မတ်မလီု၊ နဝ်ဝေမ်ဗာ ၃၀
ဒဵုကဵုအခိၚ်လၟုဟ် ကံၚ်ဇြဳပၞာန် ဟွံကဵုအခေါၚ် ဆက်စၠောံချူလိက် ကုမိယာဲညး ဒဝ်အံၚ်သာန်သုကျဳ ညးကဵုကသပ်ကၟိန်ဍုၚ်ဂှ်ဏီပုဟ်ဂှ် ကောန်တြုံညး ကေန်အေဝ်ရေတ် ဟီုဂးလဝ်ကဵု မဳဒဳယျာဍုၚ်သ္အာၚ်တံရ။
ကေန်အေဝ်ရေတ်ဝွံ အခေါၚ်ဆက်စၠောံချူလိက် ကုမိယာဲညးဂှ်ကီု သက်ဂွံဂွံအခေါၚ်ဆက်စၠောံဆဵုဂဗ နကဵုနဲတၞဟ်ဟ်တံဂှ် ၜိုန်ရအာတ်မိက်လဝ် နူကဵုညးမၞုံတာလျိုၚ်မဆေၚ်စပ် ကံၚ်ဇြဳပၞာန်တံဂှ်ကီုလေဝ် ဒဵုကဵုအခိၚ်လၟုဟ် ဟွံကဵုအခေါၚ်ဏီပုဟ်ဂှ် ညးသ္ဂးရ။
နကဵုကေန် ဟွံဂွံအခေါၚ်ဆက်စၠောံ ကုမိယာဲညး မဒးဒုၚ်ရပ်ဒက်ဖျေံလဝ်ထံၚ် ပ္ဍဲကဵုနေဗျဳဒဝ်ဂှ်သၟးဟွံက အခေါၚ်ပလံၚ်ဗစိုပ် ကပေါတ်ဂဥုဲဇဗ အရပ်စပ်တၞဟ်သ္အာၚ် ကေုာံ အခေါၚ်လုပ်စိုပ်ဆဵုဂဗပ္ဍဲထံၚ်တံဂှ်လေဝ် ကံၚ်ဇြဳပၞာန် ကယျာန်ပါဲလဝ်ရ။
ကံၚ်ဇြဳပၞာန်ဝွံ ကောန်ဇာတ်ညးကီု ညးလဵုမွဲမှ ဟွံကဵုလဝ်အခေါၚ်ဆဵုဂဗ ကုဒဝ်အံၚ်သာန်သုကျဳရ။
ကြပ်အိုတ်ဂှ်တှ်ေ ဂကောံရေၚ်တၠုၚ်ဂဗုတ် ဒဝ်အံၚ်သာန်သုကျဳဂှ် ပ္ဍဲဂိတုဒဳဇြေမ်ဗာတုဲကၠုၚ်တေံ ဂွံအခေါၚ်ဆဵုဂဗလဝ် လက္ကရဴအိုတ်တုဲ လ္ပာ်ဂကောံရေၚ်တၠုၚ်ဂဗုတ်တံဂှ်လေဝ် စပ်ကဵုဂဗုတ်ညးတုဲ အာတ်မိက်လဝ် အခေါၚ်ဂွံဆဵုဂဗတံဂှ်ကီုလေဝ် ကံၚ်ဇြဳပၞာန် ကၟာတ်လဒဵုလဝ်ရ။
နကဵုဒပ်ပၞာန် ပ္ဍဲကဵုကၞောတ်ဂိတုအံက်တဝ်ဗာတုဲကၠုၚ်တေံဂှ် နကဵုကောန်ဒဝ်အံၚ်သာန်သုကျဳ ယဝ်ရအာတ်ကၠုၚ်အခေါၚ်ဆဵုဂဗ ဗွဲမလုပ်သၞောဝ်မ္ဂး သွက်ဂွံကဵုအခေါၚ်ဆဵုဂှ် ကူချပ်ကဵုဏောၚ် ဟီုဂးလဝ်နွံကီုလေဝ် နတဲဏံဂှ် ဟွံကဵုအခေါၚ်မွဲသာ် ကၟာတ်လဒဵုလဝ်ရ။
ဒဝ်အံၚ်သာန်သုကျဳ မဒးဒုၚ်ဖျေံဒၟံၚ် ဒဏ်ထံၚ် ၃၃ သၞာံ နကဵုဂဗုတ် ၁၉ ဂဗုတ်ဂှ် ပ္ဍဲဂိတုအဝ်ဂါတ် ၁ တုဲကၠုၚ်တေံ နကဵုၝောံပိုဒ် ၂၅ သၞောဝ်စပ်ကဵုပရေၚ်ကောပ်ကာဲ ဘဲအန္တရာယ်သဘာဝတံဂှ် ၂ ဂဗုတ်၊ သၞောဝ်ဆက်စၠောံ ၝောံပိုဒ်−၆၇၊ သၞောဝ်ဗၞိက်ပၠောပ်ဗၞိက်ပ္တိုန် ၝောံပိုဒ်− ၈ ကေုာံ သၞောဝ်ရာဇသာတ်ဇၞော် ၝောံပိုဒ်−၅၀၅ (ခ) တံဒှ်တမ် ဖျေံလဝ်ထံၚ်တြဴသၞာံ ဂဗုတ် (၅) ဂဗုတ်တံဂှ် ကဵုလဝ်အခေါၚ်ဗၠးနူဒုဟ်ဒဏ်တံကီုလေဝ် အခေါၚ်ဆက်စၠောံ ကုကောန်ဇာတ်ညးဂှ် ကၟာတ်လဒဵုလဝ်ဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီု−Daily Mail
sanlontai