ဒပ်ကၚ်ကံၚ်ဇြဳပၞာန် ပ္ဍဲရေဝ် ဒးဒုၚ်ဗတိုက်လဝ်တုဲ ပရေၚ်ဇီုကပိုက် ချိုတ်ဂျိုၚ် နွံမာန်

ရေဝ်၊ နဝ်ဝေမ်ဗာ (၂၈)

သုၚ်စောဲက္ၜၚ်ကျာမသက္ကုမၞိဟ်ဒဳတုဲ ထောံဖျေံလဝ်ဗုမ်ဗတိုက်လဝ် ဒပ်ကံၚ်ဇြဳပၞာန် ဖျေံလဝ်သ္ဇိုၚ်ဒပ်ကၚ် ပ္ဍဲကဵုတောၚ်ချောန်ဂျဳကဵု ဝေတ်တောၚ် ပွိုၚ်ဍုၚ်ရေဝ် တွဵုရးဍုၚ်မန်တအ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံမဟာမိတ် ပၠန်ဂတးပံၚ်ကောံတအ်ရ။

ဒပ်ကၚ်ကံၚ်ဇြဳပၞာန်တအ်ဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၅) တုဲကၠုၚ်တေံဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် ထောံဖျေံလဝ် လွဟ်ဇၞော် ၆၀-မမ နူကဵုအာကာသ (၆) မတုဲ ဗတိုက်လဝ် ၜါဝါရ။

ပ္ဍဲကဵုပရေၚ်ဗတိုက်ပန်ဏံ လွဟ်ဇၞော်ဒတုံစှ်ေပါ်ခတိုဟ်လဝ် ပ္ဍဲဇရေၚ်ဒၞာဲကံၚ်ဇြဳပၞာန် မၚ်ဒၟံၚ်ကၚ်တုဲ ပရေၚ်ဇီုကပိုက် ဒးချိုတ်လဝ် နွံရဂှ် ညးတာလျိုၚ်ကရောၚ်ပၞာန်ဒဝ်နမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်။

ပ္ဍဲကဵုပရေၚ်ဂကောံဇြဟတ်ပၠန်ဂတးတအ် ထောံဖျေံလဝ်ဗုမ်ဏံ ဒဒှ်ရကောန်ဒပ်ကံၚ်ဇြဳပၞာန် ဇီုကပိုက် ဒးချိုတ်လဝ် (၅) တၠ နွံဂှ် ၜိုန်ဂွံတီကေတ်လဝ်ကီုလေဝ် ဆက်လ္ၚတ်ဂၠိုက်ဂၠာဲဒၟံၚ် အကာဲအရာဗလးမုက်တိဖိုဟ်ရဂှ် ဟီုလဝ်ရ။

ပရေၚ်ချဳဒရာၚ်ပၞာန်ဏံဂှ် ဒပ် TPLF တၞၚ်သြဳ ပါလုပ်သီုကရောၚ်ပၞာန်ဒဝ်န၊ ဒပ်ပၠန်ဂတးဍုၚ်မန် MSRF ၊ ABSDF ၊ YAF တအ် ပံၚ်တောဲဗတိုက်လဝ်တုဲ အခိၚ်ချဳဒရာၚ်ပၞာန် လအ်လဝ် ပွိုၚ်မွဲနာဍဳကဝက်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ဒပ်ကံၚ်ဇြဳပၞာန်ဂှ် ပ္ဍဲကဵုပေါဲဗတိုက်ဒှ်လဝ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၂၀) တုဲကၠုၚ်တေံဂှ် ကောန်ဒပ်ကံၚ်ဇြဳပၞာန် ဗ္ဒာဲ (၄၀) ဒးချိုတ်လဝ်တုဲဂှ် ကေတ်ကၠုၚ်ဒၞာဲမၚ်ဒၟံၚ်ကၚ် ပ္ဍဲမွဲဒမြိပ်ဗလဲဒဵုတအ် နွံကၠုၚ်ရ။

ပ္ဍဲလ္တူဍုၚ်ရေဝ်လေဝ် ဟိုတ်နူပရိုၚ်ပေါဲဗတိုက်ဂကောံဇြဟတ်ပၠန်ဂတးတအ် သီဍုၚ်တုဲ သၠုၚ်ပ္တိုန်လဝ် ပရေၚ်ဂီုကၠီုတုဲ ပလေဝ်ပလေတ်လဝ် သွက်ပၞာန်ဒုၚ်ခိုၚ်ၚ်တုဲ ဆက်ကၠောန်ရေၚ်တၠုၚ်ဒၟံၚ် ပရေၚ်ဂၠိုက်ဂၠာဲစၟဳစၟတ် ဆက်ဆက်ရဂှ် ဂွံတီကေတ် အတိုၚ်ကောန်ဍုၚ်ရေဝ်တအ် ဟီုထ္ၜးလဝ်ရ။

ပရိုၚ် – သြၚ်လောန်တိုၚ်မ်

ဗီု -ဒပ်ပၠန်ဂတးမဟာမိတ်ပံၚ်ကောံ