ဟိုတ်နူပေါဲဗ္တိုက်ဂမၠိုၚ်တုဲ ပ္ဍဲတွဵုရးဍုၚ်မန် မၞိဟ်ထောံလသာသ္ၚိဌာန် ဆုဲပြံၚ်မံၚ်တန်တဴတံ သၠုၚ်တိုန်ကၠုၚ်

မတ်မလီု၊ နဝ်ဝေမ်ဗာ ၂၉

အပ္ဍဲတွဵုရးဍုၚ်မန် မ္ၚးနူပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကၚ်ဇြဳပၞာန်တံကဵု ပြသၞာဟွံဂီုကၠီုတံဂှ်တုဲ ထောံလသာသ္ၚိဌာန် ဒးဆုဲပြံၚ်မံၚ်တန်တဴ အပ္ဍဲဍုၚ်တံ သၠုၚ်တိုန်ကၠုၚ်ဂှ် ဂွံတီကေတ် အတိုၚ်ဂလာန် ညးဒေသတံရ။

ညးဍုၚ်ကွာန်ဒေသဂမၠိုၚ်ဝွံ စနူရာသဳဗြဲကျာတၟးဏံတုဲ ပေါဲဗ္တိုက်တံ သာသ္ကာတ်မြဟ်ကၠုၚ်ဂှ်ကီု၊ လွဟ်ဇၞော်ဒတုံစှ်ေ အပ္ဍဲကွာန်တံ မွဲဏှမွဲဏှကီု၊ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ကီု၊ ဖေက်ဒးဒုၚ်ရပ် နဒဒှ်ဇွောံစဵုဒၞါပၞာန်တုဲ ထောံလသာသ္ၚိဌာန် ဆုဲပြံၚ်မံၚ်တန်တဴကၠုၚ်အိုတ်ရ။

အတိုၚ်တၚ်နၚ် နူကဵုသြၚ်လောန်တိုၚ်(မ်) ကံက်ကပှ်ဂွံလဝ် ၜိုတ်က္ဍစိုပ်ဂှ်မ္ဂး နူစဂိတုအံက်တဝ်ဗာတုဲကၠုၚ်တေံ စဵုကဵုဂိတုနဝ်ဝေမ်ဗာ သတ္တာဟလက္ကရဴအိုတ်ဂှ် ညးထောံလသာသ္ၚိဌာန် ဆုဲပြံၚ်မံၚ်တန်တဴ အပ္ဍဲဍုၚ် ပ္ဍဲတွဵုရးဍုၚ်မန်ဂှ် နွံကၠုၚ်လဝ် စဵုကဵုဗ္ဒါဲ ၂၀၀၀၀ ရ။

ပ္ဍဲကဵုဏံ ပ္ဍဲကဵုပွိုၚ်ဍုၚ်ကျာ်မြဟ် ပေါဲဗ္တိုက်တံ သ္ကာတ်မြဟ်ဒၟံၚ်ဂှ် ညးထောံလသာသ္ၚိဌာန် ဆုဲပြံၚ်မံၚ်တန်တဴ အပ္ဍဲဍုၚ်တံ မွဲဠက်ပြၚ်၊ ပ္ဍဲကဵုဒၞါဲပရေၚ်ပၞာန်ကြံၚ်မ္ၚိုဟ်ဒၟံၚ် လ္ပာ်ပွိုၚ်ဍုၚ်ရေဝ်၊ ကျာ်ထဝ်၊ ၜဳကလေၚ် ကေုာံ ပွိုၚ်ဍုၚ်သဓီုတံဂှ် ဗ္ဒါဲမွဲဠက်ပြၚ် နွံဂှ် ဂွံတီကေတ်ရ။

ညးဒေသ ပွိုၚ်ဍုၚ်ရေဝ်မွဲတၠဂှ် ဟိုတ်နူတိဍာ်ဟွံညိၚ်ဝတ်တုဲ ပ္ဍဲကဵုလ္တူဍုၚ်တံရဂှ် ဒၟါနူစိုတ်ဂွိၚ်ဂွါဲတံတုဲ မၞိဟ်ဆုဲပြံၚ်မံၚ်တန်တဴတံ နွံကၠုၚ်တုဲ ပ္ဍဲကဵုကွာန်ရးတံဂှ်လေဝ် သွံတြးသ္ၚိကၠအ်တံတုဲ ဆုဲပြံၚ်မံၚ် ပ္ဍဲကဵုပွိုၚ်ဍုၚ်တၞဟ်သ္အာၚ်တံ ဂၠိုၚ်ကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လၟုဟ် လ္တူဍုၚ်တံရဂှ် လ္ၚဵုဂှ်တှ်ေ ဂွိၚ်ဒၟံၚ်အိုတ်ဍာ်ရ။ အကာဲအရာဟွံခိုဟ်ရတုဲ ဆုဲပြံၚ်အာ ဒၞါဲဂီုကၠီုတံအိုတ်ရ။ လ္ၚဵုတံဂှ်လေဝ် သွံထောံတုဲအာယျ။ လ္ၚဵုတံဂှ်ပၠန် သွံဟွံတိတ်တုဲ ကၠဟ်တုဲအာအိုတ်ရ။ ဒၞါဲဂီုကၠီုဏောၚ်ထေၚ်ကေတ်တံဂှ် ပ္ၚောံအာအိုတ်ရ။ နူကဵုကွာန်ရးတံဂှ်လေဝ် လ္ၚဵုတံဂှ် မံၚ်ပ္ဍဲရေဝ်မွဲလစုတ်တုဲ ပြံၚ်အာ လ္ပာ်ဒၞါဲညးတံပြေပြံၚ်တံဂှ်အိုတ် ပြံၚ်အာလ္ပာ်မတ်မလီုတံလေဝ် နွံ။ လ္ၚဵုတံဂှ်ပၠန် ပြံၚ်အာဒၞါဲတၞဟ်ဟ်တံဂှ် နွံတၟာဂလိုၚ်ရ“ သာ်ဝွံ သ္ဂးရ။

ညးထောံလသာသ္ၚိဌာန် ဆုဲပြံၚ်မံၚ်တန်တဴတံဂှ်ဝွံ မ္ၚးနူကဵုကျာ်မြဟ်၊ မုဟ်ဍုၚ်၊ ကျာ်ထဝ်၊ ၜဳကလေၚ် ကေုာံ ဍုၚ်သဓီုတံဂှ် ဆုဲပြံၚ်ကၠုၚ် လ္ပာ်ကွာန်အရာပ်ဗၠးဘဲတံ ဂၠိုၚ်အိုတ်တုဲ မၞိဟ်သၠုဲသၠာ်မာန်တံဂှ် ပြံၚ်တိုန်လ္ပာ်ဍုၚ်မတ်မလီုတံ နွံကၠုၚ်ရ။

အပ္ဍဲတွဵုရးဂှ် စနူဂိတုနဝ်ဝေမ်ဗာ သတ္တာဟပထမဂှ်တုဲ ပ္ဍဲကဵုပွိုၚ်ဍုၚ်ကျာ်မြဟ်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်တံ သ္ကာတ်မြဟ်ဒၟံၚ်တုဲ ပါဲနူကဵုပွိုၚ်ဍုၚ်မတ်မလီုကဵု ပွိုၚ်ဍုၚ်ၜါသွာၚ်တံဂှ်တုဲ ပ္ဍဲကဵုပွိုၚ်ဍုၚ်သှ်ေတံဂှ် ပရေၚ်ပၞာန်ကြံၚ်မ္ၚိုဟ်ဒၟံၚ်ရ။

ပ္ဍဲကဵုပွိုၚ်ဍုၚ်ကျာ်မြဟ် ပေါဲဗ္တိုက်တံ သ္ကာတ်မြဟ်ဒၟံၚ်ဂှ်ဟီုမ္ဂး ဟိုတ်နူပရိုၚ်ပေါဲဗ္တိုက်သီဍုၚ်တံတုဲ လ္ပာ်ကံၚ်ဇြဳပၞာန်ဂှ် ညံၚ်ပၞာန်ဂွိုအ်ၜက်ၜေတ်ကၠုၚ် စဵုကဵုလ္တူဍုၚ်ကျာ်မြဟ်ကဵု ဍုၚ်မုဟ်ဍုၚ်တံဂှ် တြးလဝ်ဒပ် ဗ္ဒါဲဇြဟတ်ဒပ် ၈၀၀ တုဲ ပလေဝ်ပလေတ်လဝ် သွက်ပၞာန်ဒုၚ် ခိုၚ်ၚ်ကၠိုက်က်ရ။

ညးဒေသ ပွိုၚ်ဍုၚ်ကျာ်မြဟ်မွဲတၠဂှ် ညးဍုၚ်ကွာန်ဒေသ ဒၞါဲပေါဲဗ္တိုက်က္တဵုဒှ်လၟုဟ်တံဂှ်ဝွံ ဆုဲပြံၚ်ကၠုၚ် လ္ပာ်မတ်မလီုတံ ဂၠိုၚ်ကၠုၚ်တုဲ ပ္ဍဲကဵုကွာန်ရးလ္ၚဵုတံဂှ် အာကၠုၚ်ဟွံဂွံ ကၟာတ်ဒးမံၚ် အပ္ဍဲပေါဲဗ္တိုက်ၜါလ္ပာ်တံ နွံဒၟံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကွာန်လ္ပာ်ဗၟံက်ၜဳ (အတ္တရံ) တံဂှ်တှ်ေ ပြံၚ်ဆုဲအာဒၟံၚ်ညးသ္ကအ်ဂှ် ဂွံမိၚ်ကေတ်ရ။ စနူစၟတ်တ္ၚဲ ၁၃ တေံတုဲ စပြံၚ်ဒၟံၚ်ရ။ ၜဳ(အတ္တရံ) ဂှ်တှ်ေ ပ္ဍဲကျာ်မြဟ်ဂှ် ကော်စဒၟံၚ် သြၚ်ဗၟံက်ကဵု သြၚ်ပလိုတ်ရ။ လ္ပာ်ဗၟံက်ဂှ်တှ်ေ ၜိုတ်တၟံဗြဴ၊ ၜါသွာၚ်တံဂှ် အကာဲအရာဟွံပရေံဏီပုဟ်။ မၞိဟ်တံ ၜိုတ်ပြံၚ်အာလဝ်ရနွံ။ တိုန်ကၠုၚ်လ္ပာ်မတ်မလီုတံရ။ ဗြုလွဟ်ဇၞော်တံဂှ် ဂွံမိၚ်ဒၟံၚ်ရ။ လ္ပာ်တၟံဗြဴဂှ်တှ်ေ နူဏေံတေံရ ဒှ်လဝ်ပေါဲဗ္တိုက်။ လ္ပာ်တံဏံဂှ် ဂကောံပိုယ်တံ အာဟွံဂွံဏီပုဟ်။ ဗြုလွဟ်ဇၞော်တံဂှ်တှ်ေ တမျဝ်ဒၟံၚ်ဟဂှ်ရ“ သာ်ဝွံ သ္ဂးရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ဟိုတ်နူမၞိဟ်ထောံလသာဌာန်ဒၟံၚ် ဆုဲပြံၚ်မံၚ်တန်တဴတံ ဂၠိုၚ်ကၠုၚ်ဂှ်ရ ပ္ဍဲကဵုအရာပ်၊ ကွာန်တံဂှ် ကဵုဂကောံအုပ်ဓုပ်ကွာန် ကံၚ်ဇြဳပၞာန်မခါန်ကၞက်လဝ်တံ လုပ်စိုပ်စၟဳတ် စရၚ်ကၟုဲမွဲဏှမွဲဏှဂှ်ကီု၊ ကဵုမၚ်ရံၚ် ပရေၚ်ချဳဒရာၚ်အာကၠုၚ်တံဂှ်လေဝ် ကၠောန်ၜိုတ်ဒၟံၚ်ရောၚ် ဂွံတီကေတ်ရ။

အတိုၚ်တၚ်နၚ် ဂကောံသုတေသနဗၠးၜး ISP-Myanmar တံဂှ်မ္ဂး ပၞာန်သီအဝဵုတုဲ ပ္ဍဲကဵုအခိၚ်ကြပ်ပေၚ်ကၠုၚ်ပိသၞာံဂှ် ဟိုတ်နူတိဍာ်ပရေၚ်ပၞာန် သၠဲလးကၠုၚ် အလုံဍုၚ်ဂှ်ရ ညးဒဒိုက်ပါဲဒဴဘဲပၞာန် အပ္ဍဲဍုၚ်တံ နွံကၠုၚ် စဵုကဵုပန်ပြကောဋိကိုဋ်ဂှ် ပ္ဍဲဂိတုနဝ်ဝေမ်ဗာ ၂၅ တေံ လလောၚ်ပ္တိတ်လဝ် လိက်ဒုၚ်စဳရေၚ်ရ။

အတိုၚ်တၚ်လလောၚ်တြး ဗော်သွးကောန်ဂကူကရေၚ် KNU တံဂှ်မ္ဂး အပ္ဍဲကာလသီအဝဵုဏံ မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်တုဲ အလုံတွဵုရးဍုၚ်မန်မွဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံကၠုၚ်လဝ် စဵုကဵု ၂ ကိုဋ်ပြၚ်ရောၚ် သ္ဂးရ။

တွဵုရးဍုၚ်မန် လၟိဟ်မၞိဟ် ၂ ပြကောဋိကိုဋ်ပြၚ် မသ္ပဒတဴဒၟံၚ်ဂှ်ဝွံ အပ္ဍဲကာလပၞာန်သီအဝဵု ကလေၚ်မွဲဝါပၠန်ဏံ ဟိုတ်နူပဋိပက္ခရပ်လွဟ် မက္တဵုဒှ်ကၠုၚ်တံဂှ်တုဲ ညးဍုၚ်ကွာန်ဒေသဂမၠိုၚ်ဝွံ ဟိုတ်နူပေါဲဗ္တိုက်တံကဵု လွဟ်ဇၞော်ဒပ်ပၞာန်တံတုဲ မ္ဒးဇီုကပိုက်ချိုတ်တံကီု၊ ထောံလသာသ္ၚိဌာန် ဒးဂြိပ်ဒဴတံဂှ်ကီု၊ စနူကဵုအခေါၚ်ချဳဒရာၚ်အာကၠုၚ် ဗွဲမဗၠးၜးတံဂှ်ဒှ်တမ် ဒးဆောံလေၚ်ဒၟံၚ် ဇၞော်ကဵုဇြဟတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ