သၞေဟ်ကၚ်စၟဳစၟတ်ကံၚ်ဇြဳပၞာန် လ္တူဂၠံၚ်ဆက်စၠောံ အကြာခရိုၚ်ပေါက်ခေါၚ် ဒးဒုၚ်ဗတိုက်လဝ်

ပေါက်ခေါၚ် – ဒဳဇြေမ်ဗာ(၁)

​သၞေဟ်ကၚ်စၟဳစၟတ်ကံၚ်ဇြဳပၞာန် မၞုံလ္တူဂၠံၚ်ဆက်စၠောံခရိုၚ်မွဲကဵုမွဲ အကြာကွာန်ညောၚ်ကုမ်ကဵု ကွာန်ချေန်လေဝ် (ချင်းလည်) ဂကောံကွာန်ညောၚ်ကုမ် ပွိုၚ်ဍုၚ်ပေါက်ခေါၚ် ခရိုၚ်ပြန်၊ ရးဒေသဗဂေါ ဒပ်စဵုဒၞာညးဍုၚ်ကွာန်တအ် ဗတိုက်လဝ်ရဂှ် PDF ဗဂေါ လလောၚ်တြးလဝ် ပရိုၚ်ရ။

ဗတိုက်လဝ်သၞေဟ်ကၚ်စၟဳစၟတ်ကံၚ်ဇြဳပၞာန် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၉) အခိၚ်နူဂယးပြဟ် တုဲကၠုၚ်တေံတုဲ ဟိုတ်နူက္ဍိုက်ဗတိုက်လဝ်ဏံ ကောန်ဒပ်ကံၚ်ဇြဳပၞာန် ဒးလဝ်ဘဲဝပ် (၂) တၠရဂှ် ကဵုလဝ်သမ္တီရ။

ညးဒးလဝ်ဘဲဝပ် ပ္ဍဲကဵုပေါဲဗတိုက်တအ်ဂှ် ပ္ဍိုက်ကေတ်ဏာလဝ် ကဵုကွဳစက်ပလံၚ်မၞိဟ်ယဲ ပ္ဍဲလ္ပာ်ပေါက်ခေါၚ်ရဂှ် ဟီုလဝ်တုဲ မၞိဟ်ဒးချိုတ်လဝ် နွံ ဟၟဲ ဃောလ္ၚတ်ဂၠိုက်ဂၠာဲဒၟံၚ်ရဂှ် ဟီုလဝ်ရ။

သၞေဟ်ကၚ်စၟဳစၟတ်ဏံ တၜေဟ်လက်ပရာန်ကဟုက်ဒၟံၚ် ညးဍုၚ်ကွာန်အာတရဴတအ်ကီု၊ အာတ်မိက်ကေတ်ဒၟံၚ်သြန်ကီု၊ ကပေါတ်ရာန်ကေတ်နၚ်လဝ်တအ်ဂှ် ရာန်နၚ်လဝ် လောန်နူဗၞတ်ဗ္ၜတ်ကီု ဟီုတုဲ ပါဲနူဘပဠဒၟံၚ်ဂှ် ဟိုတ်နူကဵုဒၟံၚ်ဒဒိုက် ဘပဠဒၟံၚ် ညးဍုၚ်ကွာန်တအ် နာနာသာ်တုဲ ဗတိုက်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပရေၚ်ဗတိုက်ပန်ဏံဂှ် တံဒပ် PDF ၃၆၀၂၊ ဒပ်လ္ပာ် ၃ ကဵု ဂကောံပံၚ်တောဲ SPDF တအ် လုပ်စိုပ်ဗတိုက်လဝ်တုဲ ၜိုန်ရလ္ပာ်ကံၚ်ဇြဳပၞာန် က္လေၚ်ပန်ပှော်လဝ်ကီုလေဝ် လ္ပာ်ဒပ်စဵုဒၞာညးဍုၚ်ကွာန်တအ်ဂှ် ပရေၚ်ဇီုကပိုက်ဒးလဝ် ဟၟဲမွဲသာ် ဆုတ်က္လေၚ်တိတ်မာန်လဝ်ရဂှ် ကဵုလဝ်သမ္တီရ။

နကဵုဂကောံရပ်လွဟ်ကံၚ်ဇြဳပၞာန်တအ် ပံၚ်တောဲကဵု ညးဍုၚ်ကွာန်တအ်တုဲ သွက်ဂွံဆက်စၠောံနၚ် ကုဒပ်စဵုဒၞာညးဍုၚ်ကွာန်တအ် ဗွဲမဂတာပ်အခိၚ်တုဲ လုပ်ကၠုၚ်ဖျေံလွဟ် ညးသ္ကအ်ညိဂှ် ကဵုလဝ်သတိရ။

ပရိုၚ် – သြၚ်လောန်တိုၚ်မ်

ဗီု – Bago – PDF