ကံၚ်ဇြဳပၞာန် ပဆုဲပြံၚ်လဝ် သီုအလုံဗဒိုပ်ထံၚ်စာတ်ထုမ်ခါန်ကျေန်တၞၚ်သြဳမွဲ

တၞၚ်သြဳ၊ နဝ်ဝေမ်ဗာ(၂၈)

ဟိုတ်နူပရိုၚ်ဂကောံဇြဟတ်ပၠန်ဂတးတအ် လုပ်စိုပ်ဗတိုက်တုဲ သီုအလုံဗဒိုပ်ထံၚ်စာတ်ထုမ်ခါကျေန် မၞုံကွာန်ထုမ်ခါကျေန်၊ ပွိုၚ်ဍုၚ်တၞၚ်သြဳ၊ ရးဒေသဇၞော်တၞၚ်သြဳမွဲ ကံၚ်ဇြဳပၞာန် ဆုဲပြံၚ်အာလဝ်ရဂှ် ဂွံတီကေတ် နူဒပ်ပံၚ်ကောံစဵုဒၞာဒေသတအ်ရ။

ဒပ်ကံၚ်ဇြဳပၞာန်ဇြဟတ်ဒပ်နွံ (၃၀) ပြၚ်ဂှ် မွဲကရောံကဵုယာဉ်ကွဳစက်ဂီုကၠီုမွဲစွံ ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၆) တ္ၚဲတုဲကၠုၚ်တေံ သီုညးယိုက်ဝန် မၞုံထံၚ်စာတ်ထုမ်ခါကျေန်တအ်ဂှ် ပဆုဲပြံၚ်လဝ်ကောန်ထံၚ်တအ် ဇရေၚ်ထံၚ်စာတ်ကျောၚ်ဖျူရ။

ဗဒိုပ်ထံၚ်စာတ်ထုမ်ခါကျေန်ဂှ် သ္ၚောဲခြာနူဗျူဟာပၞာန်တၞၚ်သြဳ ၜိုတ် (၃) မိုၚ်ဟေၚ်ဒှ်တုဲ ဟိုတ်နူကဵုဂီုကၠီုဟွံမာန်ဂှ်ရ ဒးပဆုဲပြံၚ်ဏာလဝ် သီုအလုံဗဒိုပ်ထံၚ်စာတ်မွဲ ဒှ်မာန်ရဂှ် ညးတာလျိုၚ်လလောၚ်ပရိုၚ် KTLA – TCJF ကိုဝ်သိုၚ်ညဳ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

​ဃောပဆုဲပြံၚ်ဒၟံၚ်ဗဒိုပ်ထံၚ်စာတ်ဂှ် ရေၚ်ယာဉ်ကွဳစက်ကံၚ်ဇြဳပၞာန် ကဵုဒၟံၚ်ဂီုကၠီုဂှ် ဂကောံဇြဟတ်ပၠန်ဂတးတအ် ဖံက်ခတိုဟ်လဝ်မာၚ် အကြာကွာန်ရာမ်ဗိုလ်ကဵု ကွာန်ကာမ်တိုဝ်တုဲ ပရေၚ်ဇီုကပိုက် ဒးချိုတ်လဝ် နွံမာန်ရဂှ် ဟီုလဝ်ရ။

အခိၚ်လၟုဟ်ဏံ ဒပ်ပံၚ်ကောံ ဂကောံဇြဟတ်ပၠန်ဂတးတအ် ထိၚ်ဒဝ်လဝ် မွဲဗွိုၚ်ဗဒိုပ်ထံၚ်စာတ်ထုမ်ခါကျေန်ဂှ်တုဲ ပ္ဍဲကဵုဗဒိုပ်ထံၚ်စာတ်ဂှ် ကောန်ဒပ်ကံၚ်ဇြဳပၞာန်လ္ၚဵု ဖျေံလဝ်ဗဒိုပ် နွံဒၟံၚ်ရဂှ် ဂွံတီကေတ်ရ။

ဒပ်ကံၚ်ဇြဳပၞာန်ဂှ် ဟိုတ်နူဖျေံလဝ်ဗဒိုပ် ပ္ဍဲဗဒိုပ်ထံၚ်စာတ်ဂှ်တုဲ အကာဲအရာပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ အခိၚ်ဟွံရုဲ ပေါဲဗတိုက်သ္ကာတ်မြဟ်ကၠုၚ်မာန်ဒၟံၚ်ရဂှ် ဂွံတီကေတ် အတိုၚ်လဟီု ဂကောံဇြဟတ်ပၠန်ဂတးတအ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၅) တုဲကၠုၚ်တေံလေဝ် ဒပ်ကံၚ်ဇြဳပၞာန် မၚ်ဒၟံၚ်ကၚ် ပ္ဍဲကဵုဗဒိုပ်ထံၚ်စာတ်ထုမ်ခါန်ကျေန်ကဵု ကၠအ်သတ်ဗြဴကၠေၚ်ကမ္ဘောဇြဂှ် ဟိုတ်နူဒးဒုၚ်ဗတိုက်လဝ်တုဲ ဟွံအောန်နူ (၃) တၠ ဒးချိုတ်လဝ်ရ။

ပ္ဍဲဍုၚ်တၞၚ်သြဳ မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒပ်ကံၚ်ဇြဳပၞာန် ဒးဗလးလဝ်တဲ တိဍာ်ဗွဲမဂၠိုၚ်တုဲ ဟိုတ်နူပရိုၚ်ပေါဲဗတိုက်သီဍုၚ်တအ်တုဲ ပ္ဍဲလ္တူဍုၚ်ဂှ် ပလေဝ်ပလေတ်လဝ် ပၞာန်ဒုၚ်ရဂှ် ဂွံတီကေတ် နူညးဒေသတအ်ရ။

ပရိုၚ် – သြၚ်လောန်တိုၚ်မ်

ဗီု -Social Media