ရပ်ဒက် ကောန်ဍုၚ်ကြုက် မအာတ်စဒၟံၚ် ပ္ဍဲၜၚ်ကံက်

ၜၚ်ကံက်၊ နဝ်ဝေမ်ဗာ ၂၉

ကောန်ဍုၚ်ကြုက် ၆ တၠ မအာတ်စဒၟံၚ် ပ္ဍဲကဵုဍုၚ်ၜၚ်ကံက် ဍုၚ်သေံဂှ် ရပ်ထိၚ်ဂၠိုက်ဂၠါဲစၟဳတ်ဒၟံၚ်တုဲ ညးတံဝွံ ပ္ဍဲကဵုဍုၚ်မလေဝ်ယှာကဵု ဍုၚ်သေန်ကာပေါဝ်တံဂှ်လေဝ် ကေၚ်ကၠောန်ၜိုတ်လဝ် ကမၠောန်အာတ်စတံဂှ် လဝကဍုၚ်သေံ ဟီုတဴရ။

ဂအုပ်သ္ကိုပ်ဗၠာဲသၟိၚ် ဒုတိယကဝ်မယှေန်နာကောပ်ကာဲပရေၚ်မၞိဟ်လုပ် ဖာန်ထာနာ နူချာနာတ်ဂှ် ဂကောံညးအာတ်စ ကောန်ဍုၚ်ကြုက်တံဏံကဵု မၞိဟ်ဗြဴကောန်ဍုၚ်သေံ မသ္ပကဵု နဒဒှ်ညးကၠာဲစၠောံအရေဝ်မွဲတၠတံဂှ်ဝွံ ဟွံဆက်စပ်ညးသ္ကအ်ပုဟ်ဂှ်လေဝ် ဟီုဂးလဝ်ရ။

လၟေၚ်ဒဒှ်ရပ်ဒက် ညးအာတ်စ ကောန်ဍုၚ်ကြုက်တံဂှ်ဝွံ ရေၚ်တၠုၚ်လဝ် ပ္ဍဲကဵုဒၞါဲညးအာတရဴ ဂေတ်ဝေၚ်ဂၠိုၚ်တံရောၚ် မဒှ်ရ။

ဂကောံဒပ်ဗၠာဲသၟိၚ်သေံဂှ်ဝွံ ကရောံကောန်ဍုၚ်ကြုက်တံဂှ် သီဂွံလဝ် သီုကဵုထိုၚ်လှုဲသြန်မၞုံ ၜိုတ်ဗၞတ်မွဲဠက်ၝာတ်တံဂှ်ရ။

သြန်လုပ်ညးအာတ်စတံဂှ်ဝွံ ဂၠိုၚ်နူကဵုသြန်လုပ်ညးတံဏီဂးတုဲ ကောန်ဍုၚ်သေံလ္ၚဵုတံ ပါ်ပါဲဒၟံၚ်တံလေဝ် နွံရ။

ညးတံဝွံ အာတ်စဂွံ ပွိုၚ်မွဲတ္ၚဲတုဲ လှုဲၝာတ် မကလိဂွံတံဂှ် လှာဲကဵုသြန်ယောန်တုဲ ဒးပအပ်လဝ် ပ္ဍဲကဵုစရၚ်တိုက်သြန်ကြုက်ညးတံရောၚ်ဂှ် ဒုတိယကဝ်မယှေန်နာကောပ်ကာဲပရေၚ်မၞိဟ်လုပ်ဂှ် ဟီုဂးလဝ်ရ။

ညးမအာတ်စ ကောန်ဍုၚ်ကြုက် မရပ်ဂွံလဝ် ပ္ဍဲကဵုဍုၚ်သေံတံဂှ်ဝွံ ကလိဂွံလဝ် သီုကဵုဝပ်ပၟတ်တူတံဂှ်တုဲ ဝပ်တံဏံဂှ်လေဝ် ကလိဂွံလဝ် အပ္ဍဲဍုၚ်ကြုက်ဏောၚ်ဂှ် ဂွံတီကေတ်ရ။

မၞိဟ်တံဏံဂှ် ပၠောပ်ထောံစရၚ်ယၟုလီု ပ္ဍဲဍုၚ်သေံယျဂှ် ဒုတိယကဝ်မယှေန်နာ ကောပ်ကာဲပရေၚ်မၞိဟ်လုပ် ဂအုပ်သ္ကိုပ်ဗၠာဲသၟိၚ် ဖာန်ထာနာ ဟီုဂးလဝ်ရ။

ဂကောံသၟိၚ်တၠအဝဵုသေံတံဂှ်ဝွံ ရပ်ဂွံလဝ် ညးအာတ်စ ကောန်ဍုၚ်သ္အာၚ် မၞုံပ္ဍဲခရိုၚ်ချောန်ဗူရဳ၊ ခရိုၚ်ဇျှၚ်မာဲ ကေုာံ ခရိုၚ်ဖူခက်တံ ဒဵုကဵု ၃၃ တၠ မဒှ်ရ။

ပ္ဍဲကဵုဏံ ကောန်ဍုၚ်ကာမ္ဗောဒဳယျာ ၂၇ တၠ၊ ကောန်ဍုၚ်ကြုက် ၂ တၠ၊ ကောန်ဍုၚ်ဗၟာ ၂ တၠ ကေုာံ ကောန်ဍုၚ်ရုယှာ ၂ တၠ ပါလုပ်ရ။

သ္အာၚ်နူဂှ်ပၠန် ကုညးမရပ်ဂွံလဝ်တံဂှ် ကဵုအာဒဏ်ဗက်ဗဒဴကၠေံနူဍုၚ်ဏောၚ်တုဲ စုတ်အာ ပ္ဍဲကဵုစရၚ်မၞိဟ် နူကဵုဍုၚ်သေံ ဟွံဒုၚ်တၠုၚ်ရတံဂှ်ဏောၚ်ဂှ် ဂွံတီကေတ်ရ။

Ref: Thai PBS World