သဵု(လ်) ၊ နဝ်ဝေမ်ဗာ ၂၆
သွက်ဂွံကလေၚ်စ ကောံဓရီု က္ဍိုပ်သ္ကိုပ်ကြုက်၊ ဂျပါန် ကေုာံ ကိုဝ်ရဳယျာသၠုၚ်ကျာတံ သ္ဂောံဆဵုဂဗညးသ္ကအ်ဂှ်တုဲ ကလုတ်တမာန်ကဆံၚ်လ္တူ မဆေၚ်စပ်ဂမၠိုၚ်ဝွံ သ္ဂောံဆဵုဂဗ ပ္ဍဲဍုၚ်ကိုဝ်ရဳယျာသၠုၚ်ကျာနွံဂှ် ဂွံတီကေတ်ရ။
ကောံဓရီုပိဍုၚ်ဏံ မစလဝ် ပ္ဍဲသၞာံ ၂၀၀၈ လောန်ကၠုၚ်တေံဂှ် ဟိုတ်နူဘဲကပ်ကဝ်ဝေဒ်ကဵု အကာဲအရာတၞဟ်သ္အာၚ်တံတုဲ နူကဵုသၞာံ ၂၀၁၉ တေံဂှ် ကၠောန်ဗဒှ်ဟွံမာန်ဟဂှ်ရ။
ဍုၚ်အာယှကဆံၚ်လ္တူပိဍုၚ်ဝွံ ပ္ဍဲကဵုကဏ္ဍဆေၚ်စပ်ကဵုပရေၚ်ပိုန်ဒြပ် ကေုာံ ယေန်သၞာၚ်တံဂှ် စၟတ်ကေတ်လဝ် နဒဒှ်မိဿဟာဲညးသ္ကအ်ကီုလေဝ် အပ္ဍဲပၞာန်ဂၠးတိဂှ် ဟိုတ်နူပြဝဂျပါန် ဓဇန်ဓဇန်တံဂှ်ကီု၊ ပရေၚ်ပြိုၚ်ပ္ကာန် အကြာကြုက် ကေုာံ အမေရိကာန်တံကီု၊ ဟိုတ်နူအစဳဇန်နျူကလဳယျာ ကိုဝ်ရဳယျာသၟဝ်ကျာတံဂှ်တုဲ ပရေၚ်ဆက်ဆောံတံဂှ် ပရေံကၠုၚ်ရ။
အခိၚ်လၟုဟ် ဝန်ဇၞော်ကာဍုၚ်သ္အာၚ်ဂမၠိုၚ်ဝွံ သွက်ဂွံဒစးဒုၚ်ပလေဝ်ပလေတ် ပေါဲသဳကၠဳ က္ဍိုပ်သ္ကိုပ်မဆေၚ်စပ်တံဂှ်ကီု သီုကဵုသ္ဂောံသဳကၠဳ ကိစ္စအပ္ဍဲဒေသတံကဵု ကိစ္စဍုၚ်သ္အာၚ်တံဂှ်တုဲ သ္ဂောံဆဵုဂဗအာ ပ္ဍဲဍုၚ်ကိုဝ်ရဳယျာသၠုၚ်ကျာ နွံဒၟံၚ်ရ။
ကိုဝ်ရဳယျာသၠုၚ်ကျာ ကေုာံ ဂျပါန်တံဝွံ ဒှ်ဍုၚ်မဟာမိတ် အပ္ဍဲဒေသအဓိက အမေရိကာန် ဍုၚ်ဒစဵုဒစးကြုက်ဂှ်တုဲ ပ္ဍဲကဵုဗလးတိ ဍုၚ်တံဏံဂှ် ဒုၚ်လဝ်တဲ ကောန်ဒပ်အမေရိကာန် ၈၀၀၀၀ ဂှ် ဂွံတီကေတ်ရ။
ပရေၚ်ဆက်ဆောံ ဂျပါန် ကေုာံ ကိုဝ်ရဳယျာသၠုၚ်ကျာတံဝွံလေဝ် ဟိုတ်နူပြသၞာ သ္ပကိုဝ်လိုဝ်နဳ ကုတ္ကအ်ကိုဝ်ရဳယျာဂှ်တုဲ ဗွဲကြဴဏံ ပရေၚ်ဆက်ဆောံ ဆုတ်ယုတ်စှ်ေကၠုၚ်ဂှ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
ဆ္ဂး ဟိုတ်နူအစဳဇန် သမ္မတကိုဝ်ရဳယျာသၠုၚ်ကျာ မရေၚ်တၠုၚ်ဒၟံၚ် သ္ဂောံသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် သွက်ဂွံရပ်စပ်သောၚ်ကလး ပရေၚ်ဘပဠကိုဝ်ရဳယျာသၟဝ်ကျာတံဂှ်ကီု သီုကဵုပြသၞာတၞဟ်သ္အာၚ်တံဂှ်တုဲ ပရေၚ်ဆက်ဆောံၜါဍုၚ် ကလေၚ်ခိုဟ်ကၠုၚ်ဂှ် ဂွံတီကေတ်ရ။
ဂျပါန် ကေုာံ ကြုက်တံဝွံလေဝ် စပ်ကဵုပြဝဓဇန်ဂျပါန်တံ အပ္ဍဲပၞာန်ဂၠးတိဒုတိယတေံဂှ်ကဵု ကိစ္စတ္ကအ် ၜဳကြုက်ဗၟံက် သီုၜါလ္ပာ်မပိုၚ်ပြဳလဝ်ဂှ်တုဲ ပရေၚ်ကယျာန်ဓဝါန်တံ နွံဒၟံၚ်ရ။
ခြာဟွံလအ်ဏံဂှ်လေဝ် ဍုၚ်ကြုက်ဝွံ နဒဒှ်ဒစဵုဒစး ကုပရေၚ်ဗလးပ္တိတ်ဍာ်ပရေံပရေံ နူကဵုရုက်စက်ကဵုဇြဟတ်ဓာတ်နျူကလဳယျာ ဂျပါန်တံဂှ်တုဲ တာဒၞါလဝ် ပရေၚ်ပၠောပ်ပ္တိုန်စၞၜဳဂျပါန်တံရ။
Ref: AP
sanlontai