ထဝါဲ၊ နဝ်ဝေမ်ဗာ ၁၆
ကြဴနူပရေၚ်ပန်ပှော် မက္တဵုဒှ်လဝ် ဗ္ဒါဲသၞေဟ်ကၚ်စၟဳတ် (အိမ်ရှေ့ပြင်) ဂၠံၚ်လုပ်ဍုၚ်ထဝါဲ၊ ရးတၞၚ်သဳဂှ်တုဲဂှ် ကောန်ကလောန်ဝါဗ္ၚ ၄ တၠ ဒးဒုၚ်ရပ်ဒက်လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုနဝ်ဝေမ်ဗာ ၁၀ အခိၚ်နူဂယး ၜိုတ် ၁၀ နာဍဳဂှ် ကောန်ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ကုဂကောံဒပ်ကံၚ်ဇြဳပၞာန် ပါလုပ်သီုကဵုဗၠာဲသၟိၚ်ထိၚ်ယာန် မစၟဳတ်ဒၟံၚ် ညးဍုၚ်ကွာန်အာတရဴတံဂှ်ရ။
ဟိုတ်နူပရေၚ်ဗ္တိုက်တံဂှ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ် ၁၀ မိနေတ်ပြၚ်တုဲ လ္ပာ်ကံၚ်ဇြဳပၞာန် အခိၚ်ဟွံသ္ပသတိ မဒးဒုၚ်ဗ္တိုက်လဝ်ဂှ် မရေၚ်ဇီုကပိုက်တံ နွံဒၟံၚ်ရောၚ် သ္ဂးရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုပရေၚ်ပန်ပှော်ဏံဂှ် လ္ပာ်ကံၚ်ဇြဳပၞာန် ၃ တၠ ဇီုကပိုက်အာလဝ်ရောၚ် ဟီုဂးဒၟံၚ်အိုတ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ကြဴနူပရေၚ်ပန်ပှော်တုဲဂှ် ဒပ်ကံၚ်ဇြဳပၞာန်ဂှ် သ္ဇက်ဒးသၟာန်သၟုက်စၟဳတ်နွံတုဲ ရပ်ဒက်ဏာလဝ် မၞိဟ်တြုံ ၂ တၠ၊ မၞိဟ်ဗြဴ ၂ တၠ မတဵုလွဳဒၟံၚ်သၞေဝ်ကေဝ် ပ္ဍဲကဵုခံက်ဝါဗ္ၚ ဗ္ဒါဲသၞေဟ် (အိမ်ရှေ့ပြင်) ဂှ်ရ။
ညးဒေသ မရပ်ဒက်ဏာတံဂှ် ကံၚ်ဇြဳပၞာန် ရပ်ဒက်ဏာ ဒၞါဲလဵုရောဟီုဂှ် ဂြောဝ်ဂတာညးတံ ဗက်ဂၠိုက်ဂၠါဲကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီပုဟ်ဂှ် ဂွံတီကေတ်ရ။
ပ္ဍဲရးတၞၚ်သဳဂှ် အပ္ဍဲကာလသီအဝဵုဏံ ဟိုတ်နူဒပ်ကံၚ်ဇြဳပၞာန် ထ္ၜးဟိုတ်နာနာသာ် မရပ်ဒက်ဒၟံၚ်ဂှ်တုဲ ညးဒေသ ၁၇၆၀ တၠပြၚ် ဒးဒုၚ်ရပ်ဒက်လဝ်ရောၚ် ဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
လိက်ဗီု−ဒၞါဲဒှ်ပရေၚ်ပန်ပှော်ထဝါဲ
sanlontai