ကအ်ကြိက်၊ နဝ်ဝေမ်ဗာ(၂၉)
ပ္ဍဲကဵုကွာန်အာန်ဖလေဝ် ပွိုၚ်ဍုၚ်ကအ်ကြိက်၊ တွဵုရးကရေၚ်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်ကြာန်န်တုဲ ဘာလကျာ် ဇီုကပိုက်ဒးလီုလာ်လဝ်တုဲ ကောန်ထပိုဲၜါဇကု ဒးလဝ်ဘဲဝပ်ရဂှ် ဗဟဵု KNU လလောၚ်တြးလဝ်ရ။
နူကဵုဒပ်အမၠံက်ကံၚ်ဇြဳပၞာန် စၟတ် (၃၁၂) ဖျေံသ္ဇိုၚ်လှိုၚ်ဝ၊ ဍုၚ်ကအ်ကြိက်ဂှ် ဟိုတ်နူပန်ဖျေံလဝ်လွဟ်ဇၞော် ၁၂၀-မမ ပ္ဍဲကွာန်အာန်ဖလေဝ် လ္ပာ်သၠုၚ်ကျာ ဍုၚ်ကအ်ကြိက် ပ္ဍဲတ္ၚဲတုဲကၠုၚ်တေံ ဂိတုနဝ်ဝေမ်ဗာ စၟတ်တ္ၚဲ (၂၇) အခိၚ်ဇိုၚ်သဝ်တ္ၚဲ ၜိုတ် (၅) နာဍဳကဝက်ဂှ်တုဲ လွဟ်ဇၞော် (၄) မ စှ်ေပါ်ခတိုဟ်လဝ် ပ္ဍဲအရှာံဘာရ။
ဟိုတ်နူလွဟ်ဇၞော် စှ်ေပါ်ခတိုဟ်လဝ်တုဲ ကောန်ထပိုဲ အယုက် (၁၆) သၞာံ မွဲဇကုကဵု အယုက် (၁၄) သၞာံ မွဲဇကု ဒးလဝ်ဘဲဝပ်မကမ် ဒုၚ်လွဳလွတ်ဒၟံၚ်တုဲ ဘာလကျာ်ကဵု စၚ်ဍာ်တအ်ဂှ်လေဝ် ဇီုကပိုက် ဒးလီုလာ်လဝ်ရဂှ် ဂွံတီကေတ် အတိုၚ်တၚ်လလောၚ်တြးရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၀) တုဲကၠုၚ်တေံလေဝ် ပ္ဍဲကဵုအရာပ် စၟတ် (၂) ဍုၚ်ကအ်ကြိက်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ အပါနော်ဥူထောန်ယျေန် အယုက် (၇၀) မွဲတၠကဵု ကောန်စဴညး မောၚ်ဖျိုဝ်မေန်ခ အယုက် (၁၅) သၞာံတအ်ညး (၂) တၠ ဒးလဝ်လွဟ်ဇၞော်တုဲ ဒးချိုတ်လဝ်ရ။
သ္အာၚ်နူဂှ်ပၠန် ပ္ဍဲဂိတုနဝ်ဝေမ်ဗာ စၟတ်တ္ၚဲ (၄) ဂှ်လေဝ် ပ္ဍဲကဵုအရာပ် စၟတ် (၁) ဍုၚ်ကအ်ကြိက်ဂှ် ဟိုတ်နူလွဟ်ဇၞော်စှ်ေပါ်ခတိုဟ်လဝ်တုဲ ဂကောံအိန်ထံၚ် (၅) တၠ ပါလုပ်သီုကောန်ၚာ် အယုက် (၃) သၞာံ မွဲတၠ ဒးလဝ်ဘဲဝပ်ရဂှ် ဂွံတီကေတ် နူညညးဒေသတအ်ရ။
ပ္ဍဲပွိုၚ်ဍုၚ်ကအ်ကြိက်ဂှ် ပ္ဍဲမွဲကာလသီအဝဵုဏံ ဟိုတ်နူဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ် ညးဍုၚ်ကွာန်တအ်တုဲ ပန်ဖျေံဒၟံၚ် လွဟ်ဇၞော် ပ္ဍဲကွာန်တအ် ကြပ်ဒှ်ဒၟံၚ်လၟိုန်အခိၚ်တုဲ ကောန်ဒေသ ညးဍုၚ်ကွာန်တအ် ပြံၚ်ဆုဲမံၚ်တန်တဴဴ နွံကၠုၚ်လဝ်ရ။
ပရိုၚ် – သြၚ်လောန်တိုၚ်မ်
ဗီု -KNU
sanlontai