ဂအုပ်ပါမောက္ခတက္ကသိုလ်လွိုၚ်ကဝ် ပံၚ်တောဲလဝ် ကုကံၚ်ဇြဳပၞာန်ကဵု ဂကောံသ္ကအ်ပွံၚ်ညးတအ် ဒးဒုၚ်စောဲလဝ်ဂဗုတ်၊ ဂကောံအိန်ထံၚ်ညးယိုက်ဝန် Non CDM (၁၉၄) တၠ ဒးဒုၚ်ကဵုဒဏ်ဘာတ်ပ္တိတ်နူဍုၚ်

လွိုၚ်ကဝ် – နဝ်ဝေမ်ဗာ (၃၀)

ပါလုပ်သီုဂအုပ်ပါမောက္ခ ဒုဂအုပ်ပါမောက္ခ တက္ကသိုလ်လွိုၚ်ကဝ် (၅) တၠ သီုကဵုဂကောံအိန်ထံၚ်ညးတအ်ဂှ် ဟိုတ်နူပံၚ်တောဲလဝ်ကဵုကံၚ်ဇြဳပၞာန် ဂကောံဟွံလုပ်သၞောဝ်ဂှ်ရ စောဲလဝ်ဂဗုတ်ရဂှ် ကံၚ်ဇြဳအုပ်ဓုပ်ကာလအကြာကရေၚ်ဍာဲ IEC ကဵုလဝ်သမ္တီရ။

ဒပ်ဗၠာဲသၟိၚ်ကရေၚ်ဍာဲ သ္ပမၞိဟ်စောဲဂဗုတ်တုဲ စောဲလဝ်ဂဗုတ်ညးတအ်တုဲဂှ် သၠောဲပြံၚ်ဗစိုပ်လဝ် ဌာနစဳရေၚ်သၞောဝ်ဓဝ် မဆေၚ်စပ်တအ်တုဲ ကေတ်အာအရေဝ် အတိုၚ်သၞောဝ်ဥပဒေရောၚ်ဂှ် ဟီုလဝ်ရ။

IEC ဂှ် ညးယိုက်ဝန် Non CDM ရီုပ္တိတ်နၚ် နူကဵုတက္ကသိုလ်လွိုၚ်ကဝ်တအ်ကဵု ဂကောံအိန်ထံၚ်ညးတအ်ဂှ် ဒက်ပ္တန်အာ ဂကောံစၟဳစၟတ်တၟေၚ် ဆေၚ်ကဵုပရေၚ်ဂၠိုက်ဂၠာဲစၟဳစၟတ် Non CDM တအ်တုဲ ကၠောန်ရေၚ်တၠုၚ်အာ ပရေၚ်စၟဳစၟတ်ရောၚ်ဂှ် ဂွံတီကေတ်ရ။

အတိုၚ်တၚ်ဂကောံစၟဳစၟတ်ဂၠိုက်ဂၠာဲတၟေၚ် ဂွံဆဵုညာတ်လဝ်မ္ဂး ညးမၞုံတာလျိုၚ်အဓိက ပ္ဍဲအရာပံၚ်တောဲရေၚ်တၠုၚ်ကဵု ဂကောံဟွံလုပ်သၞောဝ် ကံၚ်ဇြဳပၞာန်တအ်ဂှ် စောဲလဝ်ဂဗုတ်ရဂှ် ကဵုလဝ်သမ္တီရ။

ဂကောံအိန်ထံၚ်ဒပ်ပၞာန် ပါလုပ်ဆက်စပ်ဒၟံၚ်ကဵုကံၚ်ဇြဳပၞာန် တိုက်ရိုက် (၃) တၠဂှ်မ္ဂး ဆက်ရေၚ်တၠုၚ်အာ ကိစ္စဂၠိုက်ဂၠာဲစၟဳစၟတ် အတိုၚ်အေက်ဥပဒေ ဆေၚ်ကဵုသွာၚ်ပၞာန်တုဲ သၠောဲပြံၚ်ကဵု ရုၚ်သၞောဝ်ဓဝ်ပၞာန်တုဲကေတ်အာအရေဝ်ရောၚ်ဂှ် ဂွံတီကေတ်ရ။

သ္အာၚ်နူဂှ်ပၠန် ညးယိုက်ဝန် Non CDM ဟွံဆက်စပ်ကဵု ကံၚ်ဇြဳပၞာန်တအ်ကီု သီုဂကောံအိန်ထံၚ် (၁၉၃) တၠဂှ်မ္ဂး ပါဲနူညံၚ်ဟွံဂွံပါလုပ် ပ္ဍဲယန္တရာကံၚ်ဇြဳပၞာန်၊ ညံၚ်ဟွံဂွံဆက်စၠောံကဵု ဘာ/ရုၚ်တအ်တုဲ သွက်ဂွံဒတူလာၚ်အာ ဗွဲမကိတ်ညဳကဵု ပၟိက်ဆန္ဒညးဍုၚ်ကွာန်တအ်ဂှ် ကဵုဒုၚ်လဝ်ဝန်တုဲ ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၈) ဂှ် ကဵုလဝ်ဒဏ်ဘာတ်ပ္တိတ်နူဍုၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။

အသိၚ်ပၠန်ဂတးဟိုတ် နူသၠုၚ်တိုန်ကၠုၚ်မာန်ဒၟံၚ်ဏီဂှ်ရ နကဵုညးယိုက်ဝန်၊ ကောန်ပၞာန်ကဵု ဗၠာဲသၟိၚ် သၟဝ်တဲကံၚ်ဇြဳပၞာန် ပ္ဍဲကဵုတွဵုရးကရေၚ်ဍာဲတအ် ဒတူလာၚ်အာ လ္ပာ်ညးဍုၚ်ကွာန်တုဲ ညံၚ်ဂွံပံၚ်တောဲကဵု ဂကောံဇြဟတ်ပၠန်ဂတးတအ် ဗွဲမပြဟ်ဂှ် IEC ကဵုလဝ်သတိရ။

ပရိုၚ် – သြၚ်လောန်တိုၚ်မ်

ဗီု – IEC (ဗီုဃောရီုပ္တိတ်လဝ် ညးယိုက်ဝန် Non CDM တအ်)