အပ္ဍဲပေါဲဗ္တိုက်အလုံဍုၚ်မွဲဂှ် ဒးဒုၚ်ဗ္တိုက်ဒၟံၚ် နကဵုဇြဟတ် သာတုဲဂၠိုၚ်တံရောၚ်ဂှ် က္ဍိုပ်သ္ကိုပ်ပၞာန် ကရောတ်တသဝ်

နေဗျဳဒဝ်၊ ဒဳဇြေမ်ဗာ ၁

အပ္ဍဲပေါဲဗ္တိုက်က္တဵုဒှ်ဒၟံၚ်အလုံဍုၚ်မွဲဂှ် နကဵုဒပ်ကံၚ်ဇြဳပၞာန် ဒးဒုၚ်ဗ္တိုက်ဒၟံၚ်ကဵု ဂကောံပၠန်ဂတးရပ်လွဟ်တံ နကဵုဇြဟတ်သာဂၠိုၚ်တံရောၚ်ဂှ် က္ဍိုပ်သ္ကိုပ်ပၞာန် ကရောတ်တသဝ်ဟီုဂးကၠုၚ်ရ။

အပ္ဍဲကောံဓရီုကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၂၉ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကေတ်အခေါၚ်ခိုဟ်ကဵု ပရေၚ်ဒေါအ်ပန်ပှော် ကေုာံ ဝၚ်ပရူ ဂကောံရပ်လွဟ်ကောန်ဍုၚ်အရၚ်တံဂှ်တုဲ ဆက်စပ်ကဵု လ္တူဇြဟတ်သၠဲကၠုၚ်ဂှ်တုဲ ဟီုဂးကၠုၚ်လဝ်ရ။

အခိၚ်ဒပ်ပၞာန်သီအဝဵု ကြပ်ပေၚ်ပိသၞာံဂှ် ဒပ်ကံၚ်ဇြဳပၞာန် မဒှ်ကၠုၚ်ဒၟံၚ်ဗီုပြၚ်လွေဟ်ပၞာန်ဒုၚ်ဂှ်ဝွံ စနူဂိတုအံက်တဝ်ဗာ ကြပ်အိုတ်ဂှ်တုဲ ဒဵုကဵုအခိၚ်လၟုဟ် ပ္ဍဲကဵုရးသေံသ္ကုတ်သၟဝ်ကျာတံကီု သီုကဵုပ္ဍဲရးသက်ကိုၚ်၊ မဂွဵု၊ ချေၚ်၊ ကရေၚ်ဍာဲ၊ ကရေၚ်၊ ရခေၚ် ကေုာံ တွဵုရးဍုၚ်မန်တံဂှ် ပေါဲဗ္တိုက်တံ ဆက်က္တဵုဒှ်ဒၟံၚ်ရ။

က္ဍိုပ်သ္ကိုပ်ပၞာန်ဂှ် အခိၚ်ရေၚ်တၠုၚ်ဒၟံၚ်ပရေၚ်ပၞာန်ဂှ် စပ်ကဵုကိစ္စ ဒးစွံလဝ်ကောန်ဒပ်ဂမၠိုၚ် လ္ဂောံကဵုပရေၚ်ဂီုကၠီု ပ္ဍဲကဵုဒၞါဲလ္ၚဵုတံဂှ် ဂကောံပံၚ်ကောံပၠန်ဂတးရပ်လွဟ်တံ မ္ၚးနူကဵု Drop Bomb ဂှ် ကၠောန်သ္ပဗ္တိုက်လဝ် နကဵုဇြဟတ်သာဂၠိုၚ်တံရောၚ် သ္ဂးရ။

ယဝ်ရသ္ၚဳဂၠိပ်ရံၚ် လၟေၚ်ဒဒှ် မက္တဵုဒှ်လဝ် ပ္ဍဲရးသေံ ဗၟံက်သၟဝ်ကျာဂှ်မ္ဂး နကဵုဇြဟတ်သာဂၠိုၚ်တံကဵု သုၚ်စောဲနဲပညာမတောတက်တံဂှ်တုဲ ဗ္တိုက်စကာလဝ် Drone ပၞာန် ကေုာံ Drop Bomb ၂၅၀၀၀ မပြၚ်ဂှ် ဂွံဆဵုကေတ်ရောၚ် ဟီုဂးလဝ် ပ္ဍဲကဵုကောံဓရီုဂှ်ရ။

သ္အာၚ်နူဂှ်ပၠန် သုၚ်စောဲလဝ် သီုကဵုကမ်လှောဝ် (ရှော့တိုက်) ၁၀၇ မဳလဳမဳတာ ဗ္ဒါဲ ၁၂၀ မတုဲ ပ္ဍဲအရာဗ္တိုက် ဗ္ဒိုပ်ဒပ်တံဂှ် မ္ၚးနူဂကောံ TNLA, KIA, AA တံဂှ် ဂကောံဒပ် မပကောံလဝ်ဂမၠိုၚ် ကဝ်ကတံ၊ တၠပညာ Drone ဍုၚ်သ္အာၚ်တံ အပံၚ်ဖအိုတ် ဗ္ဒါဲ ၆၅၀၀ ပါလုပ်လဝ်ဂှ် က္ဍိုပ်သ္ကိုပ်ပၞာန် သ္ဂးလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် ဟိုတ်နူဇြဟတ်သာဂၠိုၚ်တံကဵု တၠပညာဍုၚ်သ္အာၚ်တံဂှ်တုဲ ဗ္ဒိုပ်ဒပ်ပၞာန် က္ဍိုပ်သ္ကိုပ်ပၞာန်တံ ဒးဒုၚ်သီဗ္တိုက်လဝ်တုဲ လညာတ်ဒးဆေၚ်လဝ်မုက် ကုကျဗြံတံဂှ်ဝွံ ရန်လဝ်ကဵု ဍုၚ်ကြုက်ရောၚ်ဂှ် သ္ၚဳဂၠိပ်လဝ်ရ။

“ပေါဲဗ္တိုက်သီဗ္ဒိုပ်ဟီုဂှ် သီကဵုဒရုၚ်ဟွံဂွံပုဟ်။ ၜတ်ကၞာတ်ဇြဟတ်ပၞာန်ဗလးတိတုဲ ဗ္တိုက်ဒၟံၚ်ညးသ္ကအ်အိုတ်ရ။ အေ ဂှ်တှ်ေ ဟိုတ်နူဇြဟတ်တံဏံတုဲ နကဵုညး ဒးကျလဝ်ရောၚ် လစွံစိုတ်သာ်ဏံဂှ်ဝွံ ဒးဟီုတပ်ပ်မ္ဂး ကိစ္စဍုၚ်တၞဟ်ဟ်ဟီုဂှ် ဟီုကဵုဍုၚ်ကြုက်ဏောၚ်ဂှ် အဲကၠိုဟ်လဝ်ရ။ အေ ဂှ်တှ်ေ တၠပညာဍုၚ်ကြုက် ၜိုတ် ၆၅၀၀ ကၠုၚ်တုဲ ဟိုတ်နူကၠောန်လဝ် ဒရုၚ် ဂၠိုၚ်ကဵုဠက်ဂှ်ရ ဒပ်ပၞာန်ညး ဒးဆေၚ်ဒၟံၚ်မုက်ကဵု ကျဗြံတံရောၚ်ဟီုဂှ် ဒှ်တၚ်သ္ၚဳဂၠိပ်ပၞာန် သ္ဇက်ဒးဂြိုၚ်ခိုဟ်မွဲရောၚ်ဂှ် မိက်ဂွံဟီုရ” သာ်ဝွံ သ္ဂးရ။

ပေါဲဗ္တိုက် မစလဝ် ပ္ဍဲဂိတုအံက်တဝ်ဗာသ္ကုတ်လက္ကရဴဏံဂှ်ဝွံ ရးသေံသ္ကုတ်သၟဝ်ကျာသၟးဟွံက နူကဵုသက်ကိုၚ်ဂှ် ထဳချိုက်၊ ကဘလူ၊ ကဝ်လေန်၊ တမူ၊ ခါမ်ပါတ်၊ နူကဵုချေၚ်ဂှ် ဟာခါ ကေုာံ လိုၚ်လေန်ပဳ၊ နူကဵုရခေၚ်ဂှ် ပလက်ဝ ကေုာံ ပံက်တဝ်၊ နူကဵုမန်ဂှ် ၜါသွာၚ် ကေုာံ နူကဵုကရေၚ်ဍာဲဂှ် လွိုၚ်ကဝ် အပ္ဍဲပေါဲဗ္တိုက်သီဍုၚ်တံဂှ် ကံၚ်ဇြဳပၞာန် ဒးဂိလဝ်ရ။

ဟိုတ်နူပၞာန်ထ္ပက် မစလဝ် နူကဵုရးသေံသ္ကုတ်သၟဝ်ကျာဂှ်တုဲ ကံၚ်ဇြဳပၞာန်ဂှ် ပ္ဍဲဂိတုနဝ်ဝေမ်ဗာ ၈ တေံ စကော်လဝ် ကောံဓရီုကံၚ်ဇြဳစဵုဒၞါ ကေုာံ ဂီုကၠီုကောန်ဂကူဂှ်တုဲ ကၠောန်သ္ပအာ ပရေၚ်ခၠေဝ်ပလန် မနွံပၟိက်တံဏောၚ်ဂှ် ကြဵုဇာလဝ်ဏီရ။

ဆ္ဂး ဟိုတ်နူပရေၚ်ဗ္တိုက်မွဲအခိၚ်ဓဝ် ဂကောံဇြဟတ်ပၠန်ဂတးတံဂှ်တုဲ အပ္ဍဲကဵုဗ္ဒိုပ်ကၚ်၊ ဗ္ဒိုပ်ဗၠာဲသၟိၚ်၊ ဍုၚ် မကေတ်လဝ်ဂီုကၠီုဂမၠိုၚ်၊ ဗ္ဒိုပ်ပၞာန်ဒုၚ်ဟွံဆုတ်ကလေၚ် ပ္ဍဲဗလးတိမုက်ပၞာန်တေံဂှ် ကောန်ဒပ်ကံၚ်ဇြဳပၞာန် ကျကၠုၚ်ပရေၚ် စဵုကဵုဒးပစူကၠုၚ်အလာံဗုရ။

က္ဍိုပ်သ္ကိုပ်ပၞာန်ဂှ် နကဵု AA သစ္စဟွံမွဲ ဖံက်ပ္ကဝ်တၚ်တုပ်စိုတ် ဒေါအ်ပန်ပှော်ယာယဳတံဂှ်တုဲ ပ္ဍဲကဵုလၟေၚ်ဒဒှ် က္တဵုဒှ်လဝ် ကုဂကောံ MNDAA ဂှ် ပါလုပ်လဝ်တုဲ ပ္ဍဲကဵုရခေၚ်ဂှ်လေဝ် ဗ္တိုက်လဝ်ဗ္ဒိုပ်ဒပ်တံ နကဵုဇြဟတ်သာဂၠိုၚ်တံရောၚ်ဂှ် သ္ဂးရ။

သၟာပရေၚ်ဍုၚ်ကွာန် ဥူဖေတာန်ဂှ် သွက်ဂွံဗ္တိုက် ကံၚ်ဇြဳပၞာန်ဂှ် လလောၚ်တြးလဝ်ပၞာန်တုဲဒှ်ဂှ်ရ နကဵု AA ဟိုတ်နူဒှ်ဂကောံလုပ်ဒၟံၚ်ပေါဲဗ္တိုက် သွက်ဂွံကလေၚ်ဂွံ အဝဵုအပိုၚ်အခြာညးတံဂှ်ရ ဝးပ္ကဝ်ကတိကဝတ် ဟီုဟွံဂွံပုဟ်ဂှ် သ္ၚဳဂၠိပ်လဝ်ရ။

“မွဲလ္ပာ်ဂှ်လေဝ် လလောၚ်လဝ်ပၞာန်တုဲတုဲဏောၚ်။ ဟိုတ်ဂှ်ရ ULA/AA လေဝ် ကလေၚ်ဒးပါကၠုၚ် ပ္ဍဲကဵုပေါဲဗ္တိုက်တံရ။ တၚ်ရန်တၟံ ULA/AA ဂှ်လေဝ် တီဒၟံၚ်သီုညးဖအိုတ်ရ။ ဒှ်ဒၟံၚ်ဂကောံ လုပ်ဒၟံၚ်ပေါဲဗ္တိုက် သွက်ဂွံဂွံအဝဵုအပိုၚ်အခြာညးတံဂှ်တုဲ လ္ဂောံကဵုပရေၚ်ဍုၚ်ကွာန် ပွမပ္ညဳပ္ညပ်တံလေဝ် ဟွံမွဲပုဟ်၊ အစဳဇန်ဂွံသဳကၠဳလေဝ် ဟွံမွဲပုဟ်ဟီုတှ်ေ ထ္မံက်ဒၟံၚ်ရုပ်ရဴ တၚ်ရန်တၟံညးတံရောၚ်ဂှ် ညာတ်ရ။ ဟိုတ်ဂှ်ရ ကိစ္စတံဏံဝွံ ဝးပ္ကဝ်ဒၟံၚ် ကတိကဝတ်ဏောၚ်ဂှ် ဟီုဟွံဂွံပုဟ်။ ဗ္တိုက်သာ်ဏံ ဟွံဂွံပုဟ် ကတိကဝတ်သာ်ဏံလေဝ် ဟွံမွဲလဝ်ပုဟ်။ အခိၚ်မာန်တှ်ေ ဗ္တိုက်တွဵုဏောၚ်။ ဍေံတံလေဝ် (စကစ) ဗ္တိုက်ဒၟံၚ်ရလေဝ်“ သာ်ဝွံ သ္ဂးရ။

ဂကောံမဟာမိတ်ကောဒေံပိဂကောံ AA ပါလုပ်လဝ်ဂှ်ဝွံ ရန်တၟံ သွက်ဂွံစဵုဒၞါ ဒြပ်ရတ်ပိုန်ဟာန်လမျီုညးဍုၚ်ကွာန်တံမာန်၊ သွက်ဂွံစဵုဒၞါ ဇကုဇကုတံမာန်၊ သွက်ဂွံထိၚ်ဒက် ဒေသဇကုတံ လ္တူနူဏံမာန်ဂှ်ကဵု ညံၚ်သၞောတ်တၠအဝဵုပၞာန် အလုံညးဍုၚ်ကွာန်မွဲ မနွံဒၟံၚ်ပၟိက်တံ ရိုဟ်ကၞက်ဂွံပိုတ်အာတံဂှ်တုဲ လလောၚ်လဝ်ပၞာန် ကုကံၚ်ဇြဳပၞာန်ရ။

အခိၚ်လၟုဟ်ဂှ် ပ္ဍဲကဵုရးသေံသ္ကုတ်သၟဝ်ကျာတံပါလုပ်ဂှ် ပ္ဍဲကဵုရးသက်ကိုၚ်၊ ချေၚ် ကေုာံ ကရေၚ်ဍာဲတံဂှ် ဂကောံဇြဟတ်ပၠန်ဂတးတံ သီဂွံလဝ် ဍုၚ် ၁၈ ဍုၚ်တုဲ ကောန်ဒပ်ကံၚ်ဇြဳပၞာန် ကေုာံ ဂြောဝ်ဂတာညးတံ နူကဵုတမ်ဒပ်ပရေၚ်ဗ္တိုက်ကံၚ်ဇြဳပၞာန် ၜါဒပ်တံကီု ပျဳတုသေတ် ကေုာံ ညးဒုၚ်ကာဗၠာဲသၟိၚ်တံ ဂၠိုၚ်ကဵုကၠံ လုပ်စိုပ်ဖျေံလဝ်လွဟ်ရ။

ပရိုၚ်−သြၚ်လောန်တိုၚ်(မ်)

ဗီု−MOI