သဓီု၊ ဒဳဇြေမ်ဗာ ၁
တွဵုရးဍုၚ်မန်၊ ပွိုၚ်ဍုၚ်သဓီု၊ ဍုၚ်သုဝဏ္ဏဝတဳ၊ အရာပ်ကျာ်ကဴဂှ် ရဲကဵုပရိုၚ် ဂကောံဒပ်ဂီုကၠီုစပ်ကဵုလ္ပာ်ပၞာန် (စရဖ) ကံၚ်ဇြဳပၞာန်မွဲတၠ ဒးဒုၚ်ပန်လဝ် ကဵုသေနာတ်တုဲ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဥူတာန်နာၚ် ညးကဵုပရိုၚ် စရဖ အာယုက် ၅၀ သၞာံဂှ်ဝွံ ပ္ဍဲဂိတုနဝ်ဝေမ်ဗာ ၃၀ အခိၚ်နူဂယး ၜိုတ် ၉ နာဍဳကဝိုက်ဂှ် ပ္ဍဲကဵုဂၠံၚ်တိတ်နူဆေၚ်ခၞံ ပါၚ်ဂၠံၚ် (တိုၚ်ကောက်) အရာပ်ကျာ်ကဴဂှ် မၞိဟ်ဟွံတီယၟုၜါတၠ ပန်ဂစိုတ်လဝ်ကဵုသေနာတ်ရ။
ဟိုတ်နူဒးဒုၚ်ပန်လဝ် ကဵုသေနာတ်ဂှ်ရ ဥူတာန်နာၚ်ဝွံ သြိုဟ်လ္ပာ်ပုၚ် ဒးမကမ်ကလိဂွံလဝ်ဝပ်တုဲ အခိၚ်ပလံၚ်ဗစိုပ်လဝ် ရုၚ်ဂဥုဲပွိုၚ်တိုက်ဒုၚ်သုက်ဂှ် ချိုတ်အာလဝ်ရောၚ် သ္ဂးရ။
အတိုၚ်ဂလာန် ညးဒေသတံဂှ်မ္ဂး ဥူတာန်နာၚ်ဝွံ သ္ပဒၟံၚ် ညးကဵုပရိုၚ် စရဖဂှ် ဂွံကၠုၚ် ဗ္ဒါဲ ၂၀ သၞာံယျရောၚ် ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) လ္တူတၚ်နၚ်ဏံဂှ် သ္ပဒတန်တၞဟ်ခြာဟွံမာန် ဒှ်ဒၟံၚ်ရ။
ဥူတာန်နာၚ် ဒးဒုၚ်ပန်ဂစိုတ်တုဲဂှ် ဒပ်ကံၚ်ဇြဳပၞာန်၊ ကောန်ဒပ်ဗၠာဲသၟိၚ် ကေုာံ ကောန်ဂကောံ စရဖတံ ကၠုၚ်စိုပ်စၟဳတ်တံ နွံလဝ်တုဲ ပ္ဍဲကဵုဂၠံၚ် ဒုၚ်သုက်−ဝေန်ပ၊ ဂၠံၚ်ကျာ်ကဴ−သဓီုဂှ်လေဝ် ဂၠိုက်ဂၠါဲကၟာတ်လဒဵု စၟဳတ်ဒၟံၚ်တံ ကၠောန်ဒၟံၚ်ရောၚ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုသေပ်တေမ်ဗာ ၂၀ တေံဂှ်လေဝ် ပွိုၚ်ဍုၚ်ပံၚ်၊ ကွာန် (အုန်းတပၚ်) လ္တူဂၠံၚ်ခရိုၚ်ဆက်ဒၟံၚ်ဂှ် ညးကဵုပရိုၚ် စရဖ ဥူဝေန်ဇြဝ် ဒးဒုၚ်ပန်ဂစိုတ်လဝ် ကဵုသေနာတ်တုဲ ချိုတ်အာလဝ်ရ။
ပ္ဍဲကဵုပွိုၚ်ဍုၚ်သဓီုဂှ် စနူဂိတုနဝ်ဝေမ်ဗာ သတ္တာဟပထမဏံဂှ်တုဲ နူကဵုဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ် လွဟ်ဇၞော် ကြပ်အရိုဟ်ဗ္တံဂှ်ရ ညးဍုၚ်ကွာန်ဒေသဂမၠိုၚ် ပွမဒှ်ဓဝိၚ်ဂွိၚ်ဂွါဲတံ သၠုၚ်တိုန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai