ပ္ဍဲတွဵုရးဍုၚ်မန် ဟိုတ်နူကၠေၚ်စက်ပိုတ်တုဲ ညးဒေသတံ ဒှ်ဒၟံၚ်ဒဒိုက်

မတ်မလီု၊ နဝ်ဝေမ်ဗာ ၁၆

ပ္ဍဲဆေၚ်ကၠေၚ်စက် မၞုံအပ္ဍဲတွဵုရးဍုၚ်မန် ဗွဲမဂၠိုၚ် ဟိုတ်နူကၠေၚ်စက် ပိုတ်ဒၟံၚ်ဂှ်ရ ညးဍုၚ်ကွာန်ဂမၠိုၚ်ဝွံ သွက်ဂွံအာကမၠောန်လၟေၚ်တ္ၚဲဂှ်ကဵု သွက်ဂွံရေၚ်တၠုၚ်ကမၠောန်တံရဂှ် ဒှ်ဒၟံၚ်ဒဒိုက်ယျဂှ် ညးဒေသတံ ကေုာံ တၠကမၠောန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကၠေၚ်စက်ပိုတ်အိုတ်ဂှ် စတုဲဒးဂဗလဝ် နူကဵုဂိတုနဝ်ဝေမ်ဗာ သတ္တာဟပထမဂှ်တုဲ ဗွဲကြဴဏံ ပိုတ်အိုတ်ကၠုၚ် ပရေံပရေံတုဲ သွက်ဂွံဂွံကၠေၚ်စက်တံဂှ် ဒးမၚ်ရာန်ဒၟံၚ် ပ္ဍဲကဵုဆေၚ်ကၠေၚ်တံ အခိၚ်ဗွဲမလအ်လဂှ် က္တဵုဒှ်ဒၟံၚ်ရ။

ကၠေၚ်စက်ပိုတ်ဂှ်ဝွံ လ္ပာ်ကံၚ်ဇြဳပၞာန်တံ ၜိုတ်နွံပၟိက်ဂှ် ဟွံသွံကဵု ကၠေၚ်စက်တံဂှ်မွဲသာ် သွံကဵုဒၟံၚ် နကဵုဗၞတ်ဗ္ၜတ်ဂှ်ကီု၊ ကရောံတိဍာ်ဟွံညိၚ်ဝတ်ဂှ် ဟိုတ်နူအခက်အခုဲ ဂၠံၚ်ဍာန်တံဂှ်တုဲ ပရေၚ်ပလံၚ်ဗစိုပ်တံ လအ်လဂှ်ကီု၊ ဒၟါနူဇြဟတ်ရာန် သၠုၚ်တိုန်ဒၟံၚ်ဂှ်ရ ကၠေၚ်ပိုတ်အိုတ်တံ က္တဵုဒှ်ဒၟံၚ် ပရေံပရေံရ။

တၠကမၠောန် SME မွဲတၠဂှ် ဟိုတ်နူကေတ်ကၠေၚ်စက်တံ ဟွံဂွံဂှ်ရ ရုၚ်ကမၠောန်တံ ဒးဒေါအ်ဇူလဝ် ယာယဳယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကၠေၚ်ဂှ်တှ်ေ ပိုတ်ဒၟံၚ် အလုံဍုၚ်မွဲရ။ ကျာတ်အာရ။ ဒၞါဲဂွံဂှ်ဂွံ ဒၞါဲဟွံဂွံဂှ် ဟွံဂွံပုဟ်။ ဗီုပြၚ်သာ်ဏံနွံ။ လၟုဟ်ဂှ်တှ်ေ ရာန်ကၠေၚ်ဟွံဂွံတုဲ ဒေါအ်လဝ်ကမၠောန်ရ။ ရာန်ကၠေၚ်ဟွံဂွံပုဟ်လေဝ်။ ပရေံဂှ် ပရေံဒၟံၚ် ကြပ်ဖအိုတ်ရ။ ဇီုကပိုက်ဂှ်တှ်ေ ဇကုမွဲဓဝ်ဟွံသေၚ်ပုဟ်။ ပြဟ်ဟ်ဏံ ရာန်ကၠေၚ်ဟွံဂွံတုဲ ဇူလဝ်ရ“ သာ်ဝွံ သ္ဂးရ။

ကမၠောန် SME တံဝွံ ဒၟါနူကၠေၚ်စက်ပိုတ်ကၠုၚ်တံဂှ်ကဵု ဟွံဂွံပၟတ်ဓာတ်လလဳ လၟေၚ်ၚ်တံဂှ်တုဲလေဝ် ကမၠောန်ဂမၠိုၚ် ဂေတ်ဂြိပ်ဟွံမာန်ရဂှ်တုဲ ယဝ်ရဒးဂဗအာ ပြသၞာလၟုဟ်ဏံ ဍာ်ဇမၠိၚ်မ္ဂး ဒးဂဗဒၟံၚ် ကဵုအကာဲအရာ ဒးဒေါအ်ဇူကမၠောန်တံရ။

ညးလိၚ်ဒဳယာန်မွဲတၠဂှ်လေဝ် သွက်ဂွံဂွံကၠေၚ်စက်ဂှ် ဒးဗက်ဂြိပ်ရာန်ဒၟံၚ် ပ္ဍဲဆေၚ်သွံကဵုတံဂှ်တုဲ သွက်ဂွံကၠောန်ကမၠောန် တ္ၚဲယးဂတတေံရဂှ် ခက်ခုဲကၠုၚ်ရရောၚ် ဟီုရ။

“လၟုဟ် ဆေၚ်စုတ်ကၠေၚ်ဂှ် မွဲဆေၚ်မှဟွံမွဲပုဟ်။ အဲလေဝ် ဗက်ဂၠါဲဒၟံၚ် ကၠေၚ်အိုတ်ရဏောၚ်။ ဆေၚ်ကၠေၚ်ဂှ်ဆဵု။ သီုဖအိုတ်ဂှ် ထ္ၜးဒၟံၚ်ကဵုတဲ ကၠေၚ်ဟွံမွဲသၟးရ။ ရပ်လဝ်သြန်ကဵုဂွဳရဂှ် ဟွံဂွံကၠေၚ်ပုဟ်။ လၟုဟ် ကၠေၚ်ဓာတ်အိုတ်အာမ္ဂး စဴသ္ၚိစွံကာတုဲ တိတ်ဟွံဂွံရပုဟ်။ ၜိုတ်လဵုကျာတ်ရောဟီုတှ်ေ သွက်ဂွံဂၠါဲသြန် သွက်တ္ၚဲယးတ္ၚဲဂတတေံဂှ် သာ်လဵုမှ ကၠောန်ဟွံဂွံပုဟ်။ ယဝ်ရ ကၠေၚ်ဟွံမွဲရတှ်ေ” သာ်ဝွံ သ္ဂးရ။

ကၠေၚ်စက်ပိုတ်အိုတ် အပ္ဍဲတွဵုရးဂှ်ဝွံ ဂကူကၠေၚ်ဓာတ် 92 ကဵု 95 တံ ပိုတ်ဂၠိုၚ်အိုတ်တုဲ ပ္ဍဲကဵုဆေၚ်သွံကၠေၚ်စက်လ္ၚဵုတံဂှ် ပိုတ်ဒၟံၚ် စနူကဵုကၠေၚ်ဒဳဇြေဝ်ရ။

ညးဒေသမွဲတၠဂှ် ပ္ဍဲကဵုဆေၚ်ကၠေၚ်စက်တံဂှ် ကၠေၚ်စက်ဟွံမွဲဂှ်ရ ဒးရာန်ဒၟံၚ် ပ္ဍဲကဵုဆေၚ်သ္ကဲဂၠံၚ်တံ မွဲဗူ ၃၀၀၀ ဒ္ကေဝ်တုဲ ဒးဆေၚ်ဒၟံၚ်မုက် ကုဒဒိုက်နာနာသာ်ရောၚ်ဂှ် ဟီုရ။

“ဒးရာန်ဒၟံၚ် သ္ကဲသ္ကဲဂၠံၚ် မွဲဗူ ပိလ္ၚီ။ ညအ်ဂှ် ဟွံမိက်သွံညးသ္ကအ်ပုဟ်။ ဟီုတိုန်ဂှ်တှ်ေ ရာန်ကၠေၚ်ဟွံဂွံရပုဟ်၊ ဟွံသွံရပုဟ် သာ်ဏံရ။ ၚုဟ်ပၟတ်မဳတာဂှ်လေဝ်ဒးကဵု၊ ၚုဟ်ဍာ်ဂှ်လေဝ် ဒးကဵု။ ကွဳစက်ဂှ် ဂွံဒဳဂှ် ကၠေၚ်ဟွံမွဲ။ အကြာဏံဂှ် မသကလောဍေံတံရ သွံကဵုတုဲ ဇကုတံ အာရာန်မ္ဂး ဟွံမွဲရပုဟ် ကယှ်ထ္ၜးတိုန်တဲတုဲ ဟီုတိုန်ရ။ စိုပ်ဗ္ဒါဲဂှ်မ္ဂး ကၠေၚ်အိုတ်အာယျ၊ ဟွံသွံကဵုကၠေၚ်တံ၊ ဟီုတိုန်သာ်ဏံဂှ်နွံရ။ ဘဝပိုယ်တံဂှ် ဒဒိုက်တံဏံ ဒှ်ကၠုၚ်သာ်လဵုရော“ သာ်ဝွံ သ္ဂးရ။

တွဵုရးဍုၚ်မန်ဝွံ အပ္ဍဲကာလဒပ်ပၞာန်သီအဝဵုဏံ ဒးဆေၚ်လဝ်မုက် ကုကၠေၚ်စက်ပိုတ်အိုတ်ဂှ် ဟွံအောန်နူကဵု ပိဝါတုဲ အလန်ဏံဂှ် ဒးဂဗဒၟံၚ် ကၠေၚ်စက်ပိုတ် ပရေံအိုတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ