ဂကောံအလဵုအသဳသေံ သ္ပဒတန် သွက်ဂွံပပဵုပ္တိုန်သြန်ဂိတု ညးဒုၚ်ကာကၟိန်ဍုၚ်ဂမၠိုၚ်

ၜၚ်ကံက်၊ နဝ်ဝေမ်ဗာ ၂၉

သွက်ဂွံသောၚ်ကလး ၚုဟ်မးခရိတ်မံၚ်စံၚ်တံ သၠုၚ်တိုန်ကၠုၚ်ဒၟံၚ်ဂှ်တုဲ ဂလာန်ပ္တိုန် ကဝ်မယှေန်ရေၚ်တၠုၚ် ညးဒုၚ်ကာကၟိန်ဍုၚ်ဂမၠိုၚ် မပပဵုပ္တိုန်ကဵုသြန်ဂိတု ညးဒုၚ်ကာကၟိန်ဍုၚ်တံ ကေုာံ သၞာဲဒဴအလဵုအသဳကဆံၚ်သဝ်တံ ၁၀ တၟံကၠံဂှ် ဂကောံအလဵုအသဳသေံ သ္ပဒတန်ကဵုလဝ်ရ။

သွက်သၞာံဘဏ္ဍာ ၂၀၂၄ မစအာ ပ္ဍဲဂိတုဨပရဴ သၞာံကၠုၚ်စိုပ်ဏံဂှ် ကြဴနူသ္ပဒတန် သၞောဝ်သြန်ဗာတ်ဂျက်အပြောံတံဂှ်တုဲ ပရေၚ်သၠုၚ်ပ္တိုန်သြန်ဂိတုဏံဂှ်ဝွံ ပ္ဍဲဂိတုမေ ဂှ် လမျီုစလုပ်အာဏောၚ် မဒှ်ရ။

ပါန်ပရဳ ဗာဟဳဒါ နူကာရက် ဝန်ဇၞော်ကာဍုၚ်သ္အာၚ် ကေုာံ ဒုဝန်ဇၞော် မဒှ်ညးဒုၚ်တာလျိုၚ်ရုၚ် ကဝ်မယှေန်ရေၚ်တၠုၚ် ညးဒုၚ်ကာကၟိန်ဍုၚ် (OCSC) ဂှ် ပ္တိုန်လဝ်ဂလာန် သ္ဂောံသၠုၚ်ပ္တိုန်ကဵုသြန်ဂိတု သွက်ညးဒုၚ်ကာကဆံၚ်သဝ်တံဂမၠိုၚ်ရ။

ပ္ဍဲကဵုပေါဲသဳကၠဳ မကၠောန်ဗဒှ်လဝ် သၟဝ်သ္ကိုပ်သ္က ဝန်ဇၞော်ပါန်ပရဳ အခိၚ်ပြဟ်ဟ်တေံဂှ် ဂလာန်ပ္တိုန် သ္ဂောံသၠုၚ်ပ္တိုန်သြန်ဂိတု သၞာဲဒဴကဆံၚ်သဝ်တံ ၁၀ တၟံကၠံဂှ် ကဝ်မယှေန်ရေၚ်တၠုၚ် ညးဒုၚ်ကာကၟိန်ဍုၚ် (OCSC) ၊ ကံၚ်ဇြဳပရေၚ်ဖောအ်ဗြေဝ်တောတက်ဗွိုၚ်မၞိဟ် ကေုာံ ပရေၚ်ပိုန်ဒြပ်ကောန်ဂကူ (NESDC) ၊ ဌာနဝန်ဇၞော်ပရေၚ်ဘဏ္ဍာ ကေုာံ ဗျူရိုဝ်ဗာတ်ဂျက်တံ ထံက်လဝ်ဂလာန်အိုတ်ရ။

ဒဒှ်မသၠုၚ်ပ္တိုန်သြန်ဂိတုသာ်ဏံဂှ်ဝွံ သွက်ညးဒုၚ်ကာ မကော်လဝ်တၟိတံဂှ် စကဵုအာ နူကဵုသြန်ၝာတ် ၁၈၀၀၀ တံဂှ်တုဲ သွက်ညးဒုၚ်ကာလၟုဟ်တံဂှ်လေဝ် သြန်ဂိတုမစၟတ်လဝ်တံဂှ် သၠုၚ်ပ္တိုန်ကဵုအာဏောၚ်ဂှ် ညးအုပ်ကာနာနာ နူကဵုရုၚ် NESDC ဒနူချာ ပဳချာရာန်နာန် သ္ပလဝ်တၚ်စၟတ်ဟီုဂးလဝ်ရ။

ဗျူရိုဝ်စရၚ်သြန်လုပ်တိတ် ကေုာံ ဌာနအလဵုအသဳမဆေၚ်စပ်ဂမၠိုၚ် သွက်ဂွံသၠုၚ်ပ္တိုန်သြန်ဂိတုတံဂှ် ဒးသဳကၠဳအာ တမ်ရိုဟ်သြန်ဗာတ်ဂျက်တံဏောၚ်ဂှ်လေဝ် ဂွံတီကေတ်ရ။

ပ္ဍဲကဵုဍုၚ်သေံဂှ် အ္စာဘာ ကေုာံ ညးဒုၚ်ကာပရေၚ်ပညာတံဂှ် ၄၃၇၀၀၀ တၠ၊ ညးဒုၚ်ကာအလဵုအသဳဂှ် ၄၂၁၀၀၀ တၠ ကေုာံ ကောန်ပၞာန် ၃၂၅၀၀၀ တၠတံပါလုပ်ဂှ် ညးဒုၚ်ကာကၟိန်ဍုၚ် ဗၞတ် ၁ ဒဿမ ၆၈ ယိုက်ဂၠေၚ်ဒၟံၚ်တာလျိုၚ်ရ။

Ref: Vietnamplus