တယျေတ်ချောၚ်၊ နဝ်ဝေမ်ဗာ(၃၀)
ဒပ်ကံၚ်ဇြဳပၞာန် ထ္ပက်လုပ်ကၠုၚ်ပၞာန် ပ္ဍဲကွာန်ကေန်ယှေအ်(ကင်းရှေ့)၊ ပွိုၚ်ဍုၚ်တယျေတ်ချောၚ်၊ ရးဒေသတၞၚ်သြဳဂှ် ယဝ်ရညးဍုၚ်ကွာန်တအ် ဒုၚ်လဝ်တဲ PDF မ္ဂး ပလီုထောံကွာန်ဏောၚ် ချူစွံလဝ် လိက်ဘပဠရဂှ် ညးဒေသတအ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်နွံ (၅၀) ပြၚ်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၈) အခိၚ်ဒေါဝ်တ္ၚဲ ၜိုတ် (၂) နာဍဳဂှ် နူလ္ပာ်ဒဒန်ပေါက်တိုၚ် လုပ်စိုပ်ကၠုၚ် ပ္ဍဲကွာန်ကေန်ယှေအ်ရ။
ကြဴနူဂှ် ဒပ်ကံၚ်ဇြဳပၞာန် လုပ်ဂၠိုက်ဂၠာဲလဝ် ပ္ဍဲသ္ၚိဒၟံၚ် မၞုံကွာန်ကေန်ယှေအ် လၟိဟ်သ္ၚိၜိုတ် (၂၀) မတုဲဂှ် စေဝ်သြန်ပကောံ(စုဘူ)ကောန်ၚာ် ဟွံသှ်ေ သီုကပေါတ် နွံၚုဟ်မးတအ် ဖံက်ကေတ်ဏာလဝ်ရဂှ် ဂွံတီကေတ် အတိုၚ်ညးဒေသတအ် ဟီုလဝ်ရ။
ဒပ်ကံၚ်ဇြဳပၞာန် လုပ်ဖံက်ကေတ်ဏာလဝ် ပ္ဍဲသ္ၚိတအ်ဂှ် အခိၚ်ကရောၚ်ပၞာန်တိတ်အာ “ယဝ်ရဒုၚ်လဝ်တဲ PDF မ္ဂး ပလီုထောံကွာန်ဏောၚ်” ဟီုဂှ် ချူစွံလဝ် လိက်ဘပဠရ။
ကြဴနူဂှ် ကရောၚ်ပၞာန်ကံၚ်ဇြဳပၞာန် ထပ်လုပ်စိုပ်ကၠုၚ် ပ္ဍဲကွာန်ယှေန်မုတ္ထဳတုဲ အခိၚ်လုပ်စိုပ်စၟဳစၟတ် သ္ၚိဒၟံၚ်တအ်ဂှ် ပန်ဂစိုတ်ဏာလဝ် ညးမၞုံယၟု ဒဝ်မျေအ် အယုက် (၅၀) သၞာံ ဂြိပ်တိတ်အာ ဟိုတ်နူဖေက်လကိုတ်ဂှ်ရ။
ဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန် ပ္ဍဲကွာန်ကေန်ယှေအ်၊ ယှေန်မုတ္ထဳ၊ ယှာန်မတွောန်၊ ယောၚ်မဝ်ကဵု ပလွေယှောၚ်ဂှ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၉) ဂှ်မ္ဂး က္လေၚ်ဖျေံလဝ်ဗဒိုပ် ပ္ဍဲဒဒန်ပေါက်တိုၚ်ရဂှ် ဂွံတီကေတ်ရ။
ဟိုတ်နူကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ်တုဲ ညးဒေသ နူကွာန် (၅) ကွာန်တအ် ဒးဂြိပ်ဒဴပါဲဓလေတ်လဝ် ပ္ဍဲဒၞာဲဗၠးဘဲတုဲ ညးဒေသလ္ၚဵုဂှ်မ္ဂး ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၉) အခိၚ်နူဂယးဂှ် က္လေၚ်စဴ လုပ်စိုပ်မံၚ်ဒၟံၚ်ညးသ္ကအ်ပၠန်ရဂှ် ဂွံတီကေတ်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၃) တုဲကၠုၚ်တေံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်တပျေယှောၚ် ပွိုၚ်ဍုၚ်လံၚ်လုၚ်ဂှ် စံၚ်ပလီုဏာလဝ် ကွဳလိုန်ဓာတ်ညးဒေသပိုၚ် (၂၀) ဖ္ဍိုက်ပြၚ် ကဵု ရိုက်တာဲ (၁၀) ပြၚ်တုဲ ယဝ်ရထပ်ထ္ၜးဆန္ဒမ္ဂး အကာဲအရာပရေံလ္တူနူဏံဏီဂှ် ချူစွံဏာလဝ် လိက်ဘပဠရ။
ပရိုၚ် – သြၚ်လောန်တိုၚ်မ်
ဗီု -CJ
sanlontai