ပ္ဍဲပေါဲဗတိုက်ၜါသွာၚ် သ္ကိုပ်တံဒပ်ကံၚ်ဇြဳပၞာန်မွဲတၠ ဒးချိုတ်လဝ်

ကျာ်မြဟ်၊ နဝ်ဝေမ်ဗာ(၂၉)

ပ္ဍဲပေါဲဗတိုက်ၜါသွာၚ်၊ ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ် ဒုသ္ကိုပ်ဗိုလ်ဇၞော် မျိုဝ်ကိုဝ်ကိုဝ်ဝေန် မဒှ်သ္ကိုပ်တံဒပ်ပၞာန်တိုက် ကံၚ်ဇြဳပၞာန် စၟတ် (၅၅၇) ဒးသနိုက်ဗာတုဲ ဒးချိုတ်လဝ်ရဂှ် လ္ၚတ်ဂၠိုက်ဂၠာဲဂွံတီကေတ် နူတွဳဗွိုၚ်ဒပ်ပၞာန်တအ်ရ။

တံဒပ် ခမရ (၅၅၇) ဖျေံသ္ဇိုၚ်ပွိုၚ်ဍုၚ်တၞၚ်သြဳဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၀) တုဲကၠုၚ်ဏံ ညံၚ်ဟွံဂွံဒးဗလးထောံဗ ဒိုပ်ဗၠာဲသၟိၚ်တိဍာ် ပ္ဍဲပေါဲဗတိုက်ၜါသွာၚ်ဂှ် ဒှ်တံဒပ် ပလံၚ်ဗစိုပ်လဝ်ပၞာန်ရီု ကဵုက္ၜၚ်ကျာ မွဲတံဒပ်ရ။

သ္ကိုပ်တံဒပ် ခမရ (၅၅၇) ဖျေံလဝ်ဗဒိုပ် ပ္ဍဲဗဒိုပ်ဗၠာဲသၟိၚ်တိဍာ်ၜါသွာၚ် ဒုသ္ကိုပ်ဗိုလ်ဇၞော်မျိုဝ်ကိုဝ်ကိုဝ်ဝေန်ဂှ် ပ္ဍဲကဵုပေါဲဗတိုက်ဒှ်လဝ် ပ္ဍဲကဵုဂိတုနဝ်ဝေမ်ဗာ ၜိုတ်စၟတ်တ္ၚဲ (၂၀) ဂှ် ဟိုတ်နူဒးလဝ်ဗုမ်စက်ဗရုသာဲ(ဒရုမ်)တုဲ ဒးလဝ်ဘဲဝပ်ကဝေက်မကမ် ပ္ဍဲသြိုဟ်ကဵု ပ္ဍဲစးရ။

ကြဴနူဂှ် ညံၚ်ဟွံဂွံဒးဗလးထောံတဲ ဗဒိုပ်ဗၠာဲသၟိၚ်ဂှ် ဒုသ္ကိုပ်ဗိုလ်ဇၞော်မျိုဝ်ကိုဝ်ကိုဝ်ဝေန် မဒှ်သ္ကိုပ်တံဒပ်ဖျေံသ္ဇိုၚ်ကောပ်ကာဲဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၆) အခိၚ်နူဂယး ၜိုတ် (၆) နာဍဳ ဃောစၟဳစၟတ်ဒၟံၚ်ကောန်ဒပ် ဒးလဝ်ဘဲဝပ်မကမ်သနိုက်ဗာတုဲ လအ်ဂွံ ပွိုၚ်ကဝက်နာဍဳဟေၚ် ဆီတိတ်ဂၠိုၚ်တုဲ ဒးချိုတ်လဝ်ရဂှ် ဂွံတီကေတ်ရ။

ပရေၚ်သ္ကိုပ်တံဒပ် ဒုသ္ကိုပ်ဗိုလ်ဇၞော် မျိုဝ်ကိုဝ်ကိုဝ်ဝေန် ဒးချိုတ်လဝ်ဏံ ပ္ဍဲကဵုဗဒိုပ် ဟိုတ်နူဂဥုဲသွက်ဂွံလွဳလွတ် ဟၟဲကီု၊ ဟိုတ်နူထပ်ပလံၚ်ဗစိုပ်ကဵု ပၞာန်ရီုဟွံမာန်ကီု၊ ဟိုတ်နူရီုပ္တိတ်ဏာ ဗွဲမဂတာပ်အခိၚ်ဟွံမာန်ကီုတုဲ သီုဟွံထေက်ကဵုချိုတ် ဒးချိုတ်လဝ်ရဂှ် တွဳဗွိုၚ်ဌာန်ဂအုပ်ပၞာန် (ရတခ) ရးဒိုဟ်အဂၞဲ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ဒုသ္ကိုပ်ဗိုလ်ဇၞော် မျိုဝ်ကိုဝ်ကိုဝ်ဝေန် မဒှ်ဗၠာဲဇၞော်ဂှ် ပ္ဍဲကဵုပေါဲဗတိုက်တွဵုရးရခေၚ် သီုကဵုတွဵုရးကရေၚ်တအ်လေဝ် ကေၚ်ဝေၚ်လဝ်ပၞာန် ဒှ်သ္ကိုပ်တံဒပ်စဳကၠးဆိုက်ဗ္ဒက် ပရေၚ်ပၞာန်မွဲတၠတုဲ ဟိုတ်နူဒုၚ်ဂိ ဒုၚ်စေက်တုဲ ဒှ်ညးကောန်ဒပ်သၟဝ်ဝ်တအ် သ္ဍိုက်ဆာန်ပတှ်ေစှ်ေစိုတ် မွဲတၠရဂှ် ဟီုလဝ်ရ။

ဒုသ္ကိုပ်ဗိုလ်ဇၞော် မျိုဝ်ကိုဝ်ကိုဝ်ဝေန် သ္ကိုပ်တံဒပ် ဒးချိုတ်လဝ်ဂှ် ပါဲနူကဆံၚ်ဌာနန္တရ သ္ကိုပ်ဗိုလ်ဇၞော်တုဲ ဒပ်ပၞာန်ဗၟာ အပ်ပြာပ်ကဵုလဝ်တဆိပ်ကြာ သဳဟဒူယျေဝ်ရဂှ် ဂွံတီကေတ် အတိုၚ်တံရိုဟ်ပရိုၚ် ပ္ဍဲဒပ်ပၞာန် ဟီုထ္ၜးလဝ်ရ။

ဆ္ဂး ဇွညးဂှ် ဟိုတ်နူက္ၜၚ်ကျာဟွံဂံၚ်စှ်ေ ပ္ဍဲမွဲဗွိုၚ်ဗဒိုပ်ဗၠာဲသၟိၚ်ၜါသွာၚ်ဂှ်တုဲ က္လေၚ်ဖ္ဍိုက် ကေတ်ဏာလဝ်ဟွံမာန်ဏီရဂှ် ဂွံတီကေတ်ရ။

ပ္ဍဲကဵုပေါဲဗတိုက်ၜါသွာၚ် အပံၚ်လၟိဟ် ဗ္ဒာဲပွိုၚ် (၂၀) တ္ၚဲ က္တဵုဒှ်လဝ်ဂှ် ကောန်ဒပ်ကံၚ်ဇြဳပၞာန် ဗ္ဒာဲ (၄၀) ဒးချိုတ်လဝ်တုဲ ကောန်ဒပ် ကၠုၚ်ကဵုပၞာန်ရီု (၂၈) တၠ ထံက်က္ၜံၚ်ဖျေံလဝ်လွဟ်ရဂှ် ဂကောံဇြဟတ်ပၠန်ဂတးပံၚ်ကောံတအ် လ​လောၚ်ပ္တိတ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု -Lion Battalion Commanda