ပ္ဍဲတိဍာ် KNU ဟိုတ်နူလွဟ်ဇၞော်စှ်ေတုဲ ကောန်အရာပ် (၃) တၠ ပါလုပ်သီု ညးဗြဴ (၂) တၠ ဒးလဝ်ဘဲဝပ်

ညံၚ်လေဝ်ပေန်၊ ဒဳဇြေမ်ဗာ (၁)

ပ္ဍဲကဵုတိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵု လွဟ်ဇၞော် သီုက္ၜၚ်ကျာတုဲ ကောန်အရာပ် (၃) တၠ ပါလုပ် သီုညးဗြဴ (၂) တၠ ဇီုကပိုက်ဒးလဝ်ဘဲဝပ်တုဲ စမြိုၚ်သ္ၚိဒၟံၚ်တအ် ဇီုကပိုက် ဒးလီုလာ်လဝ်ရဂှ် ဗဟဵု KNU လလောၚ်တြးလဝ်ရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၇) တုဲကၠုၚ်တေံ အခိၚ်ဇိုၚ်သဝ်တ္ၚဲ ၜိုတ် (၅) နာဍဳ ပြၚ်ၚ်ဂှ် ပ္ဍဲကွာန်ကျာအေန်၊ ပွိုၚ်ဍုၚ်မုမ်၊ တိဍာ်ဗော်သွးကောန်ဂကူကရေၚ် KNU နူဒပ်ပၞာန်ကံၚ်ဇြဳပၞာန် ပန်ဖျေံလဝ်လွဟ်ဇၞော် (၃) မဂှ် ပါ်ခတိုဟ်လဝ် ပ္ဍဲကဵုကွာန်တုဲ ကောန်ဒေသ ညးဗြဴ (၂) တၠ ဒးလဝ်ဘဲဝပ် ကဝေက်မကမ်ရဂှ် ဓမံက်လဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၈) အခိၚ်ဗ္တံ ၜိုတ် (၉) နာဍဳကဝက်ဂှ်လေဝ် ပ္ဍဲကဵုကွာန်ဗာန်လောၚ် မၞုံဍုၚ်ဖျူ၊ ပွိုၚ်ဍုၚ်မုမ်ဂှ် ဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် ကဵုက္ၜၚ်ကျာ ဗတိုက်လဝ်တုဲ ကောန်ဒေသမွဲတၠ ဇီုကပိုက်ဒးလဝ်ဝပ်တုဲ သ္ၚိဒၟံၚ် (၆) မ ဇီုကပိုက်လီုလာ်လဝ်ရ။

ပ္ဍဲကဵုတိဍာ်ဒပ်မဟာ ၃ KNU ဂှ် ဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန်တအ်တုဲ ပန်ဖျေံဒၟံၚ်လွဟ်ဇၞော်ကီု၊ ဗတိုက်ဒၟံၚ်ကဵု က္ၜၚ်ကျာကီု၊ ရပ်ဒက်ဒၟံၚ်ကောန်အရာပ် ညးဒေသတအ်ကီု ကၠောန်သ္ပဒၟံၚ် မွဲခနမွဲခနရ။

သ္အာၚ်နူဂှ်ပၠန် ပ္ဍဲကဵုခရိုၚ်ညံၚ်လေဝ်ပေန်ဂှ် ပ္ဍဲကဵုပေါဲဗတိုက်ဆေၚ်မုက်တအ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံဒပ်မဟာ ၃ တအ် ဒပ်ကံၚ်ဇြဳပၞာန် ဒးဂိဒၟံၚ်ဂှ် ဟိုတ်နူပ္တဝ်လဝ်ကဵု ကောန်အရာပ် ဗတိုက်ဒၟံၚ်တုဲ ကောန်အရာပ်ညးဍုၚ်ကွာန်ဗွဲမဂၠိုၚ် ဒးဂြိပ်ဒဴ ပါဲဓလေတ်ဒၟံၚ်ရ။

အတိုၚ်တၚ်လလောၚ်တြး KNU မ္ဂး ပ္ဍဲကဵုခရိုၚ်ညံၚ်လေဝ်ပေန် ဟိုတ်နူပေါဲဗတိုက်ကဵု ဒပ်ကံၚ်ဇြဳပၞာန် ဖံက်ပ္ကဝ်လဝ် အခေါၚ်အရာမၞိဟ်တုဲ လၟိဟ်ညးပါဲဘဲပၞာန် ဒးဂြိပ်ဒဴဒၟံၚ်မွဲကိုတ်ပြၚ် နွံရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – KNU