တမ်ဒပ်ကံၚ်ဇြဳပၞာန်ၜါဒပ် လုပ်စိုပ်ဖျေံလွဟ်တုဲဂှ် MNDAA ထိင်ဒက် ဍုၚ်ကုန်ကျာန်

ကုန်ကျာန်၊ နဝ်ဝေမ်ဗာ ၃၀

အပ္ဍဲကာလပရေၚ်ပၞာန် ၁၀၂၇ ဏံ ကြဴနူတမ်ဒပ်ပရေၚ်ဗ္တိုက်ကံၚ်ဇြဳပၞာန် မၞုံသၟဝ်တဲဌာန်ဂအုပ်ပၞာန် ကောပ်ကာဲဒေသလံက်ကိုၚ် ရးသေံသ္ကုတ်သၟဝ်ကျာ စဵုကဵု ၂ ဒပ် လုပ်စိုပ်ဖျေံကၠုၚ်လွဟ်တုဲဂှ် ထိၚ်ဒက်ဂွံလဝ် ဍုၚ်ကုန်ကျာန်ယျဂှ် MNDAA ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုနဝ်ဝေမ်ဗာ ၁၂ တေံ နူကဵုဒေသတၟေၚ်ကဝ်က (၁) တမ်ဒပ်သၟဝ်တဲ ဌာန်ဂအုပ်ပၞာန်ကောပ်ကာဲဒေသ စၟတ် (၁၂၉) နူကဵုကွာန်ယာန်ခေါတ်၊ ဒေသယှဳယှာန်ဂှ် အလုံတမ်ဒပ်မွဲ ကောန်ပၞာန် ကေုာံ ကောန်ဇာတ်ဂြောဝ်ဂတာတံ လုပ်စိုပ်ဖျေံလဝ်လွဟ် ဇရေၚ် MNDAA ရ။

ကြဴနူဂှ်တုဲ ပ္ဍဲဂိတုနဝ်ဝေမ်ဗာ ၂၈ ဂှ်လေဝ် နူကဵုတမ်ဒပ်တိုက် စၟတ် (၁၂၅) မဒှ်တမ်ဒပ်သၟဝ်တဲ (စကစ) လံက်ကိုၚ် ဖျေံသ္ဇိုၚ်ဒေသကဝ်ကဂှ် လုပ်စိုပ်ဖျေံလဝ်လွဟ်ရ။

“ပ္ဍဲစၟတ်တ္ၚဲ ၂၈ နူဏေံတေံဂှ် ခလရ ၁၂၅ ကၠုၚ်စိုပ်ဖျေံလဝ်လွဟ် ဇရေၚ်ပိုယ်တံရ။ ကြဴနူကၠုၚ်ဖျေံလွဟ် သာ်ဏံတုဲဂှ် ပိုယ်တံ သီဂွံလဝ် ကုန်ကျာန်ရ။ ဒေသကုန်ကျာန် ကော်ဗတ်ကဝ်ကပိုယ်တံဂှ် အလုံဒေသယှာန်ဝါန်မွဲ ခရိုၚ်ကဝ်ကဂှ် ပိုယ်တံ ထိၚ်ဒက်မာန်လဝ်ယျရောၚ် ဟီုဂွံရ” သာ်ဝွံ ညးမၞုံအခေါၚ်ဟီုဂး MNDAA လဳကျာဝေန် သ္ပဒတန်လဝ်ရ။

ဍုၚ်ကုန်ကျာန် MNDAA မထိၚ်ဒက်လဝ်ဂှ်ဝွံ ဒှ်ဍုၚ်ပယျဵု ကြုက်−ဗၟာ မၞုံခရိုၚ်လံက်ကိုၚ် ဒေသအုပ်ဓုပ်အပိုၚ်ကဝ်ကဂှ်တုဲ ပ္ဍဲဂိတုနဝ်ဝေမ်ဗာ ၁၃ ဂှ် ကံၚ်ဇြဳပၞာန် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်ရ။

အခိၚ်လၟုဟ်ဂှ် အပ္ဍဲပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ် ပ္ဍဲကဵုဒေသအုပ်ဓုပ်အပိုၚ်ကဝ်ကဂှ် MNDAA သီထိၚ်ဒက်ဂွံလဝ် ဍုၚ်ကုန်ကျာန်ကဵု ဍုၚ်ချေန်ယှိုဲဟဝ်တံဂှ်တုဲ သှ်ေဒၟံၚ်ဍုၚ်လံက်ကိုၚ်ကဵု မဝ်ထိုက်ၜါဍုၚ်ပၠန်ရ။

နကဵု MNDAA သွက်ဂွံထ္မံက်ပေါဲဗ္တိုက်သီဍုၚ်လံက်ကိုၚ်ဂှ် ကဵုလဝ်သမ္တီ ကုညးဍုၚ်ကွာန် မၞုံအပ္ဍဲဍုၚ်တံ သွက်ဂွံပါဲဒလေတ် ဒၞါဲဗၠးဘဲတံဂှ်တုဲ နူဂိတုနဝ်ဝေမ်ဗာ ၂၆ စဵုကဵု ၂၈ ဂှ် ဆုဲပြံၚ်လဝ် ညးပါဲဒဴဘဲပၞာန် ပိဠက်ပြၚ် နူကဵုလံက်ကိုၚ်−ချေန်ယှိုဲဟဝ်မွဲကဆံၚ် ပ္ဍဲကဵုဒၞါဲဂီုကၠီု မပ္တံကဵုဒေသလာယှိုဝ် ကေုာံ နတေတ်တံရ။

ညးမၞုံအခေါၚ်ဟီုဂး MNDAA လဳကျာဝေန်ဂှ် “အကာဲအရာဂှ်တှ်ေ ညးဍုၚ်ကွာန်ကောန်အရာပ် ဆက်မံၚ်အာ အပ္ဍဲဍုၚ်တံဂှ် နွံတုဲ မၞိဟ်မံၚ် ပ္ဍဲကဵုဗ္ဒိုပ်ပါဲဒဴဘဲပၞာန် ပယျဵု ၁ ကဵု ၅ တံဂှ်လေဝ် နွံဒၟံၚ်တၟာဂလိုၚ်ရ။ ကောန်အရာပ် ပါဲဒဴဒၟံၚ်ဘဲပၞာန် ပ္ဍဲကဵုဒၞါဲတၞဟ်ဟ်တံဂှ်တှ်ေ ဒဒိုက်စုၚ်လေၚ်ရ။ မပ္တံကဵုဇွောံမစၞစ၊ ဍာ်၊ ပၟတ်တံရ။ တုဲပၠန် စနူကဵုအန္တရာယ်လမျီုတံဂှ် ဒှ်ဒၟံၚ်ဒဒိုက်ကွေံကွေံဏောၚ်” ဂှ် ဆက်ဟီုဂးလဝ်ရ။

ညးမပါဲဒဴကၠုၚ်ဘဲပၞာန် နူကဵုလံက်ကိုၚ်တံဂှ် ဒပ်ပၞာန်ညဳသၟဟ်ဍုၚ် “ဝ” UWSA ရီုဗၚ်ရေၚ်တၠုၚ်ကဵုဒၟံၚ် ညံၚ်ပရေၚ်အာကၠုၚ် သီုကဵုပရေၚ်စသုၚ်မံၚ်စံၚ်တံ သ္ဂောံဒှ်ခိုဟ်အိုတ်ဂှ် လဳကျာဝေန် သ္ဂးရ။

ကပေါတ်လွဟ်လက်နက်မကမ် မကလဂွံလဝ်တံကဵု လၟိဟ်ညးမလုပ်စိုပ်ဖျေံကၠုၚ်လွဟ်ဂမၠိုၚ် ပါလုပ်သီုကဵု အကာဲအရာပေါဲဗ္တိုက်အခိၚ်လၟုဟ်တံဂှ် ကၠောန်ဒၟံၚ်စရၚ် စၟဳတ်ဒၟံၚ်ဖိုဟ်တုဲ ဗွဲလစှ်ေ ဂှ်တှ်ေ လလောၚ်ပ္တိတ်ကဵုအာဏောၚ်ဂှ် ညးဆက်ဟီုရ။

အတိုၚ်တၚ်လလောၚ်တြး ကဝ်ကမဳဒဳယျာ မထ္မံက်ထ္ၜးဒၟံၚ် ပရိုၚ်ပရေၚ်ပၞာန် MNDAA ဂှ်မ္ဂး ပ္ဍဲဂိတုနဝ်ဝေမ်ဗာ ၂၇ ဂှ် ဂကောံပံၚ်ကောံ MNDAA သီဂွံ High Point စေတဳခုတာန် မၞုံအကြာကျံက်မေဝ်ကဵု လာယှိုဝ်ဂှ်တုဲ ဗ္တိုက်သီဂွံလဝ် သၞေဟ်ကၚ်စၟဳတ်ကျံက်မေဝ် ကေုာံ ဗ္ဒိုပ်ဒပ်ကုန်ကျာန်မွဲဂှ် ဂွံတီကေတ်ရ။

သ္အာၚ်နူဂှ်ပၠန် ဗ္ဒိုပ်ဒပ်ကံၚ်ဇြဳပၞာန် မၞုံဒၞါဲယှေန်ကိုၚ် ကုန်ကျာန် ဒေသယှေန်ဝါန် ကဝ်ကဂှ်လေဝ် ဗ္တိုက်သီဂွံလဝ် ဗွဲမအံၚ်ဇၞးတုဲ လ္ပာ်ကံၚ်ဇြဳပၞာန် ၆ တၠ ချိုတ်တုဲ မၞိဟ်ကလိဂွံဝပ်လ္ၚဵုတံ နွံလဝ်ဂှ် ထ္မံက်ထ္ၜးလဝ်ရ။

အပ္ဍဲချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံတံ ပွိုၚ်မွဲဂိတုဂှ် ဂကောံပံၚ်ကောံ ဂကောံဇြဟတ်ပၠန်ဂတးတံ သီဗ္တိုက်ဂွံလဝ် ဗ္ဒိုပ်ဒပ်ကံၚ်ဇြဳပၞာန် ဂၠိုၚ်ကဵုကၠံ ပါလုပ်သီုကဵု ဍုၚ် ၆ ဍုၚ် နူကဵုရးသေံသ္ကုတ်သၟဝ်ကျာတံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−The Kokang