ပ္ဍဲပေါဲဗတိုက်ကျောက်မေဝ်တောၚ် လ္ပာ်ကံၚ်ဇြဳပၞာန် ဒးချိုတ်လဝ် (၄) တၠ

ထဝါဲ – နဝ်ဝေမ်ဗာ (၂၉)

ပ္ဍဲကဵုပေါဲဗတိုက် ဗဒိုပ်ကျောက်မေဝ်တောၚ် ဖျေံသ္ဇိုၚ် ပွိုၚ်ဍုၚ်ထဝါဲ၊ ရးဒေသတၞၚ်သြဳဂှ် လ္ပာ်ကံၚ်ဇြဳပၞာန် ဒးချိုတ်လဝ် (၄) တၠတုဲ မၞိဟ်ဇီုကပိုက် ဒးလဝ်ဘဲဝပ်လေဝ် နွံရဂှ် ဂကောံဇြဟတ်ပၠန်ဂတးတအ် လလောၚ်ပ္တိတ်လဝ် ပရိုၚ်ရ။

ပ္ဍဲကဵုပေါဲဗတိုက်သီဗဒိုပ် စချဳဒရာၚ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၃) တုဲကၠုၚ်တေံဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်ဆေၚ်မုက် ဒှ်လဝ် စဵုကဵုပွိုၚ် ၜိုတ် (၇) နာဍဳရ။

ပ္ဍဲကဵုပေါဲဗတိုက်ဏံ လ္ပာ်ကံၚ်ဇြဳပၞာန် ဒးချိုတ်လဝ် (၄) တၠတုဲ ဇီုကပိုက်ဒးလဝ်ဘဲဝပ် (၃) တၠနွံလဝ်တုဲ နူဗဒိုပ်ဗၠာဲသၟိၚ် ပွိုၚ်ဍုၚ်မေတ္တာ သၟဝ်တဲကံၚ်ဇြဳပၞာန်ပန်ဖျေံနၚ် လွဟ်ဇၞော်ကြာန်န်တုဲ ညးဒေသ နူကွာန်ကျောက်မေဝ်တောၚ် (၂) တၠ ဒးချိုတ်လဝ်ရဂှ် ဂွံတီကေတ်ရ။

ဂကောံဇြဟတ်ပၠန်ဂတးတအ်ဂှ် ၜိုန်ရဂစာန်ပ္တိတ်လဝ်ဇြဟတ် သွက်ဂွံသီကေတ် ဗဒိုပ်ဗၠာဲသၟိၚ်ကျောက်မေဝ်တောၚ်မာန်ကီုလေဝ် ဟိုတ်နူဟိုတ်နာနာ ပါလုပ်သီုအခက်ခုဲမကမ်တုဲ သီုသီကေတ်ဟွံမာန် ဒးက္လေၚ်ဆုတ်တိတ်လဝ်ရဂှ် ညးတာလျိုၚ်ပကဖ ထဝါဲ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲကဵုပွိုၚ်ဍုၚ်ထဝါဲဂှ် ဟိုတ်နူဂကောံဇြဟတ်ပၠန်ဂတးတအ် လုပ်ဗတိုက်ဒၟံၚ် ဒပ်ကံၚ်ဇြဳပၞာန် ခြာဟွံလအ်ဟွံလအ်တုဲ ကံၚ်ဇြဳပၞာန် ဂလိုၚ်ပ္တိုန်လဝ် ပရေၚ်ဂီုကၠီု ပ္ဍဲဒၞာဲလုပ်တိတ်ဍုၚ်တုဲ ဗဒိုပ်ဒၞာ(ဘန်ကာ)တအ်လေဝ် သိုၚ်လဝ်ခိုၚ်ၚ်ရဂှ် ညးဟီုလဝ်ဏီရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၉) တေံဂှ်လေဝ် ကောန်ဒပ်ကံၚ်ဇြဳပၞာန် ဗ္ဒာဲကျာ်ယှေန်ဓာတ်ဝေဝ်(ရှင်ဓာတ်ဝဲဘုရား) ဍုၚ်ထဝါဲ ဒးဒုၚ်ဗတိုက်လဝ်တုဲ ဒးချိုတ်လဝ် ဟွံအောန်ူ ၆ တၠရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – ပရေၚ်ချဳဒရာၚ်ပၞာန်ဒေါၚ်မေန် /ကရောၚ်ပၞာန်ပံၚ်ကောံထဝါဲ