာနွံဒၟံၚ်တအ်တှ်ေ အကြာရမျာၚ်ဏံ ညးတအ်လေဝ် ဒးပၠံၚ်ဒၟံၚ်လမျီု ညးသ္ကအ်ရ။ ကြေပ်ဂြတ်ကွေံကွေံမွဲတဲ။ ပုၚ်လေဝ် ဟွံဂွံစပုဟ်။ ဗီုဏံရ။ ၜိုတ်နွံကဵုနွံ စထောံဖၞံကြုက်သကှ်တအ်၊ ကဵုခၟာဲစာၚ် ဗီုပြေပြံၚ်ရ ဒးစသုၚ်ဒၟံၚ်။ ဂွံဍုန်ပုၚ်သွလေဝ် ဟွံပြေၚ်ပြံၚ်ပုဟ်လေဝ်။ ပၟတ်လေဝ် ဟွံကၠုၚ်ပုဟ်။ သီုဖအိုတ်ဂှ် ဒးမံၚ်ဒၟံၚ် သ္ၚိတ်သ္ၚိတ်ဇြဇြ ညးသ္ကအ်ရ။ ညးမွဲလေဝ် ဟွံဂံၚ်မံၚ်ပုဟ်။ ဟွံဂံၚ်ကၠောန်ပုဟ်။

သြၚ်လောန်တိုၚ်မ် – နူလ္ပာ်ကံၚ်ဇြဳပၞာန် ပရေၚ်ပန်ပှော်ကဵုက္ၜၚ်ကျာ ကၠုၚ်ပန်ပှော်လဝ် ဗီုပြၚ်လဵုရော။

ညးဒေသ – ပန်လဝ်ကဵုက္ၜၚ်ကျာဂှ်တှ်ေ ပ္ဍဲစၟတ်တ္ၚဲ (၁၂) ဂှ် ဂၠိုၚ်မံၚ်။ ပန်ဒၟံၚ်ကြပ်ဒှ် သီုအလုံမွဲတ္ၚဲရ။ အခိၚ်ဂှ်တှ်ေ ပိုဲတအ်လေဝ် ဂြိပ်တိတ်ကၠုၚ်ယျလေဝ်။ ပန်ဖျေံနၚ် နူလဵုရောဂှ် ဟွံတီချိုတ်တ်ပၠိုတ်တ်ပုဟ်။ ညးဂှ်လေဝ် ဟၟဲရပုဟ်။ ပရေၚ်လီုလာ်ဂှ်တှ်ေ ဂၠိုၚ်ဒၟံၚ်ကွေံကွေံဏောၚ်။

သြၚ်လောန်တိုၚ်မ် -အလန်လကြဴအိုတ်ဏံ ညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်ဘဲပၞာန်တအ် နွံဒၟံၚ်ပၟိက် အရီုဗၚ်ဗီုလဵုရော။

ညးဒေသ – အခိၚ်လၟုဟ်ဂှ် သွက်ညးတအ် နွံဒၟံၚ်ပၟိက်ဂှ်တှ်ေ ညးတအ်လ္ၚဵုဂှ်လေဝ် ဂြိပ်ရ။ မၞိဟ်ကြပ်ကဵုမုဟ်ဍုၚ်လေဝ် ဂြိပ်ရ။ လ္ပာ်ဂြိုပ်မၞိဟ်ပြေပြံၚ်တအ်လေဝ် ပ္ဍဲကဵုကွာန်ဒဵု ကဵုဒၞာဲဗၠးမာန် ညးတအ်ဂြိပ်ဒၟံၚ် ညးသ္ကအ်ရ။ အခိၚ်လၟုဟ်ဏံ သွက်ညးတအ် နွံဒၟံၚ်ပၟိက်ဂှ်တှ်ေ ဇွောံမစၞစ၊ ဗၞိက်သကှ် ဂဥုဲဇဗတအ်ရလေဝ်။ ဒၞာဲမံၚ်ဂှ်တှ်ေ ၜိုတ်ဒှ်ကဵုဒှ် မံၚ်ဒၟံၚ်ညးသ္ကအ်ရလေဝ်။