ကောန်ဒပ်ကံၚ်ဇြဳပၞာန်တံ ကၠာအခိၚ်ဂွိုအ်အိုတ် ဖျေံလွဟ်အိုတ်ညိဂှ် ဖ္တိုက်ဖ္အောဝ်

နေဗျဳဒဝ်၊ နဝ်ဝေမ်ဗာ ၂၉

ကောန်ပၞာန်၊ ဗၠာဲသၟိၚ် ကေုာံ ကောန်ပၞာန်ပျဳတုသေတ် သၟဝ်တဲကံၚ်ဇြဳပၞာန် သှ်ေဒၟံၚ်သွက်ဂွံလုပ်စ္ၜုဲစ္ၜော်ဂၠံသြိုဟ်ညးဍုၚ်ကွာန်တံဂှ် ကၠာဂွိုအ်လ္ဇုဲလ္ဇ လုပ်စိုပ်ဖျေံလွဟ်အိုတ်ညိဂှ် ဂကောံဇြဟတ်ပၠန်ဂတးတံ ပံၚ်တောဲဖ္တိုက်ဖ္အောဝ်လဝ်ရ။

ပ္ဍဲကဵုဂကောံဇြဟတ်ပၠန်ဂတးတံဏံဂမၠိုၚ် သီုကဵုအလဵုအသဳညဳသၟဟ်ဂကူ NUG ပါလုပ်ဂှ် ဂကောံကောန်ဍုၚ်အရၚ်ဂမၠိုၚ် ဒပ်ပၠတရဴကောန်ဂကူချေၚ် CNF ၊ ဒပ်စဵုဒၞါကောန်ဂကူကရေၚ်ဍာဲ KNDF ၊ ဂကောံကချေၚ် KBEZ ၊ ကံၚ်ဇြဳဖေဝ်ဒရာကောန်ဂကူပအိုဝ် PNFC ကေုာံ ဒပ်ပၠတရဴဗၠးၜးညးဍုၚ်ကွာန် ဂကူကရေၚ်ဍာဲပံၚ်ကောံ (ကလလတ) တံ ပါလုပ်ရ။

လ္ဂောံကဵုတၚ်လလောၚ်တြးဂှ်မ္ဂး နကဵုတၚ်ထ္ၜးဟိုတ် ဒပ်ပၞာန်မွဲဟေၚ် ဒးမၚ်မွဲထိၚ်ဒဝ်ဒၟံၚ် ညံၚ်ကၟိန်ဍုၚ်ဂွိုအ်ထ္ကးပြးအာဂှ် နတဲဏံဂှ်တှ်ေ က္ဍိုပ်သ္ကိုပ်ပၞာန်ကဆံၚ်လ္တူ ဗၞတ်ညိညကဵု ဂြောဝ်ဂတာညးတံရဟေၚ် ဂွံဒုၚ်စသိုၚ်ဒၟံၚ်အခေါၚ်တၟေၚ် ပရေၚ်ဍုၚ်ကွာန်၊ ပရေၚ်ပိုန်ဒြပ်တံဂှ်ရောၚ် သ္ဂးရ။

သၞောတ်တၠအဝဵုပၞာန် ဇြောတ်ဆီညးဍုၚ်ကွာန် ကေုာံ ယန္တယာဒပ်ပၞာန်တံ အဆံၚ်ၚ်တုဲ မအုပ်ဓလီုလဝ်လၟိုန်ဂှ်လေဝ် ဟိုတ်နူသုန်ဂြာံကၠေံဗ္ဒန်အာရဏောၚ်ဂှ်ရ ကောန်ဒပ်ကံၚ်ဇြဳပၞာန် သှ်ေဒၟံၚ် သွက်ဂွံလုပ်စိုပ်ဇရေၚ်ညးဍုၚ်ကွာန်တံဂှ် စိုပ်အခိၚ် သ္ဂောံဒတူလိုၚ် ကရောံဂကောံဇြဟတ်ပၠန်ဂတးတံ ဗွဲမပိုတ်သ္ကုတ်ယျဂှ် ထ္မံက်ထ္ၜးလဝ်ရ။

ဃောန်မျေတ်ထောန် ဥက္ကဌ ကံၚ်ဇြဳဖေဝ်ဒရာကောန်ဂကူပအိုဝ် (PNFC) ဂှ် ပ္ဍဲကဵုပၠန်ဂတးပြံၚ်သၠာဲသၞောတ် ပြံၚ်သၠာဲခေတ်တံဂှ် ဟိုတ်နူသ္ဂောံဗ္တိုက်ဂစိုတ်ဂယိုၚ်ညးသ္ကအ် ဟွံသေၚ်ဂှ်ရ ကောန်ဒပ်ကံၚ်ဇြဳပၞာန်တံ ဗွဲမဂတာပ်အခိၚ် သွက်ဂွံဖျေံလွဟ်အိုတ်ဂှ် ဒုၚ်လဝ်ဂုဏ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“တ္ၚဲဏံ အခါဏံ နကဵုပိုယ်တံ ကၠောန်ဒၟံၚ် ပၠန်ဂတးပြံၚ်သၞောတ် ပြံၚ်ခေတ်တံဏောၚ်။ ပ္ဍဲကဵုပၠန်ဂတးသာ်ဏံဂှ် ပိုယ်တံရေၚ်သ္ကအ် သွက်ဂွံဂစိုတ်ဂယိုၚ်ညးသ္ကအ်ဟွံသေၚ်ပုဟ်။ အဓိကဂှ်တှ်ေ လုပ်ဒၟံၚ်ပၠန်ဂတး ပြံၚ်သၠာဲသၞောတ် ပြံၚ်သၠာဲခေတ်တံဂှ်ဏောၚ်။ ဟိုတ်ဂှ်ရ သၠာဲလ္ပာ်တုဲ လုပ်စိုပ်စ္ၜုဲစ္ၜော်ကၠုၚ် ဇရေၚ်ဂၠံၚ်သြိုဟ်ညးဍုၚ်ကွာန်တံ သာ်ဏံဟီုမ္ဂး သွက်ပိုယ်တံသီုၜါလ္ပာ်ဂှ် ခိုဟ်တဴရ။ ဟိုတ်ဂှ်ရ ဒုၚ်လဝ်ဂုဏ် သွက်ဂွံဖျေံလွဟ် ဗွဲမဂတာပ်အခိၚ်အိုတ်ဂှ်ရ” သာ်ဝွံ ညးသ္ဂးရ။

သ္အာၚ်နူဂှ်ပၠန် နကဵုပၞာန်ညးဍုၚ်ကွာန်ပအိုဝ်ဂှ်လေဝ် ဟိုတ်နူဒးလုပ်ဒၟံၚ်ပေါဲဗ္တိုက် သၟဝ်တဲကံၚ်ဇြဳပၞာန်တံ နွံဒၟံၚ်ဂှ်ရ နကဵုပၞာန်ညးဍုၚ်ကွာန်တံ က္ဍိုပ်သ္ကိုပ်တံဏံဂမၠိုၚ် ပွမပံၚ်တောဲဒၟံၚ်ကဵု ကံၚ်ဇြဳပၞာန်တံဂှ် ဒေါအ်ဒေၚ်တုဲ သွက်ဂွံလုပ်ကၠုၚ် လ္ပာ်ညးဍုၚ်ကွာန်တံအိုတ်ဂှ် ညး ဖ္တိုက်ဖ္အောဝ်လဝ်ရ။

အခိၚ်လၟုဟ်ဝွံ သီုညးဖအိုတ်ဂှ် သွက်ဂွံဒက်ပ္တန်ဗွိုၚ်မၞိဟ် မသ္ပစၟတ်သမ္တီရှ်ေသှ်ေညးမွဲကေုာံညးမွဲ၊ ပရေၚ်ကဆၚ်တုပ်သၟဟ် ကေုာံ ပရေၚ်ၜိုဟ်လလမ်ညဳသၟဟ်တံဂှ်တုဲ ပြံၚ်သၠာဲသၞောတ်၊ ပြံၚ်သၠာဲခေတ်တုဲ သွက်ဂွံပ္တန်ပ္တူကၟိန်ဍုၚ်ပံၚ်ကောံတၟိဂှ် ဒှ်အခါသမယ ပ္တိတ်ဒၟံၚ်ဇြဟတ်ဂ္စါန်ဒၟံၚ်အိုတ်ဂှ် ဂကောံဇြဟတ်ပၠန်ဂတးတံ သ္ဂးရ။

သွက်ကောန်ပၞာန်၊ ဗၠာဲသၟိၚ် ကေုာံ ပျဳတုသေတ် ထောံလသာဂကောံပၞာန်တံတုဲ မလုပ်စိုပ်စ္ၜုဲစ္ၜော်ကၠုၚ် ဇရေၚ်ဂၠံသြိုဟ်ညးဍုၚ်ကွာန်တံဂှ် ပ္ဍဲကဵုဂကောံမၞိဟ် ကၟိန်ဍုၚ်ပံၚ်ကောံအနာဂတ်တေံ သွက်ဂွံဆက်ဒတူလိုၚ်အာ နကဵုဂုဏ်သိက္ခာနွံနွံဂှ်လေဝ် ဒှ်အခိၚ်ခိုဟ် ထ္မံက်ဒၟံၚ်ရုပ်ရဴဖျေံစၟတ်ဒၟံၚ် မူဝါဒအခေါၚ်ဗၠးနူဒုဟ်ဒဏ်တံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ပံၚ်တောဲဂှ်ရ။

ပ္ဍဲဗလးတိတေံ ပအပ်လွဟ် ဇရေၚ်ဂကောံဇြဟတ်ပၠန်ဂတးတံတုဲ ဒဒှ်ရဒုၚ်သစ္စာ ကုညးဍုၚ်ကွာန်တံသၟးရောၚ် ကုညးမထ္မံက်ထ္ၜးကၠုၚ် လစွံစိုတ်သာ်ဏံတံဂှ် ပွမရပ်ဒက်၊ ဍဵုဍိုက်ပျဲပျာံတံဂှ် သ္ပအာဟွံသေၚ်တုဲ ယဝ်ရမိက်ဂွံစဴ ဇရေၚ်ဂြောဝ်ဂတာမ္ဂး ညံၚ်ဂွံစဴမာန် ရီုဗၚ်စဳဇန်ကဵုအာရောၚ် မဒှ်ရ။

ယဝ်ရပါကၠုၚ် သီုဂြောဝ်ဂတာတံဂှ်မ္ဂး ညံၚ်ဘဲအန္တရာယ်ဂွိုအ်မွဲဂှ်ကီု ကေုာံ ကေတ်တာလျိုၚ်ပရေၚ်ဂီုကၠီုတုဲ သွက်ဂွံကလေၚ်ဖျေံသ္ဇိုၚ် အပ္ဍဲဗွိုၚ်မၞိဟ်တံမာန်ဂှ် ရီုဗၚ်ကဵုအာ အထံက်အပၚ်မၞုံပၟိက်တံ ဗွဲမသၟဟ်အစောန်ဏောၚ်ဂှ် ဂကောံဇြဟတ်ပၠန်ဂတးတံ သ္ဂးရ။

ဟိုတ်ဂှ်ရ နကဵုတမ်ဒပ်ကဵုဒှ်၊ မၞိဟ်မွဲဓဝ်ကဵုဒှ် ကေတ်အဆက် ဇရေၚ်ဂကောံဒပ်ပၠန်ဂတး မကြပ်တံ၊ ဂကောံ (ပြည်သူ့ရင်ခွင်) တံ ကေုာံ ဂကောံဇြဟတ်ပၠန်ဂတးတံဂှ်တုဲ ကၠာအခိၚ်ဂွိုအ်အိုတ် သွက်ဂွံလုပ်စိုပ်ဇရေၚ်ညးဍုၚ်ကွာန်တံအိုတ်ဂှ် ဖ္တိုက်ဖ္အောဝ်ဆဝ်မ္ၚုဟ်လဝ်ရ။

အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး အပ္ဍဲကာလသီအဝဵုဏံ ကောန်ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ် ၁၄၀၀၀ ပြၚ် လုပ်စိုပ်စ္ၜုဲစ္ၜော်ကၠုၚ် ဇရေၚ်ညးဍုၚ်ကွာန်တံဂှ် အပ္ဍဲဂိတုအံက်တဝ်ဗာ သတ္တာဟပထမတုဲကၠုၚ်တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI