ရုၚ်စရၚ်တိ ပွိုၚ်ဍုၚ်ကျာ်ထဝ် ဒးဒုၚ်ဗ္တိုက်

ကျာ်ထဝ်၊ နဝ်ဝေမ်ဗာ ၂၉

ပ္ဍဲဂိတုနဝ်ဝေမ်ဗာ ၂၈ အခိၚ်နူဂယး ဗၞတ်ၜိုတ် ၁၀ နာဍဳဂှ် ရုၚ်စရၚ်တိပွိုၚ်ဍုၚ် မၞုံအရာပ်သ္ကုတ်သၟဝ်ကျာ၊ ဍုၚ်ကျာ်ထဝ်၊ တွဵုရးဍုၚ်မန် ဒးဒုၚ်ဗ္တိုက်ဂှ်ရ ညးဒုၚ်ကာမွဲတၠ ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ရုၚ်စရၚ်တိ ကောန်ဒပ်ကံၚ်ဇြဳပၞာန်တံ မဖျေံလဝ်ဒပ်ဂှ် လ္ပာ်ဂကောံဒပ်ပံၚ်ကောံ PDF၊ ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် နကဵုလွဟ်ဇၞော် ၄၀ မမ ရ။

အပ္ဍဲပရေၚ်ဗ္တိုက်ဏံဂှ် မကမ်လွဟ်ဇၞော် ၄၀ မမ မွဲမ ဒတုံဗ္တိုဟ်ထ္ကးအာလဝ် အပ္ဍဲရုၚ်စရၚ်တိဂှ်တုဲ ညးဒုၚ်ကာမွဲတၠ ကလိဂွံလဝ်ဝပ်ရ။

ညးဒုၚ်ကာ စရၚ်တိ မကလိဂွံလဝ်ဝပ်လွဟ်ဇၞော်ဂှ် ဂကောံဟံၚ်ပြာ်မှာဇန်တံ ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ကျာ်ထဝ်ဂှ် ဂွံတီကေတ်ရ။

ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ် ပရေၚ်ဗ္တိုက်ဏံဂှ်ဝွံ ရန်တၟံလဝ် ကုကောန်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲရုၚ်စရၚ်တိတံ အဓိကဏောၚ်ဂှ် သ္ဂးရ။

ပ္ဍဲကဵုရုၚ်စရၚ်တိပွိုၚ်ဍုၚ်ကျာ်ထဝ်ဂှ် စနူဂိတုတုဲကၠုၚ်တေံတုဲ လ္ပာ်ကံၚ်ဇြဳပၞာန် ကၠုၚ်စိုပ်ဖျေံလဝ်ဒပ်တုဲ လၟိဟ်ဇြဟတ် ချိုတ်တ်ပၠိုတ်တ်ဂှ် ဟွံဂွံတီကေတ်ဏီဖိုဟ်ရ။

ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်ဂှ် စနူဂိတုနဝ်ဝေမ်ဗာလၟုဟ်တုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပရေၚ်ပၞာန် ကြံၚ်မ္ၚိုဟ်ဒၟံၚ်တုဲ လ္ပာ်ကံၚ်ဇြဳပၞာန်ဂှ် ကၠောန်သ္ပပလေဝ်ပလေတ်ဒၟံၚ် သွက်ပၞာန်ဒုၚ်တံရ။

ပရိုၚ်−သြၚ်လောန်တိုၚ်(မ်)

ဗီု−Social Media