ပ္ဍဲပေါဲဗတိုက်ကျာ်မြဟ် ပါလုပ်သီုဒုသ္ကိုပ်တံဒပ် BGF ဒးထပ်ချိုတ်လဝ် (၁၁) တၠ၊ ထံက်က္ၜံၚ် ဖျေံလဝ်လွဟ် (၄) တၠ

ကျာ်မြဟ်၊ နဝ်ဝေမ်ဗာ (၂၉)

နူကဵုတံဒပ် ဒပ်ပၞာန်မၚ်ပယျဵုကံၚ်ဇြဳပၞာန် BGF စၟတ် (၁၀၂၂) ကၠုၚ်ကဵုပၞာန်ရီု ပ္ဍဲပေါဲဗတိုက် ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ် ပါလုပ်သီုသ္ကိုပ်ဗိုလ် နဝ်တယာ ဒးချိုတ်လဝ် (၁၁) တၠတုဲ လွဟ်လက်နက်မကမ်တအ်ဂှ်လေဝ် သီဂွံလဝ်ရဂှ် ဂွံတီကေတ် အတိုက်တံရိုဟ်ပရိုၚ် ပ္ဍဲဒပ်ပၞာန်ကဵု တၚ်လလောၚ်တြး ကရောၚ်ပၞာန်နဂါနဳ လလောၚ်တြးလဝ်ရ။

နူကဵုဗဒိုပ် မၞုံကွာန်တၟံဗြဴ၊ ပွိုၚ်ဍုၚ်ကျာ်မြဟ်မွဲဆံၚ် ကရောၚ်ပၞာန်ပံၚ်တောဲ ပရေၚ်နုက်ပ္တိတ်ကောန်တန်ဗ္တောန်သၠုၚ်ကဆံၚ် ကံၚ်ဇြဳပၞာန် ၝောံဒပ် ၂၂၊ ၝောံဒပ် ၄၄ ကေုာံ ဒပ်ပၞာန်မၚ်ပယျဵု BGF ကၠုၚ်ကဵုပၞာန်ရီု ပ္ဍဲပေါဲဗတိုၚ်ၜါသွာၚ် တ္ၚဲတုဲကၠုၚ်တေံ ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၇) ဂှ် ဒပ် ကရောၚ်ပၞန်နဂါနဳ၊ တံဒပ် KNLA၊ Federal Wings တအ် ပံၚ်တောဲဗတိုက်လဝ်ရ။

အခိၚ်ဒှ်ပေါဲဗတိုက် ပ္ဍဲအခိၚ် နူအခိၚ်ဒေါဝ်တ္ၚဲ (၁၂) နာဍဳ စဵုကဵု (၄) နာဍဳသဝ်တ္ၚဲဂှ် လ္ပာ်ဒပ် BGF ကံၚ်ဇြဳပၞာန် ဟိုတ်နူဒးချိုတ် ပြဟ်လလုဲလဝ် ဂၠိုၚ်ဒၟံၚ်ဂှ်ရ က္လေၚ်ဆုတ်တိတ်အာလဝ်တုဲ ကောန်ဒပ်ကံၚ်ဇြဳပၞာန် (၄) တၠ ဖျေံလဝ်လွဟ် ဇရေၚ်ဂကောံဇြဟတ်ပၠန်ဂတးရဂှ် လလောၚ်တြးလဝ်ရ။

“ဖျေံလွဟ် လုပ်ကၠုၚ်စိုပ်လဝ်ဇရေၚ်ပိုဲတုဲ လွဳလွတ်မၚ်မွဲကဵုလဝ် အတိုၚ်လၟေၚ်တၠုၚ်လအာကမၠောန် ခိုဟ်ဟ်ရ” ဂှ် ကရောၚ်ပၞာန်နဂါနဳ လလောၚ်တြး ဟီုဂးလဝ်ရ။

ပ္ဍဲအခိၚ်ပေါဲဗတိုက်တုဲဂှ် ပါလုပ်သီု ဗိုလ်ဇၞော်ကံၚ်ဇြဳပၞာန် (၁) တၠ၊ သ္ကိုပ်ဗိုလ် သ္ကိုပ်ကရောၚ်ပၞာန်တိဍာ် BGF -၄ (၁) တၠ ဒးချိုတ်လဝ် (၁၁) တၠတုဲ သီဂွံလဝ် လွဟ်လက်နက်ဂကူစုၚ် (၁၅) ဒကိုအ်တုဲ လ္ပာ်ဂကောံဇြဟတ်ပၠန်ဂတးတအ်ဂှ် သ္ဂံၚ် (၁) တၠ ဒးပူဇဴဏာလမျီု သွက်ဍုၚ် သွက်ဂကူရဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

အတိုၚ်တံရိုဟ်ပရိုၚ် ပ္ဍဲဒပ်ပၞာန်ဟီုလဝ်မ္ဂး ပ္ဍဲကဵုပေါဲဗတိုက်ဏံဂှ် သ္ကိုပ်ဒပ်တိဍာ် BGF-၄ ကောန်ရဲပတှ်ေ ဗိုလ်မုက်တုမ် ဒုသ္ကိုပ်တံဒပ် သ္ကိုပ်ဗိုလ်နဝ်တယာ ဒးချိုတ်လဝ်ရဂှ် သြၚ်လောန်တိုၚ်မ် လ္ၚတ်ဂၠိုက်ဂၠာဲတုဲ ဂွံတီကေတ်ရ။

ပ္ဍဲလ္တူသ္ကိုပ်ဗိုလ်နဝ်တာယာ ဒးချိုတ်လဝ်ဂှ် သၞာဲဒဴ BGF တြေံမွဲတၠဂှ်မ္ဂး “အတိုၚ်ဂလာန်မ္ဂး မၞိဟ်ဟွံချိုတ် ဝတ်တာလျိုၚ်ဟွံပြေ ယိုက်ဂၠေၚ်ဏာတာလျိုၚ် စဵုကဵုတာလျိုၚ်ပြေပြံၚ်ဂှ်ရ သ္ပဏာရှ်ေသှ်ေရ။ ၜိုန်ရသ္ပရှ်ေသှ်ေဗွဲမလောန်ကီုလေဝ် လကြဴအိုတ် ဒၞာဲဌာန်ဇကု မိက်ဂွံအာဂှ် အာမာန်ရလေဝ်” ဂးတုဲ ချူပ္တိုန်လဝ် ပ္ဍဲမုက်လိက်ဇာနှိက်ပရေၚ်မၞိဟ်ညးရ။

ပ္ဍဲကဵုပေါဲဗတိုက်ၜါသွာၚ်ဏံ ဟိုတ်နူလ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် ဂၠိုၚ်ဒၟံၚ်ဂှ်ရ ပ္တဝ်လဝ် ပ္ဍဲကွာန် ဒၞာဲကောန်အရာပ် ညးဍုၚ်ကွာန်တအ် မံၚ်တန်တဴဒၟံၚ်တုဲ ဟိုတ်နူပန်ဖျေံဒၟံၚ် လွဟ်ဇၞော် ဗတိုက်ဒၟံၚ်ကဵု က္ၜၚ်ကျာ အရိုဟ်ဒဒှ်တ္ၚဲရဂှ် ဂွံတီကေတ်ရ။

ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ပရေၚ်ကောန်အရာပ်တအ် ဇီုကပိုက်ဒးချိုတ်လဝ် က္တဵုဒှ်ဒၟံၚ်တုဲ ပ္ဍဲကဵုစမြိုၚ် သ္ၚိဌာန်တအ်လေဝ် ဇီုကပိုက် ဒးလီုလာ်လဝ်တုဲ လၟိဟ်ကွာန် ဟွံအောန်နူ (၆) ကွာန် ဒးဂြိပ်ဒဴလဝ် သီုအလုံံကွာန်ရ။

အတိုၚ်တၚ်လလောၚ်တြး ဂကောံဇြဟတ်ပၠန်ဂတးတအ် လလောၚ်တြးလဝ်မ္ဂး ကောန်ဒပ်ကံၚ်ဇြဳပၞာန် ဗ္ဒာဲ (၄၀) တၠ ဒးချိုတ်လဝ်တုဲ ညးထံက်က္ၜံၚ်ဖျေံလဝ်လွဟ် စဵုကဵု (၃၂) တၠနွံကၠုၚ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – ကရောၚ်ပၞာန်နဂါနဳ