ကျာ်မြဟ်၊ နဝ်ဝေမ်ဗာ(၃၀)
ပ္ဍဲပေါဲဗတိုက်ဒှ်ဒၟံၚ် ပွိုၚ်ၜါသတ္တာဟ ပ္ဍဲပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ် ညးဒှ်ဒဒိုက်ပါဲဘဲပၞာန် စဵုကဵုၜါ်ဠက်ပြၚ် ဂၠိုၚ်တိုန်ကၠုၚ်တုဲ နွံဒၟံၚ်ပၟိက် အရီုဗၚ်ဇွောံမစၞစကဵု ဂဥုဲဇဗတအ်ဖိုဟ်ရဂှ် ဂွံတီကေတ် အတိုၚ်လဟီု ညးဍုၚ်ကွာန်ပါဲဘဲပၞာန်တအ်ရ။
သ္ပတံနူဂိတုနဝ်ဝေမ်ဗာ စၟတ်တ္ၚဲ (၁၀) တုဲကၠုၚ်တေံတုဲ ဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ် ဗဒိုပ်သၞေဟ်ကၚ်ဒဒန်ၜါသွာၚ် ဆက်စၠောံလဝ် တွဵုရးဍုၚ်မန်ကဵု တွဵုရးကရေၚ် ပၟိက်ဇၞော်ဒၟံၚ် အတိုၚ်ပရေၚ်ပၞာန်ကေုာံ ဗဒိုပ်ဗၠာဲသၟိၚ်ဂှ် ပေါဲဗတိုက်ၜါလ္ပာ် ဆက်ဒှ်ဒၟံၚ် စဵုကဵုဂိတုနဝ်ဝေမ်ဗာ စၟတ်တ္ၚဲ (၂၉) တ္ၚဲဏံရ။
ပ္ဍဲပေါဲဗတိုက်ၜါလ္ပာ်ဏံ ဟိုတ်နူဒပ်ကံၚ်ဇြဳပၞာန်ဗတိုက်လဝ်ကဵုက္ၜၚ်ကျာ သီုပန်ဖျေံလဝ်လွဟ်ဇၞော်တုဲ ညးဒေသ နူကွာန်ဗ္ဒာဲဂှ် (၂၀) ကွာန် ပါလုပ်သီုကွာန်ၜါသွာၚ်၊ မတေဲ၊ ပှ်လှ်၊ လှာကဇိုၚ်၊ တၟံဗြဴ၊ ကအ်သက် ၜါလက်ပြၚ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်လဝ်ရ။
ညးဍုၚ်ကွာန်ပါဲပၞာန်တအ်ဂှ် ဆုဲပြံၚ်မံၚ်ကၠုၚ် ပ္ဍဲသ္ၚိမသကလောကောဒေံ ဒၞာဲဗၠးဘဲ ပါလုပ်သီုလ္တူဍုၚ်မုဟ်ဍုၚ်ကဵု ဍုၚ်ကျာ်မြဟ်တအ်တုဲ ဗွဲမဂၠိုၚ် မံၚ်တန်တဴဴဒၟံၚ် ပ္ဍဲဘာလကျာ်ကဵု ဇြပ်သ္ဘၚ်ဓဝ် မၞုံပ္ဍဲအရာပ်ကွာန်တအ်ဂၠိုၚ်ရ။
ညးဍုၚ်ကွာန်ဂြိပ်တိတ်ကၠုၚ်ပါဲဘဲပၞာန်တအ်ဂှ် ဟိုတ်နူအခိၚ်ပါဲဘဲပၞာန် လအ်လကၠုၚ်ကီု၊ ဟိုတ်နူ ပေါဲဗတိုက်ဆက်ဒှ်ဒၟံၚ်ကီုဂှ်ရ ပါဲနူဇွောံမစၞစတအ်တုဲ သ္ပတံနူကဵုဂဥုဲဇဗသ္ဇိုၚ်တအ်ဒှ်တမ် ဂွံရာန်ကေတ် ဒှ်ကၠုၚ်အခက်ခုဲရဂှ် ညးဍုၚ်ကွာန်ပါဲဘဲပၞာန် ကောန်ကွာန်ၜါသွာၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အခိၚ်လၟုဟ်ဏံလေဝ် ပေါဲဗတိုက်ကျာ်မြဟ်ဂှ် နူကဵုကွာန်ၜါသွာၚ် စဵုကဵုကွာန်မတေဲ ဗွိုၚ်ပၞာန်သၠဲတိုန်ကၠုၚ်ဒၟံၚ်တုဲ လ္ပာ်ကံၚ်ဇြဳပၞာန်လေဝ် ညးဒေသ မၞုံပ္ဍဲကွာန် ဒၞာဲဍေံတအ်ဖျေံလဝ်ဗဒိုပ် ပါလုပ်သီုကွာန်တၟအ်ဗြဴတအ်ဂှ် သွက်ဂွံပါဲတိတ်နူကွာန် ဟီုဂးကၠုၚ်လဝ် နွံရဂှ် ဂွံတီကေတ် အတိုၚ်ညးဒေသတအ် ဟီုထ္ၜးလဝ်ရ။
ဒပ်ကံၚ်ဇြဳပၞာန်ဂှ် အခိၚ်လၟုဟ်ဏံ တြးလဝ်ဒပ် ဇြဟတ်ဒပ် ဗ္ဒာဲ (၇၀၀) ပ္ဍဲကဵုလ္ပာ်ကွာန်တၟအ်ဗြဴ၊ ခ္ဍးကဵု ကွာန်ဖနုမ်တအ်တုဲ ဗဂပ်လဝ်လွဟ်ဇၞော် သွက်ပေါဲဗတိုက် ခိုၚ်ၚ်ကၠိုက်က်ရ။
ပ္ဍဲကဵုပေါဲဗတိုက်ဒှ်လဝ် ပွိုၚ်ၜါသတ္တာဟပြၚ်ဏံ ကောန်အရာပ်ဟွံအောန်နူ (၁၀) တၠဒးချိုတ်လဝ်တုဲ ဟိုတ်နူလွဟ်ဇၞော်စှ်ေ ပါ်ခတိုဟ်လဝ်တုဲ သ္ၚိဌာန်ညးဒေသ ဗ္ဒာဲ (၁၀၀) မ ဇီုကပိုက် ဒးလီုလာ်လဝ်ရဂှ် ဂွံတီကေတ် အတိုၚ်တံရိုဟ်ပရိုၚ်ပ္ဍဲဗလးမုက်တိရ။
ပ္ဍဲကဵုပေါဲဗတိုက်ကျာ်မြဟ်ဂှ်မ္ဂး ပါလုပ်သီုသ္ကိုပ်တံဒပ်ကံၚ်ဇြဳပၞာန်မွဲတၠ ဒးချိုတ်လဝ် ဟွံအောန်နူ (၄၀) တၠနွံတုဲ ညးထံၚ်က္ၜံၚ်ဖျေံလဝ်လွဟ် စဵုကဵု (၃၂) တၠ နွံကၠုၚ်ရဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
ဗီု – Twitter
sanlontai